နယ်မြေမတည်ငြိမ်တဲ့ကြားက ရွှေစက်တော်ဘုရားပွဲကျင်းပရန် ဘုရားဂေါပကအဖွဲ့ပြင်ဆင်

မကွေးတိုင်း၊ မင်းဘူး-စကုမြို့နယ်ရှိ မန်းရွှေစက်တော်ရာ ဗုဒ္ဓပူဇနီယပွဲတော်ကို ကျင်းပသွားမယ်လို့ မင်းဘူးမြို့ မန်းရွှေစက်တော်ရာ ဘုရားဂေါပကအဖွဲ့က ထုတ်ပြန်ထားပါတယ်။ 

မန်းရွှေစက်တော်ရာ ဗုဒ္ဓပူဇနီယပွဲတော်ကို လာမယ့်နှစ် ၂၀၂၅ ဖေဖော်ဝါရီ ၂ ရက်မှ ဧပြီ ၁၇ ရက်အထိ ၇၅ ရက် ကျင်းပသွားမှာဖြစ်တယ်လို့ ဆိုပါတယ်။ 

ပွဲတော်ကာလအတွင်း တင်ဒါလုပ်ငန်းတွေကို ဒီဇင်ဘာ ၂၀ ရက်မှ ၃၁ ရက် အထိ မင်းဘူးမြို့ ဂေါပကရုံးမှာ သတ်မှတ်ပုံစံနဲ့ လျှောက်ထားနိုင်ကြောင်းနဲ့  တင်ဒါလုပ်ငန်းဖွင့်ပွဲနေ့တွေကို ဘုရားဂေါပကအဖွဲ့က ထုတ်ပြန်ကြေညာခဲ့တာ ဖြစ်ပါတယ်။ 

အခုလို ဘုရားပွဲကျင်းပဖို့ပြင်ဆင်နေတာနဲ့ပတ်သက်လို့ မင်းဘူးခရိုင်အမှတ် ၄ တပ်ရင်းမှ တာဝန်ခံတဦးကတော့ စစ်ကောင်စီဟာ နယ်မြေထိန်းချုပ်ထားတယ်ဆိုတာကို ပြသချင်တဲ့အတွက် အခုလို လုပ်ဆောင်တာဖြစ်နိုင်တယ်လို့ ဆိုပါတယ်။ 

“သူတို့ နယ်မြေထိန်းချုပ်နိုင်ပါတယ်၊ အေးချမ်းပါတယ်၊ ပြည်သူတွေ သွားတယ်လာတယ်၊ ပျော်ပွဲရွှင်ပွဲတွေ ရှိတယ်၊ ဘာသာရေးပွဲ‌တွေရှိတယ်၊ ဒါတွေကို ချပြချင်တဲ့သဘောနဲ့ ရွှေစက်တော်ဘုရားပွဲကို ကျင်းပမယ်လို့ သုံးသပ်ပါတယ်” လို့ မင်းဘူးခရိုင် တပ်ရင်း ၄ တာဝန်ခံက ပြောပါတယ်။

အခုကာလဟာ တော်လှန်ရေးကာလဖြစ်နေပြီး တိုက်ပွဲတွေလည်း အရှိန်မြှင့်လုပ်ဆောင်နေတာဖြစ်တဲ့အတွက် ပြည်သူတွေအနေနဲ့ အပျော်အပါးနဲ့ အသွားအလာတွေ လျှော့စေချင်တယ်လို့ ဆိုပါတယ်။

တော်လှန်ရေးအင်အားစုတွေအနေနဲ့ အချိန်ပေးပြီးလုပ်ထားရတဲ့ စစ်ရေးမစ်ရှင်တွေဟာ ပြည်သူလူထုမလွတ်ကင်းတဲ့အတွက် ဖျက်သိမ်းလိုက်ရတာမျိုးတွေရှိပြီး လက်ရှိမှာလည်း ရွှေစက်တော်ဒေသမှာ တိုက်ပွဲတွေဖြစ်နေတယ်လို့ မင်းဘူးခရိုင် တပ်ရင်း ၄ တာဝန်ခံက ပြောပါတယ်။ 

“အစကတော့ မလုပ်ဖြစ်ဖူးလို့ကြားတယ်။ မန်း‌ရွှေစက်‌တော်ရာ ဘုရားပွဲမှာ သူတို့လုပ်မယ်ဆိုရင် တော်လှန်ရေးတပ်ဖွဲ့တွေ သိက္ခာကျအောင် ထောင်ချောက်ဆင်ပြီးလုပ်မယ်လို့ မြင်တယ်။ အခုလောလောဆယ် ဖြစ်နေ၊ ကြားနေရတဲ့သတင်းတွေအရ ဆည်တော်ဘက်တွေမှာလည်း တိုက်ခိုက်နေတယ်လို့ကြားရတယ်။” လို့ မကွေးမြို့ ခံတဦးက ပြောပါတယ်။ 

စစ်ကောင်စီအနေနဲ့ အခုလို ရွှေစက်တော်ဘုရားပွဲကို ကျင်းပဖို့ ပြင်ဆင်နေပေမယ့် ဘုရားဖူးတွေ၊ ဈေးသည်တွေ လာရောက်ဖို့ မဖြစ်နိုင်ဘူးလို့ သူက ဆိုပါတယ်။ 

စာတည်း - လင်းဇေ

#မြေလတ်အသံ

#မကွေး #မင်းဘူး #စကုမြို့ #မန်းရွှေစက်တော်ရာ #ဗုဒ္ဓပူဇနီယပွဲတော် #ဂေါပကအဖွဲ့