တောင်ငူမှာ ၄ နှစ်အရွယ်ကလေး ၁ ဦး ခွေးရူးကိုက်ခံရပြီးသေဆုံး

ပဲခူးတိုင်း၊ တောင်ငူမြို့နယ်၊ ကံရိုးကျေးရွာမှာ အသက် ၄ နှစ်ခွဲအရွယ် ကလေးငယ် ၁ ဦး ခွေးရူးကိုက်ခံရပြီး သေဆုံးခဲ့တယ်လို့ ကလေးနဲ့နီးစပ်တဲ့ဒေသခံတဦးဆီက သိရပါတယ်။

ဒီဇင်ဘာ ၂၂ ရက်ညနေ ၅ နာရီခန့်မှာ ကံရိုးရွာ၊ အင်းပုတ်ဘုန်းကြီးကျောင်းအနီး ကလေးငယ်တွေနဲ့ ကစားနေချိန် ခွေးရူ ၁ ကောင်ကရောက်လာပြီး အသက် ၄ နှစ်ခွဲအရွယ် မောင်ထွန်းတွယ်ဦး ကို ကိုက်ခဲ့တာလို့ ဆိုပါတယ်။ 

ခွေးရူးကိုက်ခံရချင်း ဆေးရုံကိုမပို့ဖြစ်ခဲ့ဘဲ ဒီဇင်ဘာ ၂၃ ရက်မနက်ပိုင်းမှ တောင်ငူဆေးရုံကိုပို့ဆောင်ခဲ့ကာ အဲ့ဒီညနေပိုင်းမှာပဲ တောင်ငူဆေးရုံကနေ နေပြည်တော်ကုတင် ၁၀၀၀ ဆေးရုံကို လွှဲပြောင်းတက်ရောက်နေချိန်မှာ သေဆုံးခဲ့တာလို့ ဒေသခံတဦးက ပြောပါတယ်။ 

"တောင်ငူဆေးရုံကနေ လက်မခံတော့တဲ့အခြေအနေထိဖြစ်နေလို့ နေပြည်တော်ဆေးရုံပို့တာ ဆေးရုံရောက်ပြီး ဆယ်မိနစ် ဆယ်ငါးမိနစ်လောက်ပဲခံပြီး ဆုံးသွားတယ်။ ခွေးရူးကိုက်ခံရပြီး ၁ ရက်ပဲခံပြီးဆုံးတာ။"လို့ ဒေသခံတဦးက ပြောပါတယ်။

ခွေးရူးကိုက်ခံရပြီးနောက်မှာ ကလေးငယ်ဟာ ရေထိရမှာကိုကြောက်ပြီး အလင်းရောင်ကိုမြင်တချက် မမြင်တချက်ဖြစ်ကာ မျက်လုံးကလုံးဝမမှိတ်တော့ဘဲ စကားတွေကတော့ပုံမှန်ပြောနေခဲ့တယ်လို့ ခွေးရူးကိုက်ခံရပြီးနောက်ဖြစ်ခဲ့တဲ့ ကလေးရဲ့အခြေအနေကို သူကပြန်ပြောပြပါတယ်။ 

အဆိုပါကလေးငယ်ရဲ့ပေါင်ကို အကိုက်ခံခဲ့ရတာဖြစ်ပြီး ခွေးရူးကိုတော့ ရွာသားတွေက ဝိုင်းရိုက်ခဲ့လို့ သေဆုံးသွားပြီလို့ သိရပါတယ်။

အလောင်းကိုတော့ နေပြည်တော်ကုတင် ၁၀၀၀ ဆေးရုံမှာထားရှိထားရကာ ဒီဇင်ဘာ ၂၅ ရက်ဒီနေ့မှ ပြန်သယ်ဆောင်ခွင့်ရပြီး နေ့လယ် ၁ နာရီမှာ ကံရိုးကျေးရွာသင်္ချိုင်းမှာ နာရေးလုပ်မယ်လို့ ဒေသခံတဦးက ပြောပါတယ်။ 

ခွေးရူးကိုက်ခံရပါက အချိန်မီဆေးရုံဆေးခန်းမပို့နိုင်ရင် အသက်သေဆုံးတဲ့ အထိဖြစ်တတ်တာကြောင့် ပြည်သူတွေအနေနဲ့ ခွေးလေခွေးလွင့်တွေကို သတိထားသင့်သလို ခွေးရူးပြန်ကာကွယ်ဆေးတွေကိုလည်း ကြိုတင်ထိုးထားသင့်တယ်လို့ သူကဆက်ပြောပါတယ်။

၂၀၂၄ ခုနှစ်အတွင်း တောင်ငူမြို့နယ်မှာ ကလေးငယ် ၃ ဦးအထိ ခွေးရူးကိုက်ခံထားရပြီး ကျန် ၂ ဦးကတော့ အချိန်မီဆေးကုသနိုင်ခဲ့လို့ အသက်သေဆုံးတာမရှိခဲ့ဘူးလို့ အထက်ပါဒေသခံက ပြောပါတယ်။ ဒီပမာဏဟာ လက်လှမ်းမီသလောက်သိရှိတဲ့အရေအတွက်ဖြစ်တယ်လို့ ဆိုပါတယ်။ 

ကမ္ဘာ့ကျန်းမာရေးအဖွဲ့ WHO ရဲ့ ၂၀၂၂ ခုနှစ်၊ စက်တင်ဘာလ သတင်းထုတ်ပြန်ချက်အရ ကမ္ဘာတဝန်းလုံးမှာ ခွေးရူးပြန်ရောဂါကြောင့် တနှစ်လျှင် လူ ၅၅,၀၀၀ မှ ၇၀,၀၀၀ ခန့်အထိ အသက်ဆုံးရှုံးလျက်ရှိတယ်လို့ သိရပါတယ်။

စာတည်း - လင်း 

#မြေလတ်အသံ

#တောင်ငူ #ခွေးရူး #ကလေးငယ် #သေဆုံး