တည်းခိုခန်းမှာ အမျိုးသမီး ၁ ဦး မျက်နှာဖူးယောင်၊ မေးရိုးပြုတ်ဒဏ်ရာတွေနဲ့ သေဆုံးလျက်တွေ့

မန္တလေးတိုင်းဒေသကြီး၊ မန္တလေးမြို့၊ ၃၆ လမ်း၊ ၇၀-၇၁ လမ်းကြားရှိ တည်းခိုခန်း ၁ ခုတွင် မျက်နှာဖူးယောင်၊ မေးရိုးပြုတ်ဒဏ်ရာတွေနဲ့ အမျိုးသမီး ၁ ဦး သေဆုံးလျက်တွေ့ရှိတယ်လို့ သိရပါတယ်။

နိုဝင်ဘာ ၁၁ ရက် ည ၈ နာရီခန့်မှာ အဆိုပါတည်းခိုခန်းရှိ အခန်း ၁ ခုမှာ တည်းခိုနေထိုင်နေတဲ့ အသက် ၂၇ နှစ်အရွယ် တမူးလိပ်စာပါ အမျိုးသမီး ၁ ဦးဟာ အခန်းအတွင်းမှာ အဝတ်ဗလာနဲ့သေဆုံးနေတာကို တည်းခိုခန်း ဝန်ထမ်းတွေက တွေ့ရှိခဲ့တယ်လို့ ဆိုပါတယ်။

"တည်းခိုခန်းမှာ အချိန်ပိုင်းလာတည်းရင်းနဲ့ ကောင်လေးက အောက်ဆင်းလာပြီးတော့ တညလုံးယူမယ်လို့ ပြောပြီးထွက်သွားတာ။ ပြန်မလာလို့တည်းခိုခန်းက မသင်္ကာလို့ ဖွင့်ကြည့်မှာ (မိန်းကလေး)သေနေတာတွေ့ရတာ" လို့ ဒေသခံတဦးက ပြောပါတယ်။

တည်းခိုခန်းမှာလာတည်းတဲ့ သေဆုံးသူအမျိုးသမီးနဲ့ အမျိုးသားဟာ ညနေ ၄ နာရီခန့် ကတည်းက တည်းခိုခန်းမှာ အချိန်ပိုင်းလာတည်းနေတာဖြစ်ပြီး အလောင်းကိုတော့ ည ၈ နာရီကျော်မှာတွေ့ရတယ်လို့ သိရပါတယ်။

သေဆုံးသူအမျိုသမီးမှာ မျက်နှာပြင်တခုလုံး ထိုးကြိတ်ရိုက်နှက်ထားတဲ့ဒဏ်ရာကြောင့် မျက်နှာပြင်ဖူးယောင်၊ မေးရိုးပြုတ်ထွက်ပြီး သေဆုံးနေတာလို့ သိရပါတယ်။

တခန်းတည်းအတူလာတည်းတဲ့ အမျိုးသားကတော့ တည်းခိုခန်းကထွက်သွားပြီးကတည်းက ပျောက်ဆုံးနေပြီး ဖမ်းဆီးရမိတာ မရှိသေးဘူးလို့ ဆိုပါတယ်။

သေဆုံးသူအမျိုးသမီးရဲ့အလောင်းကိုတော့ ဒေသခံလူမှုကူညီရေးအသင်းတွေက မန္တလေးပြည်သူ့ဆေးရုံကို ပို့ဆောင်ပေးထားရတယ်လို့ သိရပါတယ်။

စာတည်း - လင်းဇေ

#မြေလတ်အသံ

#မန္တလေးတိုင်း #တည်းခိုခန်း #မေးရိုးပြုတ် #အမျိုးသမီး