တရုတ်ဝယ်လက်မရှိလို့ စဉ့်ကူးက ဖရဲစိုက်တောင်သူတွေ တခြားသီးနှံတွေကို ပြောင်းလဲစိုက်ပျိုး

တရုတ်-မြန်မာနယ်စပ် မူဆယ်နယ်စပ်ဂိတ်ကို ပိတ်ထားတာကြောင့် တရုတ်ဝယ်လက်မရှိတဲ့အတွက် မန္တလေး တိုင်း၊ စဉ့်ကူးမြို့နယ်ထဲက ဖရဲစိုက်တောင်သူတွေဟာ ပဲ၊ နှမ်း စတဲ့သီးနှံတွေကို ပြောင်းလဲ စိုက်ပျိုးနေရတယ်လို့ ဒေသခံတောင်သူတွေဆီက သိရပါတယ်။ 

တရုတ်ဝယ်လက်မရှိသလို စဉ့်ကူးဒေသအတွင်း စစ်ရေးတင်းမာနေပြီး လမ်းပန်းဆက်သွယ်ရေးခက်ခဲကာ ခရီးစရိတ်တွေ ပိုမိုကုန်ကျနေတာကြောင့် တောင်ယာစိုက်ပျိုးလုပ်ကိုင်သူတွေဟာ အခုနှစ်မှာ ဖရဲသီးအစား အခြားသော နှမ်း၊ ပဲတီ၊ မတ်ပဲ စတဲ့သီးနှံတွေကို ပြောင်းလဲစိုက်ပျိုးနေတာဖြစ်ပါတယ်။ 

စဉ့်ကူးမြို့နယ်အတွင်းက တောင်သူတွေဟာ စပါး၊ ကြံ၊ မြေပဲ၊ ပဲတီစိမ်းစတာတွေကို စိုက်ပျိုးလေ့ရှိသလို တချို့ တောင်သူတွေဟာ တရုတ်ဈေးကွက်ဝယ်လိုအားရှိတဲ့ ဖရဲသီးတွေကို စီးပွားဖြစ်စိုက်ပျိုးကြတယ်လို့ ဖရဲသီးစိုက် တောင်သူတဦးက ပြောပါတယ်။ 

အရင်နှစ်တွေက တရုတ်နိုင်ငံသားတွေဟာ စဉ့်ကူးမြို့နယ်အတွင်း မြေတဧကကို ကျပ် ၅ သိန်းနဲ့ မြေယာတွေ ငှားရမ်းပြီး ဖရဲသီးစိုက်ပျိုးကာ တရုတ်နိုင်ငံကို ပို့သလို မန္တလေးမြို့နယ်အတွင်းမှာလည်း ဖြန့်ဖြူးရောင်းချတာတွေ လုပ်ခဲ့ကြတယ်လို့ သူက ဆိုပါတယ်။ 

အခုအခါမှာတော့ ဒေသတွင်းတိုက်ပွဲတွေဖြစ်ပွားတာ၊ တရုတ်-မြန်မာနယ်စပ်ကုန်သွားရေး မူဆယ်ဂိတ်ကို ပိတ်တာတွေကြောင့် ဖရဲသီးစိုက်တောင်သူတွေ အရှုံးပေါ်နေကြတယ်လို့ ဆိုပါတယ်။ 

“အရင်နှစ်တွေက ကျပ်သိန်း ၁၀၀ ရင်းရင် သိန်း ၄၀ လောက်အမြတ်ကျန်ပေမယ့် ဒီနှစ်မှာတော့ သိန်း ၁၀၀ ရင်း တာတောင် ၁၀ သိန်း၊ ၁၅ သိန်း အမြတ်ကျန်ဖို့ ကြက်ကောက်၊ ငှက်ကောက် ကောက်နေရတယ်။ တရုတ်တွေလည်း ရှုံးလို့ထင်တယ် မြေငှားပြီး ဖရဲစိုက်တာ သိပ်မလုပ်တော့ဘူး” လို့ စဉ့်ကူးနယ်က ဖရဲစိုက်တောင်သူတဦး က ပြေပါတယ်။  

ဒါကြောင့် ဖရဲစိုက်တောင်သူတွေဟာ ဖရဲစိုက်ပျိုးနေရာကနေ ပဲတီ၊ မတ်ပဲ၊ ပဲကြီးစတဲ့ သီးနှံတွေကို ပြောင်းလဲ စိုက်ပျိုးနေကြတယ်လို့ တောင်သူတွေက ဆိုပါတယ်။ 

ဖရဲသီးစိုက်ပျိုးနေရာကနေ ပဲသီးနှံပြောင်းလဲစိုက်ပျိုးလုပ်ကိုင်နေတဲ့ တောင်သူတဦးက ပဲစိုက်ပျိုးနေရတဲ့အခြေ အနေကို အခုလိုပြောပြပါတယ်။ 

“ပဲတီက ရှုံးတယ်၊ မတ်ပဲက အရင်းပဲ၊ ပဲကြီးကတော့ မခူးရသေးတော့ မသိသေးဘူး” လို့ သူက ရှင်းပြပါတယ်။ 

ပဲတီကို ပွဲရုံအထိကိုယ်တိုင်သွားရောင်းပါက ငွေချက်ချင်းချေပေးပေမယ့် တဆင့်ခံပွဲစားထံရောင်းချပါက ငွေချက်ချင်း မရဘဲ အချိန်စောင့်ရတာမျိုးတွေရှိတယ်လို့ ဆိုပါတယ်။ 

ပုံစာ - ပဲစိုက်ခင်း ဆေးဖျန်းနေသည့် တောင်သူတဦး။ (ပုံဟောင်း)

သတင်း - ပြုံးပန်းဝေ၊ စာတည်း - JCG

#မြေလတ်အသံ

#တရုတ် #မြန်မာ #မူဆယ် #မန္တလေး #ဖရဲစိုက် #ပဲ #နှမ်း