တိုက်ပွဲဖြစ်နေလို့ ဆင်ဖြူကျွန်း၊ တညောင်၊ ဆိပ်ဖြူလမ်းပိုင်းတွေကို Local PDF က ယာယီပိတ်

မကွေးတိုင်း၊ စလင်းမြို့နယ်အတွင်းက လမ်းပိုင်း ၃ ခုကို ဒီဇင်ဘာ ၂၀ ရက်ကစပြီး မနက် ၆ နာရီကနေ ည ၆ နာရီအတွင်း ဖြတ်သန်းမသွားလာကြဖို့ ဒေါင်းစစ်အောင် Local PDF အဖွဲ့ဆီက သိရပါတယ်။

စလင်းမြို့နယ်ထဲက ဆင်ဖြူကျွန်းလမ်း၊ တညောင်နဲ့ ဆိပ်ဖြူ စတဲ့လမ်းပိုင်း ၃ ခုမှာ ထိ‌တွေ့တိုက်ပွဲတွေဖြစ်နေတဲ့အတွက်လို့ ဆိုပါတယ်။

 လက်ရှိမှာ တညောင်နဲ့ ဆင်ဖြူကျွန်းကြားမှာ ဒေသခံကာကွယ်ရေးတပ်ဖွဲ့တွေနဲ့ စစ်ကောင်စီတပ်တွေ တိုက်ပွဲဖြစ်ပွားနေပြီး ဒေသခံကျေးရွာ ၅ ရွာက ပြည်သူထောင်ချီ စစ်ရှောင်နေရတယ်လို့ သိရပါတယ်။ 

“စစ်ကောင်စီဘက်က လက်နက်ကြီးနဲ့ ပစ်ခတ်တယ်။ အရပ်သားသွားလာတဲ့ တချို့ကားတွေမှာ မသင်္ကာတာတွေရှိလို့ လမ်းပိုင်းအသွားအလာ မလုပ်ခိုင်းတာ။” လို့ ဒေါင်းစစ်အောင် Local PDF တာဝန်ခံ ကိုထူးလေးက ပြောပါတယ်။ 

အထက်ပါပိတ်ထားတဲ့လမ်းတွေမှာ ခရီးသည်မော်တော်ယာဉ်တွေ၊ ကုန်ကားတွေသွားလာလေ့ရှိတာကြောင့် တိုက်ပွဲဖြစ်တဲ့အခါ ကြားညပ်ပြီး ပြည်သူတွေထိခိုက်မှာစိုးတဲ့အတွက် အခုလို အသိပေးတားမြစ်ထားတာ ဖြစ်တယ်လို့ သူက ပြောပါတယ်။ 

ကျန်းမာရေးနဲ့ အခြားရေးကြီးတဲ့ကိစ္စတွေရှိပါက ဒေါင်းစစ်အောင် Local PDF ဆီ ဆက်သွယ် အကြောင်းကြားနိုင်တယ်လို့ သိရပါတယ်။ 

“ကျနော်တို့က ခရီးသွားလာတဲ့ ပြည်သူတွေ စစ်ဆေးပြီး သတိပေးတယ်၊ ပြည်သူတွေက မလိုက်နာကြဘူး။ ဒီမှာက တအုန်းအုန်း တဒိုင်းဒိုင်း ပစ်ခတ်နေတဲ့ကြားထဲက လမ်းပိုင်းသွားလာမှုက မရပ်တန့်ဘူးဖြစ်နေတယ်။ ဒီဒေသကပြည်သူတွေရော တခြားကလာတဲ့ပြည်သူတွေရော မလိုက်နာကြဘူး။ တကယ်လို့ ကြားထဲမှာ ပြည်သူထိခိုက်သွားရင် ကျနော်တို့ကိုပဲ အပြစ်ပြောမှာ။ စစ်ရေးငြိမ်သွားရင်တော့ လမ်းပိုင်းပြန်ဖွင့်ပေးမှာပါ။” လို့ ဒေါင်းစစ်အောင် Local PDF တာဝန်ခံ ကိုထူးလေးက ပြောပါတယ်။ 

ပုံစာ - တညောင်-ဆင်ဖြူကျွန်းလမ်းပိုင်းမှာ တော်လှန်ရေးရဲဘော်တွေ စစ်ဆေးရေးလုပ်နေပုံ။ 

စာတည်း-လင်းဇေ

#မြေလတ်အသံ

#မကွေးတိုင်း #စလင်းမြို့ #ဒေါင်းစစ်အောင် #LocalPDF