ထန်းရည်ဆိုင်ထိုင်နေတဲ့ အမျိုးသား ၆ ဦးကို ပျူစောထီးတွေက ပေါ်တာဆွဲဖမ်းဆီး

မကွေးတိုင်း၊ ပွင့်ဖြူမြို့နယ်၊ ကနီကျေးရွာ လမ်းထိပ်ရှိ ထန်းရည်ဆိုင်မှာရှိနေတဲ့ အမျိုးသား ၆ ဦးကို ပျူစောထီးတွေက ပေါ်တာဆွဲဖမ်းဆီးသွားတယ်လို့ မင်းဘူးခရိုင် ပကဖ ပြန်ကြားရေးတာဝန်ခံထံက သိရပါတယ်။

ဒီဇင်ဘာ ၁၉ ရက် ညနေ ၄ နာရီ ၄၅ မိနစ်ခန့်မှာ ကျောင်းကုန်းကြီးကျေးရွာနဲ့ ရေအုပ်ကလေးကျေးရွာက ပျူစောထီး ၈ ဦးခန့်ဟာ ကနီရွာထိပ်ကိုရောက်လာပြီး ထန်းရည်ဆိုင်မှာ ထိုင်နေတဲ့ အမျိုးသားတွေကို ဖမ်းဆီးသွားခဲ့တာလို့ဆိုပါတယ်။

"လမ်းဘေးထန်းရည်ဆိုင်လေးမှာ ခရီးသွားလာရင်း နားပြုပြီး လူငယ်သဘာဝ ထန်းရည်သောက်၊ ထိုင်နေချိန် ယောကျ်ားသားတွေ စုနေတာဆိုပြီး ဝင်ဖမ်းသွားတာ။" လို့ မင်းဘူးခရိုင်ပကဖ ပြန်ကြားရေးတာဝန်ခံက ပြောပါ တယ်။

ဖမ်းဆီးခံရသူတွေက အသက် ၂၃ နှစ်ကနေ ၃၀ ကြားအရွယ်ရှိ မယ်ဇလီကျေးရွာက တင်ကိုဝင်း၊ ဇင်ကိုဝင်း၊ လယ်မကျေးရွာသား ရွှေတိုးအောင်၊ တရုတ်ကြီး၊ မဒဲကျေးရွာသား ဝေဖြိုးအောင်ပါ ၆ ဦးတို့ဖြစ်ပြီး သူတို့ကို ပွင့်ဖြူမြို့မရဲစခန်းအချုပ်မှာ ဖမ်းဆီးထားတယ်လို့ ဆိုပါတယ်။

ဖမ်းဆီးခံရသူတွေဟာ ဒီဇင်ဘာ ၂၀ ရက် ဒီနေ့ မနက်ပိုင်းထိ ပြန်မလွတ်လာသေးသလို မိသားစုဝင်တွေနဲ့လည်း တွေ့ခွင့်မရသေးဘူးလို့ သိရပါတယ်။

ဖမ်းဆီးခံရတဲ့ အမျိုးသား ၆ ဦးကို ပြန်လည်လွတ်မြောက်စေချင်ရင်တော့ ၁ ဦးကို ကျပ်သိန်း ၇၀ နဲ့ ပြန်လာရွေးဖို့ ဖမ်းဆီးသွားတဲ့ ပျူစောထီးတွေဘက်က သတင်းလွှင့်နေတယ်လို့ ပြန်ကြားရေးတာဝန်ခံက ဆက်ပြောပါတယ်။

ပွင့်ဖြူမြို့နယ်အတွင်းမှာ အရင်က ပြည်သူ့စစ်မှုထမ်းခေါင်းစဥ်နဲ့ ကျေးရွာတွေမှာ ငွေကောက်တာ၊ မဲပေါက်တဲ့သူတွေကို စစ်မှုထမ်းဖို့ ထည့်ပေးတာတွေရှိနေပေမယ့် အခုလို ပြန်ပေးဆွဲတဲ့သဘောနဲ့ လူဖမ်းဆီးတာကတော့ ပထမဆုံးအကြိမ်ဖြစ်တယ်လို့ သိရပါတယ်။

ပုံစာ - စစ်မှုထမ်းသင်တန်း အမှတ်စဥ် ၇ အတွက် စုဆောင်းခံရသူအချို့။ (ဓာတ်ပုံ - စစ်ကောင်စီ တယ်လီဂရမ်)

စာတည်း - လင်းဇေ

#မြေလတ်အသံ

#မကွေး #ပွင့်ဖြူ #ကနီကျေး #ထန်းရည်ဆိုင် #ပျူစောထီး #ပေါ်တာဆွဲ #ပကဖ