ပခုက္ကူ - ကမ္မလမ်းပေါ်က စစ်ကောင်စီနဲ့ပျူစောထီးဂိတ် တိုက်ခိုက်ခံရပြီး ပျူစောထီး ၂ ဦးဒဏ်ရာရ (ရုပ်/သံ)

မကွေးတိုင်း၊ ပခုက္ကူခရိုင်၊ ပခုက္ကူမြို့နယ်၊ ညောင်ဂျစ်ပင်ရွာ၊ ပခုက္ကူ-ကမ္မလမ်းပေါ်က စစ်ကောင်စီနဲ့ ပျူစောထီးဂိတ်ကို ဒေသခံကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့ပြီး ပျူစောထီး အမျိုးသား ၁ ဦးနဲ့ အမျိုးသမီး ၁ ဦး ဒဏ်ရာရခဲ့တယ်လို့ Earthquake People Defence Force ဆီက သိရပါတယ်။

စစ်ကောင်စီတပ်ဖွဲ့ဝင်နဲ့ ပျူစောထီး အင်အား ၁၅ ဦးခန့်ရှိတဲ့စစ်ဆေးရေးဂိတ်ကို မတ် ၆ ရက် မနက် ၉ နာရီခွဲဝန်းကျင်မှာ တိုက်ခိုက်ခဲ့ကြတာလို့ ဆိုပါတယ်။

အပြန်အလှန်ပစ်ခတ်မှု ၁၅ မိနစ်ခန့်ကြာမြင့်ခဲ့ပြီး ပျူစောထီးအမျိုးသား ၁ ဦးနဲ့ ပျူစောထီးအမျိုးသမီး ၁ ဦးဒဏ်ရာရသွားတယ်လို့ Earthquake People Defence Force သတင်းနှင့်ပြန်ကြားရေးတာဝန်ခံ ကိုအရှည်ကြီးက ပြောပါတယ်။

"သူတို့က ညောင်ဂျစ်ပင်ရွာ ဘုန်းကြီးကျောင်းထဲမှာ အထိုင်ချထားတာ။ ရှေ့မှာကတော့ ဂိတ်ရှိတယ်။ ဘုန်းကြီးကျောင်းထဲကနေ ရွာထဲကို ရိက္ခာထွက်ရှာတဲ့ ပုံစံပါ။ အမျိုးသမီး ၁ ဦးလည်းပါတယ်။ ကျနော်တို့အဖွဲ့တွေနဲ့ ထိတွေ့မှုဖြစ်တာ၊ သူတို့လမ်းပေါ်တက်ပြီး ကုန်ကားတွေကို တားတဲ့အချိန်မှာ ပစ်ခတ်မှုဖြစ်တာ၊ ပျူစောထီး အမျိုးသား ၁ ဦးနဲ့ အမျိုးသမီး ၁ ဦး ဒဏ်ရာရတယ်။"လို့  ကိုအရှည်ကြီးက ပြောပါတယ်။

ပစ်ခတ်မှုဖြစ်ပြီးနောက် စစ်ဆေးရေးလုပ်နေတဲ့ စစ်ကောင်စီနဲ့ပျူစောထီးတွေဟာ ညောင်ဂျစ်ပင်ရွာ ဘုန်းကြီးကျောင်းအထဲကို ပြန်သွားကြပြီး အနီးပတ်ဝန်းကျင်ရွာတွေကို လက်နက်ကြီးတွေနဲ့ လှမ်းပစ်တယ်လို့ ဆက်ပြောပါတယ်။

"၁၅ ဦးလောက်ရှိတယ်၊ လက်နက်ကိုင်က ၁၀ ဦးလောက်ပါတယ်၊ လက်နက်မပါတာက ၅ ဦးပါတယ်။ ပစ်ခတ်ခဲ့တာက ၁၅ မိနစ်လောက်ပဲကြာမယ်။ ကျနော်တို့နဲ့ သူတို့လမ်းပေါ်မှာ ပစ်ခတ်မှုဖြစ်တဲ့အချိန် ဂိတ်ကနေ လှမ်းပစ်ကြတယ်။ သူတို့က လမ်းရဲ့မြောက်ဘက်အခြမ်းကပစ်ပြီး ကျနော်တို့က လမ်းရဲ့တောင်ဘက်အခြမ်းက ပစ်ကြတာ။"လို့ သူက ဆက်ပြောပါတယ်။

အဆိုပါ စစ်ကောင်စီတပ်ဖွဲ့တွေနဲ့ပျူစောထီးတွေဟာညောင်ဂျစ်ပင်ရွာ ဘုန်းကြီးကျောင်းမှာအထိုင်ချကာဘုန်းကြီးရှေ့မှာ ဂိတ်ချပြီးခရီးသွားကားတွေကို ဆက်ကြေးကောက်နေတဲ့ဂိတ် ဖြစ်တယ်လို့ ဆိုပါတယ်။ 

ဒီတိုက်ခိုက်မှုကို Earthquake People Defence၊ Thurain TR၊ Hunter Pakokku၊ Six Senses Guerrilla Force၊ Justice Revolution Force၊ Black Cheater နှင့် မြိုင် ပကဖ(ကိုနှင်းဂွေး) တို့က ပူးပေါင်းလုပ်ဆောင်ခဲ့တာလို့ သိရပါတယ်။

တည်းဖြတ် - HP

#မြေလတ်အသံ

#ပခုက္ကူ #ညောင်ဂျစ်ပင် #ပျူစောထီး #ဂိတ် #တိုက်ပွဲ

နောက်ဆုံးရ သတင်းများ

01
02
03
04
05
06
07
08
09
10