နေအိမ်တွေကို မွှေနှောက်ဖျက်စီးခဲ့တဲ့ စစ်ကောင်စီစစ်ကြောင်း မိုင်းဆွဲခံရလို့ ထိခိုက်သေဆုံးမှုရှိဟုဆို

စစ်ကိုင်းတိုင်း၊ ရေဦးမြို့နယ်၊​ ကံပေါက်ကျေးက နေအိမ်တွေကို မွှေနှောက်ရှာဖွေဖျက်စီးခဲ့တဲ့ စစ်ကောင်စီစစ်ကြောင်းဟာ မေလ ၂၃ ရက်နေ့က မိုင်း ၂ ကြိမ်ဆွဲတိုက်ခိုက်ခံရလို့ ထိခိုက်သေဆုံးမှုရှိခဲ့တယ်လို့ PDF တာဝန်ရှိသူက ပြောပါတယ်။

အင်အား ၇၀ ကျော်ပါတဲ့ အဲဒီစစ်ကြောင်းကို ရေဦးမြို့နယ် ပကဖ တပ်ခွဲ၊ နယ်မြေဒေသခံ ပြည်သူ့ကာကွယ်ရေးတပ်စိပ်တို့ဟာ မနက် ၆ နာရီက ကံပေါက်တံတားအနီးမှာ ၁ ကြိမ်၊ နေ့လယ် ၁ နာရီက လက်လံတံတားအနီးမှာ ၁ ကြိမ် စုစုပေါင်း ၂ ကြိမ်မိုင်းဆွဲခဲ့တာဖြစ်တယ် လို့ People's Defense Comrade မှ ပြန်ကြားရေးတာဝန်ခံ ထူးခန့်ဇော်(အမေ့သား) က ပြောပါတယ်။

"စကစတွေက မနက်ပိုင်းမှာ ကံပေါက်ရွာကိုဝင်ပြီးတော့ နေအိမ်တွေကို ရှာဖွေ၊ ဖျက်စီးတာတွေလုပ်တယ်။ မီးရှို့တာတော့မရှိဘူး။ နေ့ခင်းပိုင်းမှာအဲရွာကနေထွက်ပြီးတော့ မူးချောင်းဘောင်ဘေးလျှောက် စစ်ကြောင်းထိုးသွားတယ်။ ကာကွယ်ရေးတပ်ဖွဲ့တွေက ကံပေါက်ရွာကို အဝင်မှာတကြိမ်၊ အထွက်မှာတကြိမ် ၂ ကြိမ် မိုင်းဆွဲခဲ့တာ။ အပြန်အလှန်ပစ်ခတ်တာတော့ မရှိခဲ့ဘူး။ စကစတွေ ထိခိုက်‌သေဆုံးတာကို အတည်မပြုနိုင်ခဲ့ပေမယ့် အတော်လေးကိုအထိနာသွားတာတွေ့ ရှိခဲ့ရတယ်" လို့ ဆိုပါတယ်။

စစ်ကောင်စီစစ်ကြောင်းမိုင်းဆွဲခံခဲ့ရတဲ့ ကံပေါက်တံတားနဲ့ လက်လံတံတားအနီးဝန်းကျင်တွေမှာ သွေးထွက်လွန်ရင်ထိုးတဲ့ ဆေးကဒ်တွေ၊ သွေးစွန်းထားတဲ့ ဂွမ်းစတွေ၊ သွေးကွက်တွေကို တွေ့ရှိခဲ့ရတယ်လို့ သူကဆက်ပြောပါတယ်။

ဒါ့အပြင် မိုင်းဆွဲခံရပြီး အထိနာသွားတဲ့စစ်ကြောင်းဟာ နေ့လည် ၃ နာရီခွဲ အချိန်ခန့်မှာ လက်လံ၊ ဝက်ဖိုး၊ မြင်းပေါက်၊ ဇဝရွာစတဲ့ကျေးရွာတွေဘက်ကနေ သံသည်ရွာဘက်ကို နောက်ကြောင်းပြန်ခေါက်ကာ စစ်ကား ၃ စီးနဲ့ ရေဦးမြို့ထဲကို ပြန်လည်ဝင်ရောက်သွားခဲ့တယ်လို့ သိရပါတယ်။

စစ်ကြောင်းဟာ ရေဦးမြို့ပေါ်မှာ အထိုင်ချနေတဲ့ တပ်မ (၁၁) က တပ်သားတွေဖြစ်ပြီး၊ မေလ ၄ ရက်နေ့ကလည်း ချမ်းသာကျေးရွာရဲ့ စာသင်ကျောင်းကို မိုင်းခွဲတိုက်ခဲ့တဲ့ စစ်ကြောင်းဖြစ်သလို ရွှေဘိုမြို့နယ်နဲ့ ခင်ဦးမြို့နယ်တို့ကို တောက်လျှောက် စစ်ကြောင်းထိုးနေတဲ့ စစ်ကြောင်းလို့ ဒေသကာကွယ်ရေးအဖွဲ့တွေဆီက သိရပါတယ်။

စာတည်း - 007
#မြေလတ်အသံ
#စစ်ကိုင်း #ရေဦး #မိုင်းဆွဲတိုက်ခိုက် #PDF #စစ်ကောင်စီ