ပကဖ ဘဏ္ဍာရေးတာဝန်ခံနဲ့ ရဲဘော်တွေက ပြည်သူ ၃ ဦးကို ဦးခေါင်းကွဲအောင် ရိုက်နှက်မှု ၁ လကြာထိ အရေးယူတာ မရှိဟုဆို

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးရွာက BOC ဆီဆိုင်နားမှာ ဆီဆိုင်ညစောင့်ဝန်ထမ်းတွေကို ဆားလင်းကြီးမြို့နယ်ပကဖ ဘဏ္ဍာရေးတာဝန်ခံနဲ့ ရဲဘော် ၄ ဦးက ဓားအိမ်နဲ့ ဦးခေါင်းကွဲတဲ့အထိ ရိုက်နှက်ခဲ့တဲ့ အမှုဟာ ၁ လကြာတဲ့အထိ အရေးယူပေးတာမျိုး မရှိသေးဘူးလို့ နစ်နာသူတွေဆီက သိရပါတယ်။

နိုဝင်ဘာ ၂၇ ရက် ည ၈ နာရီဝန်းကျင်က ဆီဆိုင်မှာ ညစောင့်တာဝန်ကျတဲ့ အသက် ၂၅ နှစ်အရွယ် ကိုခင်မောင်ထွန်းဟာ လက်ဖက်သုပ်ဝယ်ပြီး ပြန်လာချိန် ဘဏ္ဍာရေးတာဝန်ခံနဲ့ ရဲဘော် ၄ ဦးက ဆိုင်ကယ် ၂ စီးနဲ့ ရောက်လာခဲ့ကာ "ဘယ်ကလဲ၊ ဘယ်သူလဲ၊ ဘယ်သွားမလဲ" မေးမြန်းတာကြောင့် ဆီဆိုင်က ဝန်ထမ်းဖြစ်ကြောင်း ပြန်ဖြေချိန် စတင်ပါးရိုက်ခဲ့တယ်လို့ ဆိုပါတယ်။

အဲ့ဒီနောက် ညောင်ပင်ကြီးရွာမှာရှိတဲ့ ကင်းတဲကို ခဲနဲ့ထုတယ်ဆိုတဲ့ စွဲချက်နဲ့ ကိုခင်မောင်ထွန်းနဲ့ အကိုဖြစ်သူ ကိုသာဖြိုးဝေတို့  ၂ ဦးကို ဆားလင်းကြီးမြို့နယ်ပကဖ ဘဏ္ဍာရေးတာဝန်ခံအပါအဝင် ရဲဘော် ၄ ဦးက ဓားအိမ်ကွဲတဲ့ထိ ဝိုင်းရိုက်ခဲ့ကြတယ်လို့ သိရပါတယ်။

"ပထမ တခါမေးပြီး ဓားအိမ်ကွဲအောင်ရိုက်တယ်၊ တချောင်းကွဲရင် နောက်တချောင်းထပ်ထုတ်ပြီး ရိုက်တယ်။ ဒုတိယတခါ ထပ်မေးပြီး ထပ်ရိုက်တယ်၊ ဓားအိမ်ကွဲပြီး ဓားသွားနဲ့ထိတာရော ပါမယ်ထင်တယ်၊ ကျနော့်ခေါင်းက သွေးတွေစီးကျလာတာပဲ သိတော့တယ်" လို့ အရိုက်ခံခဲ့ရသူတဦးက ပြောပါတယ်။

အဲ့ဒီလို ရိုက်နှက်နေစဥ် အသက် ၄၀ အရွယ် လမ်းသွားလမ်းလာ အမျိုးသား ၁ ဦးကိုလည်း ဘယ်သူဘယ်ဝါ ဖြစ်ကြောင်း ခေါ်ယူမေးမြန်းခဲ့ပြီး ပုလဲမြို့ကနေ ညောင်ပင်ကြီးရွာကို စစ်ရှောင်ရင်း ရောက်နေတဲ့သူဖြစ်ကြောင်း ပြန်ဖြေချိန်မှာတော့ ရဲဘော်တွေက သူတို့ကို အကြောင်းမကြားဘဲ တည်းခိုတယ်ဆိုတဲ့အကြောင်းပြချက်နဲ့ ခြေထောက်နဲ့ကန်ကာ ဓားမပါတဲ့ ဓားအိမ်နဲ့ ရိုက်နှက်ခဲ့ကြပါတယ်။ 

ရိုက်နှက်ခံရတဲ့ဒဏ်ရာတွေကြောင့် ကိုခင်မောင်ထွန်းကတော့ ဦးခေါင်းကို အချက် ၂၀ ချုပ်ခဲ့ရပြီး ကိုသာဖြိုးဝေ ကတော့ ဦးခေါင်းဒဏ်ရာ ၂ ခုကို အချက် ၂၀ ကျော် ချုပ်ခဲ့ရကာ စစ်ရှောင်အမျိုးသားကတော့ ဖူးယောင်ဒဏ်ရာတွေရခဲ့တယ်လို့ ဆိုပါတယ်။

အဲ့ဒီဖြစ်စဥ်နဲ့ ပတ်သက်ပြီး ဆားလင်းကြီးမြို့နယ်ပကဖ ဘဏ္ဍာရေးတာဝန်ခံ ကိုလက်ရာကို မေးမြန်းကြည့်ရာမှာတော့ ဆီဆိုင်ဝန်ထမ်း ၁ ဦးက ညမထွက်ရအမိန့် သတ်မှတ်ချိန်ကိုကျော်လွန်ကာ ရွာထဲမှာ မူးပြီးလျှောက်သွားနေတာကြောင့် မေးမြန်းကြရင်း ရဲဘော်တွေနဲ့ ပြဿနာဖြစ်ကြတာဖြစ်သလို အခင်းနေရာမှာ သူ မပါဝင်ဘူးလို့ ဆိုပါ တယ်။

“ကျနော်နဲ့ ဖြစ်တာပါဆိုပြီးတော့ လောလောဆယ် နာမည်ထွက်နေတာပေါ့၊ ကျနော့်ကိုလည်း စစ်ဒေသထိ တိုင်ထားတာရှိတယ်ဗျ။ (အခင်းဖြစ်ချိန်) မြေပြင်မှာ ကျနော်ရှိ မနေပါဘူး။ ခရိုင်ကရော စစ်ဒေသကရော သတိပေးစာပေါ့နော်၊ ကျနော် report တင်တာတော့ ရှိတယ်၊ ဖြစ်စဥ်ရေးတင်ပေးပါ၊ ဒီအမှုအတွက်တော့ အရေးယူခံရမယ်ပေါ့နော်၊ အခုလောလောဆယ်တော့ မဟုတ်သေးဘူး၊ အဲ့လိုမျိုးတော့ သတိပေးထားတာ ရှိပါတယ်။” လို့ ပကဖ ဘဏ္ဍာရေးတာဝန်ခံ ကိုလက်ရာက ပြောပါတယ်။

လက်ရှိမှာတော့ ရိုက်နှက်မှုမှာ ပါဝင်တဲ့ ရဲဘော်တွေကို (ထိပ်တုံး)ခြောက်ပေါက်ချကာ အရေးယူတာတွေ လုပ်ထားပြီး လက်နက်ကိုင်တွေဖြစ်တဲ့အတွက် စစ်ဒေသက ခေါ်ယူစစ်ဆေးပြီး အရေးယူမှာဖြစ်သလို အဲ့ဒီအရေးယူမှုကို ကျေနပ်မှုမရှိရင် အရပ်ဘက် တရားရေးကနေ ထပ်မံအရေးယူတာမျိုး လုပ်လို့ရတဲ့ စည်းမျဥ်းတွေရှိတယ်လို့ ကိုလက်ရာက ပြောပါတယ်။

နစ်နာသူတွေကတော့ ကင်းတဲကို ခဲနဲ့ ပစ်တာမရှိဘဲ ဆီဆိုင်နားကို ခွေးတွေ အုပ်လိုက်လာလေ့ရှိတာကြောင့် ပစ်ခတ်ခြောက်လှန့်ဖူးတာမျိုးသာရှိကြောင်း၊ အခင်းနေရာမှာ ဆားလင်းကြီးမြို့နယ်ပကဖ ဘဏ္ဍာရေးတာဝန်ခံ ကိုလက်ရာ ကိုယ်တိုင်ရှိနေသလို ရိုက်နှက်ရာမှာလည်း သူကိုယ်တိုင် ပါဝင်တယ်လို့ ပြောဆိုပါတယ်။

ဆားလင်းကြီးမြို့နယ် ပလဖ တာဝန်ရှိသူ ၁ ဦးကို အမှုအခြေအနေနဲ့ပတ်သက်ပြီး မေးမြန်းကြည့်ရာမှာတော့ အမှုကိုစစ်ဆေးဆောင်ရွက်နေဆဲဖြစ်ပြီး နစ်နာသူတွေဘက်က စစ်ချက်နဲ့ မှတ်တမ်းသက်သေတွေ ရယူထားကာ ကျူးလွန်သူတွေကိုလည်း ခေါ်ထားသလို အမှုတည်ဆောက်ကာ တရားရုံးကို တင်ပေးဖို့ လုပ်ဆောင်နေတယ်လို့ ဆိုပါတယ်။

အဲ့ဒီ ဖြစ်စဥ်နဲ့ပတ်သက်ပြီး ဒီဇင်ဘာ ၅ ရက်က ဆားလင်းကြီးမြို့နယ် ပကဖရုံး၊ ပအဖရုံး၊ ပလဖရုံးနဲ့  NUG ရဲ့ တိုင်ကြားမှုရေးရာကော်မတီရုံးတွေကို တိုင်စာပို့ထားပေမယ့် ဒီကနေ့အထိ ကျူးလွန်သူတွေကို ခေါ်ယူစစ်ဆေးတာ၊ အရေးယူဆောင်ရွက်တာတွေ လုပ်မပေးသေးဘူးလို့ တိုင်ကြားရာမှာ ကူညီဆောင်ရွက်နေသူတဦးဆီက သိရပါတယ်။

သတင်း - အန္ဓ၊ စာတည်း - JCG

#မြေလတ်အသံ

#စစ်ကိုင်း #ဆားလင်းကြီး #ညောင်ပင်ကြီးရွာ #ပကဖ #ရိုက်နှက်မှု