Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
ထီးချိုင့်မှာ လေယာဥ်နဲ့ဗုံးကြဲခံရလို့ စစ်ရှောင် ၆ ဦးသေဆုံးပြီး ၃ ဦးထက်မနည်း ဒဏ်ရာရ
စစ်ကိုင်းတိုင်း၊ ထီးချိုင့်မြို့နယ်၊ ဝဲကြီးနဲ့အင်ဒေါင်းကျေးရွာအကြားကို စစ်ကောင်စီက တိုက်ခိုက်ရေးလေယာဥ်တစီးနဲ့ မတ်လ ၃၁ ရက်နေ့ ညနေ ၄ နာရီကျော်မှာ ဗုံးကြဲခဲ့လို့ စစ်ရှောင် ၆ ဦးသေဆုံးပြီး ၃ ဦးထက်မနည်း ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
သေဆုံးသူ ၆ ဦးမှာ ဝဲကြီးကျေးရွာမှ ဦးစိုးနိုင် ၄၇ နှစ်၊ ဒေါ်ညိုနွဲ့ ၄၇ နှစ်၊ ကိုအောင်ပိုင် ၁၆ နှစ်၊ မမာလာမိုး ၂၃ နှစ်၊ အမည်မသိရသေးတဲ့အမျိုးသား ၂ ဦးတို့ဖြစ်ပြီး၊ ဒဏ်ရာရရှိခဲ့သူ ၅ ဦးမှာ အသက် ၅ နှစ်အရွယ်ကလေးငယ် ၂ ဦး၊ အင်ဒေါင်းရွာမှ ကိုနန်းထက်ဇော် ၁၈ နှစ် တို့ဖြစ်တယ်လို့ ဒေသခံအမျိုးသားတဦးက ပြောပါတယ်။
"ဘာမှတိုက်ပွဲဖြစ်တာမရှိဘဲနဲ့ ဒီအတိုင်း လာကြဲသွားတာ။ တိုက်လေယာဥ် ၂ စင်းက မြစ်ကြီးနားဘက်က ဆင်းလာတာ။ တစင်းကတော့ ပေါက်ကုန်းဘက်ကို ကြဲတယ်။ တစင်းက စစ်ရှောင်တွေနေတဲ့နေရာကို ကြဲသွားတာ။ ကျနော်တို့စာရင်းရထားတာထက်ကို သေဆုံးသူ၊ဒဏ်ရာရသူတွေ များနိုင်ပါသေးတယ်" လို့ ဆိုပါတယ်။
တိုက်လေယာဥ် ၂ စီးမှာ တစီးက စစ်ဘေးရှောင်တွေ နေထိုင်ကြတဲ့ ဦးလာဘဘုရားအနီးဝန်းကျင်ကို ဗုံးကြဲခဲ့ပြီး ကျန်တစီးမှာ ပေါက်ကုန်းကျေးရွာအနီးကို ဗုံးကြဲခဲ့တာဖြစ်တယ်လို့ သူက ဆက်ပြောပါတယ်။
"လေယာဥ်နဲ့ဗုံးကြဲတဲ့အချိန်မှာ စစ်ဘေးရှောင်တွေက ပဲသိမ်းနေကြတာလို့ သိရတယ်။ ပြေး ချိန်မရလိုက်ဘူးပေါ့။ ပေါက်ကုန်းမှာတော့ အိမ်တလုံးနဲ့ဝက်တကောင်ပဲ ထိသွားတယ်။ လူအထိအခိုက်တော့ မရှိခဲ့ဘူး။ မတ်လထဲမှာ ပေါက်ကုန်းရွာကို ဗုံးကြဲတာ ဒီတကြိမ်နဲ့ဆို နှစ်ကြိမ်ရှိပြီ" လို့ ဆိုပါတယ်။
မတ်လ ၃၀ ရက်ကလည်း ထီးချိုင့်မြို့နယ်၊ အလယ်တောကျေးရွာမှာ မပေါက်ကွဲသေးပဲ ကျန်ခဲ့တဲ့ လက်နက်ကြီးကျည်ကို ကလေးငယ်တွေ ဆော့စကားရာက ပေါက်ကွဲပြီး ကလေး ၂ ဦး သေဆုံးကာ ၄ ဦး ဒဏ်ရာ ရရှိခဲ့ပါသေးတယ်။
ဒါ့အပြင် စစ်ကောင်စီတပ်သားတွေဟာ မတ်လ ၃၁၊ ၃၀ရက် ၂ ရက်ဆက်တိုက် ထီးချိုင့်မြို့နယ်က ညောင်ပင်သာရွာကို မီးရှို့ခဲ့တာကြောင့် လူနေအိမ် ၂၀၀ ကျော် ပျက်စီးသွားခဲ့တယ်လို့ ဒေသခံတွေက ပြောပါတယ်။
စာတည်း - 007
#မြေလတ်အသံ