ညောင်ဦးမှာ နေအိမ် ၂ လုံးဓားပြတိုက်ခံရလို့ ကျပ်သိန်း ၂၀၀ ဆုံးရှုံးပြီး အိမ်ရှင် ၁ ဦးဒဏ်ရာရ

မန္တလေးတိုင်း၊ ညောင်ဦးမြို့နယ်၊ ပျော်ဘွယ်ကျေးရွာမှာ နေအိမ် ၂ လုံးဓားပြတိုက်ခံရပြီး ကျပ်သိန်း ၂၀၀ ကျော်ဆုံးရှုံးကာ အိမ်ရှင် ၁ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၄ ရက် ည ၇ နာရီခွဲကျော်မှာ ဦးရွှေတင့်ရဲ့အိမ်ဆောက်ပစ္စည်းရောင်းဝယ်ရေးနေအိမ်ကို သေနတ်ကိုင်ထားသူ ၇ ဦးကဝင်လာပြီး ဓါးပြတိုက်ရိုက်နှက်ခဲ့တဲ့အတွက် ဦးရွှေတင့်လည်း ဒဏ်ရာရခဲ့ပါတယ်။ 

ဒါ့အပြင် ဒီဇင်ဘာ ၂၅ ရက်မနက် ၅ နာရီကျော်မှာလည်း အဆိုပါကျေးရွာအတွင်းရှိ စက်သုံးဆီ ရောင်းဝယ်ရေးလုပ်ငန်းလုပ်ကိုင်သူ ဦးမောင်ဝင်းနေအိမ်ကို လူ ၂ ဦးက ဝင်ရောက်ဓားပြတိုက်ခဲ့တာလို့ ဆိုပါတယ်။ 

"ဦးရွှေတင့်အိမ်ကျ ငွေလည်းပါသွားတာများတယ်။ ရိုက်နှက်လည်းခံရတာရှိတယ်။ သူက ထိုးကြိတ်ခံရတာဆိုတော့ ဒဏ်ရာလည်းများတယ်။ ဦးမောင်ဝင်းအိမ်ကျတော့ ၂ ယောက်တည်း လာတာဆိုတော့ ထိုးကြိတ်မခံရဘဲ ငွေပါသွားတာ" လို့ ဖြစ်စဥ်ကိုသိထားတဲ့ ဒေသခံတဦးက ပြောပါတယ်။

ဓားပြတိုက်ခံရတာကြောင့် ဦးရွှေတင့်အိမ်ကနေ ငွေသားကျပ်သိန်း ၂၀၀ ဝန်းကျင်ပါသွားပြီး ဦးမောင်ဝင်းဆီက ငွေကျပ် ၁၀ သိန်းကျော်ပါသွားတယ်လို့ ဆိုပါတယ်။

ဓားပြတွေရဲ့ ရိုက်နှက်တာခံရလို့ ဦးရွှေတင့်မှာ မျက်နှာနဲ့ခန္ဓာကိုယ်တွေမှာ ဒဏ်ရာတွေရထားပြီး ဆေးကုသနေရတယ်လို့ သိရပါတယ်။

နေအိမ်တွေကို ဓားပြတိုက်သွားသူတွေကထွက်ပြေးလွတ်မြောက်နေပြီး ဒီဇင်ဘာ ၂၆ ရက်အထိ ဖမ်းဆီးရမိတာမရှိသေးဘူးလို့ အထက်ပါဒေသခံကပြောပါတယ်။ 

ဒီဇင်ဘာ ၇ ရက်ညပိုင်းမှာလည်း ညောင်ဦးမြို့နယ်၊ မီးလောင်ဖျား(မြောက်) ကျေးရွာအနီးမှာ စက်သုံးဆီဆိုင်ပိုင်ရှင်နဲ့ တူမတို့ဆိုင်အတွင်းပစ်ခတ်ခံရပြီးသေဆုံးကာ ဆီရောင်းရငွေအချို့လည်း ပါသွားသေးတယ်လို့ သိရပါတယ်။

စာတည်း - လင်း 

#မြေလတ်အသံ

#မန္တလေး #ညောင်ဦး #ဓါးပြတိုက်