Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
ပဇီကြီးကို လေကြောင်းနဲ့ ထပ်လာပစ်လို့ ကယ်ဆယ်ရေးရပ်နားထားရပြီး ဒဏ်ရာရကလေး ၁၀ ယောက်ထပ်သေဆုံး
စစ်ကိုင်းတိုင်း၊ ကန့်ဘလူခရိုင်၊ ပဇီကြီးရွာလေကြောင်းပစ်ခတ်မှုကြောင့် သေဆုံးတဲ့ရုပ်အလောင်းတွေကို ကောက်ယူကယ်ဆယ်နေချိန် စစ်ကောင်စီက လေကြောင်းနဲ့ ထပ်မံ လာရောက်ပစ်ခတ်တာကြောင့် ကယ်ဆယ်ရေးလုပ်ငန်းတွေ လုံးဝရပ်နားထားလိုက်ရပါတယ်လို့ သိရပါတယ်။
ဧပြီလ ၁၁ ရက် ဒီကနေ့ ညနေ ၅ နာရီခွဲက ကာကွယ်ရေးအဖွဲ့အစည်းတွေက ကယ်ဆယ်ရေးတွေလုပ်၊ အလောင်းတွေသယ်နေချိန် Mi-35 နဲ့ ၁၀ မိနစ်ခန့် လာရောက်ပစ်ခတ်သွားတာဖြစ်ပါတယ်။
ပထမတကြိမ် လေကြောင်းပစ်ခတ်မှုကြောင့် သေဆုံးပြည်သူတွေထဲမှာ ၂ နှစ်ခွဲဝန်းကျင် ကလေးအပါအဝင် ၈ ဦးကျော် သေဆုံးခဲ့ပြီး ညနေပိုင်းမှာတော့ ဆေးရုံမှာ ကုသနေတဲ့ ကလေးတွေထဲက ၁၀ ဦးကျော် ထပ်မံသေဆုံးခဲ့တယ်လို့ သိရပါတယ်။
“အခု ဆက်သွယ်လာချက်အရ ဆေးရုံမှာဆုံးတာ ၁၀ ယောက်ကျော်သွားပြီ။ ကျနော်တို့ကယ်တာနဲ့ဆို ခန့်မှန်းခြေ ၂၀ ကျော် ၃၀ နီးပါးကပ်မှာပဲ။ နောက်ထပ် ဒဏ်ရာရထားတဲ့ ကလေးလေးတွေရှိသေးတယ်။ အရွယ်ကတော့ စုံတယ်။ ၅ နှစ်ကျော်တွေလည်းပါတယ်။ တချို့ကလေးတွေကျ ဘာမှကိုပဲ အသက်တွက်လို့မရအောင် ခန္ဓာကိုယ်က တပိုင်းစီဖြစ်နေတာ၊ ခြေထောက်ကလေးတွေကြည့်ပြီး ကလေးလို့ သတ်မှတ်ရတာ" လို့ မြေပြင်မှာသွားရောက် ကယ်ဆယ်ပေးခဲ့တဲ့ ရဲဘော်တဦးက ပြောပါတယ်။
အခင်းဖြစ်တဲ့နေရာမှာ အလောင်းတော်တော်များများ ကျန်သေးပေမယ့် လေယာဉ်နဲ့ လာရောက်ပစ်ခတ်နေတာကြောင့် ဒီနေ့အတွက် ကယ်ဆယ်ရေးတွေ နားလိုက်ပြီလို့ သူကဆိုပါတယ်။
စစ်ကိုင်းတိုင်း၊ ကန့်ဘလူခရိုင်၊ ပဇီကြီးရွာမှာ ဒီကနေ့မနက် ၇ နာရီက စစ်ကောင်စီက လေကြောင်းနဲ့ လာရောက်ပစ်ခတ်လို့ ဒေသခံ ၁၀၀ နီးပါးသေဆုံးမှုဖြစ်ခဲ့ပြီး၊ ညနေပိုင်းမှာတော့ Mi35 နဲ့ လာရောက်ပစ်ခတ်သွားတာ ဖြစ်ပါတယ်။