နွားထိုးကြီးနဲ့ငါန်းဇွန်မှာ စစ်ကောင်စီတပ်တွေ မိုင်းဆွဲခံရ

မန္တလေးတိုင်း၊ နွားထိုးကြီးနဲ့ ငါန်းဇွန်မြို့နယ်အတွင်းသွားလာနေတဲ့  စစ်ကောင်စီတပ်သားတွေကို  မိုင်းဆွဲတိုက်ခိုက်ခဲ့တယ်လို့ ကာကွယ်ရေးတပ်ဖွဲ့တွေက ပြောပါတယ်။ 

အောက်တိုဘာ ၁၅ ရက် ည ၈ နာရီကျော်မှာ နွားထိုးကြီးမြို့ပေါ်ကနေ မြင်းခြံဘက်ကို ထွက်ခွာလာတဲ့ စစ်ကောင်စီတပ်အင်အား ၃၀ ခန့်ပါ ကား ၂ စီးကို  နွားထိုးကြီးမြို့နယ်၊ ကံရွာရဲ့အနောက်ဘက် ကားလမ်းမအရောက်မှာ ၄ လုံးတွဲပဒေသာမိုင်း ၁ လုံးနဲ့ တိုက်ခိုက်ခဲ့တာလို့ ဆိုပါတယ်။

 "ကားပေါ်မှာဘဲ စကစ ၂ ကောင်ပွဲချင်းပြီးသေတယ်။ ကားဘေးမှန်တွေလည်း ပေါက်ထွက် ပျက်စီးသွားတယ်။ ကားတွေ မီးလောင်ပျက်စီးတာမျိုးမဖြစ်ခဲ့ဘူး။ တပ်တွင်းဖရဲသီးရဲ့ သတင်းပေးပို့ချက်အရ အတည်ပြုခဲ့တာ" လို့ Myingyan Black Tiger (MBT)ခေါင်းဆောင် ဗိုလ်မိုက်ခဲက ပြောပါတယ်။

တိုက်ခိုက်ခံရပြီးနောက် စစ်ကောင်စီတပ်သားတွေက လက်နက်ငယ်တွေနဲ့ လမ်းတလျောက်လုံးပစ်ခတ်မှုတွေ ပြုလုပ်ခဲ့ပြီး မြင်းခြံမြို့ပေါ်ကို ဆက်လက်မောင်းနှင်သွားခဲ့ ကြတယ်လို့ ဗိုလ်မိုက်ခဲ က ဆက်ပြောပါတယ်။ 

ဒီတိုက်ခိုက်မှုကိုတော့ Myingyan Black Tiger (MBT)၊ MDY-PDF ခရိုင်တပ်ရင်း ၃၊ Natogyi Regional Defence Forceတို့က ပူးပေါင်းလုပ်ဆောင်ခဲ့တာဖြစ်ပါတယ်။

ဒါ့အပြင် အောက်တိုဘာ ၁၆ ရက် မနက် ၈နာရီကျော်မှာ အင်အား ၃၀ ကျော်ပါတဲ့ စစ်ကောင်စီတပ်သားတွေက ငါန်းဇွန်မြို့နယ်၊ နတ်ကြီးကျေးရွာကနေ စစ်ကြောင်းထွက်လာချိန် ထနောင်းကုန်းကျေးရွာအနီး ကားလမ်းမပေါ်အရောက်မှာ အသင့်ထောင်ထားတဲ့ ပဒေသာမိုင်း ၁၀ လုံးနဲ့ တိုက်ခိုက်ခဲ့တယ်လို့ ဆိုပါတယ်။  

" မီတာ ၂၀၀အကွာကနေ စောင့်ပြီးတော့ ဖောက်ခွဲတာ။ မိုင်းက ၁၀ လုံးစလုံး မကွဲလိုက်ဘူး။ ၃ကောင်သေတာနဲ့ ၁ ကောင်ဒဏ်ရာရတာကိုတော့ ကျနော်တို့မျက်မြင်ပါပဲ" လို့ ငါန်းဇွန်မြို့နယ် ပြည်သူ့ကာကွယ်ရေးအဖွဲ့မှတာဝန်ရှိသူတဦးက ပြောပါတယ်။ 

ထိခိုက်သေဆုံးမှုတွေနဲ့ပတ်သက်လို့ မြေလတ်အသံက သီးခြားအတည်မပြုနိုင်ပါဘူး။

မိုင်းဆွဲခံရပြီးနောက် စစ်ကောင်စီတပ်သားတွေက ထနောင်းကုန်းကျေးရွာထဲဝင်ရောက်ပြီး အမျိုးသား ၂ ဦးကိုဖမ်းဆီးကာ ရိုက်နှက်စစ်ဆေးခဲ့ပြီးနောက် ပြန်လွှတ်ပေးခဲ့တယ်လို့ သူကဆက်ပြောပါတယ်။

ဒီတိုက်ခိုက်မှုကိုတော့ ငါန်းဇွန်မြို့နယ်ပြည်သူ့ကာကွယ်ရေးအဖွဲ့၊ မြင်းခြံခရိုင်တပ်ရင်း ၇ တပ်ခွဲ ၁၊ ငါန်းဇွန်မီးနဂါးပျောက်ကျားအဖွဲ့၊ TGYR ပျောက်ကျားအဖွဲ့၊ ဒေါင်းဖိုက် တာပျောက်ကျားအဖွဲ့၊ ပြည်တော်ဝင်ပျောက်ကျားအဖွဲ့၊ 925 ပျောက်ကျားအဖွဲ့၊ လက်ရုံးပျောက်ကျားအဖွဲ့၊ ဖက်ဒရယ်ညီအကို ပျောက်ကျားအဖွဲ့၊ ရွှေဂျိုးဖြူပြည်သူ့ကာကွယ်ရေးအဖွဲ့၊ ငန်းနက်ပျောက်ကျားအဖွဲ့၊ အားမာန်သစ်ပျောက်ကျားအဖွဲ့တို့က ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း - ရင်ငြိမ်း

#မြေလတ်အသံ

#နွားထိုးကြီး #ငါန်းဇွန် #စစ်ကောင်စီတပ် #မိုင်းဆွဲခံရ #ထိခိုက်သေဆုံး #သတင်း