ပင့်သာရွာကို စစ်ကောင်စီမီးရှို့ပြီး ရွာထဲမှာတပ်စွဲထား

စစ်ကိုင်းတိုင်း၊ ကန့်ဘလူမြို့နယ်၊ ပင့်သာ(တည်ပင်)ကျေးရွာကို စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ဝင်ရောက်မီးရှို့ပြီး ရွာထဲမှာတပ်စွဲထားတယ်လို့ ကန့်ဘလူမြို့နယ် ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံဆီက သိရပါတယ်။ 

ကျွန်လှမြို့နယ်၊ တောင်ယာဆိပ်ကျေးရွာကထွက်လာတဲ့ စစ်ကောင်စီတပ်ဖွဲ့ဝင်တွေနဲ့ပျူစောထီး အင်အား ၁၀၀ ကျော်ပါစစ်ကြောင်းက ဇန်နဝါီရီ ၁၁ ရက် မနေ့ညနေ ၄ နာရီလောက်မှာ ရွာထဲကို စတင်ဝင်ရောက်လာပြီး မီးရှို့ခဲ့တာပါ။ 

“မကျီးကုန်း၊ တောင်ယာဆိပ်ဘက်ကို ဖြန့်ကျက်ထားတဲ့ အင်အားတွေကနေ ပင့်သာဘက်ခြမ်းကို နယ်မြေဆက်တိုးလာပြီးတော့ လက်ကျန် ကျန်နေတဲ့ ပင့်သာရွာထဲက အိမ်လေးတွေကို မီးရှို့တာ။ သူတို့ရွာကို ဝင်ချိန်ကျနော်တို့ ဒီဘက်ကထောင်ထားတဲ့ မိုင်းတွေမိပြီးတော့ သေတာ၊ ဒဏ်ရာရတာ ရှိသေးတယ်။"လို့ ကန့်ဘလူမြို့နယ်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောပါတယ်။

ရွာထဲကိုမဝင်ခင် ညနေ ၃ နာရီကျော်လောက်မှာ စစ်ကောင်စီတပ်ဖွဲ့ဝင်တွေက ကျေးရွာပြည်သူ့ ကာကွယ်ရေးတပ်ဖွဲ့ဝင်တွေ ထောင်ထားတဲ့ မိုင်းတွေနင်းမိပြီးနောက် နှစ်ဖက်အပြန်အလှန် ပစ်ခတ်မှုဖြစ်ခဲ့သေးတယ်လို့ ဆိုပါတယ်။ 

"ကျနော်တို့ ကာကွယ်ရေးအဖွဲ့တွေဘက်က ကင်းထိုးထားတာကို သူတို့ဘက်က မြင်ပြီးပစ်တယ်။ ထိတွေ့မှုကို မိနစ်ပိုင်းလောက်ဖြစ်သွားတယ်။ ရွာထဲအဝင်လမ်းတွေမှာ မိုင်းတွေကာထားတာကို သူတို့ဝင်လာချိန်မှာထိတာ။"လို့ ကန့်ဘလူမြို့နယ်ပကဖ ပြန်ကြားရေးတာဝန်ခံက ပြောပါတယ်။

ထိတွေ့ပစ်ခတ်မှုဖြစ်ချိန် ကျေးရွာကာကွယ်ရေးတပ်ဖွဲ့ဝင် ၁ ဦး မစိုးရိမ်ဒဏ်ရာရပြီး မိုင်းထိဒဏ်ကြောင့် စစ်ကောင်စီတပ်ဖွဲ့ဝင် ၁ ဦးသေပြီး ၂ ဦးဒဏ်ရာရတယ်လို့ ဆိုပါတယ်။

ဇန်နဝါရီ ၁၂ ရက် ဒီနေ့လယ်ပိုင်းထိ စစ်ကောင်စီတပ်ဖွဲ့ဝင်တွေနဲ့ပျူစောထီးတွေက ရွာထဲမှာရှိနေတဲ့အတွက် မီးလောင်ပျက်စီးသွားတဲ့ အိမ်ခြေအရေအတွက်ကို အတည်မပြုနိုင်သေးဘူးလို့ ကန့်ဘလူမြို့နယ်ပကဖ ပြန်ကြားရေးတာဝန်ခံက ပြောပါတယ်။

စစ်ကောင်စီစစ်ကြောင်း ကျွန်းလှမြို့နယ်ထဲကို ရောက်ရှိနေတယ်လို့ သတင်းကြားတာကြောင့် တော်လှန်ရေးအဖွဲ့တွေဘက်က ပင့်သာရွာကဒေသခံတွေကို ပြီးခဲ့တဲ့ ဒီဇင်ဘာလထဲမှာကတည်းက ကြိုတင်ရှောင်ခိုင်းထားတဲ့အတွက် စစ်ကြောင်းဝင်လာချိန်မှာတော့ ရွာခံတွေကျေးရွာထဲမှ မရှိကြဘူးလို့ ဆိုပါတယ်။ 

ပင့်သာကျေးရွာဟာ အိမ်ခြေ ၂၀၀ ကျော်ရှိတဲ့ကျေးရွာဖြစ်ပြီး စစ်အာဏာသိမ်းပြီးနောက်ပိုင်း ၂၀၂၂ ခုနှစ်လောက်ကတည်းကစတင်ကာ စစ်ကောင်စီစစ်ကြောင်းတွေ ၇ ကြိမ်ထက်မနည်း ဝင်ရောက်ပြီး မီးရှို့တာကြောင့် စုစုပေါင်း အိမ်ခြေ ၁၄၀ ခန့် မီးလောင်ပျက်စီးထားတယ်လို့ ကန့်ဘလူမြို့နယ်ပကဖ ဆီက သိရပါတယ်။

ပုံစာ - ၂၀၂၃ ခုနှစ်၊ ဇွန်လ ၂၈ ရက်မနက်ပိုင်းတွင် ပင့်သာကျေးရွာကို စစ်ကောင်စီတပ်ဖွဲ့ဝင်များက ၅ ကြိမ်မြောက် မီးဝင်ရှို့နေစဉ်။

စာတည်း - လင်း 

#မြေလတ်အသံ

#ကန့်ဘလူ #ပင့်သာရွာ #စစ်ကောင်စီ #မီးရှို့