ပေါ်တာဆွဲခံရပြီး စစ်ကောင်စီတပ်သားသစ်ဖြစ်လာသူ ၄ ဦးကို မြိုင်မှာဖမ်းမိ

မကွေးတိုင်း၊ မြိုင်မြို့မှာရောက်နေတဲ့ စစ်ကြောင်းကနေထွက်လာသူ စစ်ကောင်စီတပ်ဖွဲ့ဝင် ၄ ဦးကို ဇန်နဝါရီ ၁၁ ရက်မနက် ၈ နာရီခွဲမှာဖမ်းမိခဲ့တယ်လို့ ပခုက္ကူခရိုင် အမှတ် ၁၅ တပ်ရင်း ကျားသစ်နက် တပ်မတော်ဆီက သိရပါတယ်။

ဇန်နဝါရီ ၉ ရက်မှာမြိုင်မြို့ကိုရောက်ရှိလာတဲ့ စစ်ကောင်စီစစ်ကြောင်းအခြေအနေကိုစောင့်ကြည့်ဖို့ ဒေသခံကာကွယ်ရေးတပ်ဖွဲ့ဝင်တွေ ကင်းပုန်းဝပ်ထားချိန်မှာဖမ်းမိခဲ့တာလို့ ဆိုပါတယ်။ 

“ဖမ်းဆီးရမိတာက မနေ့ကပါ၊ မြိုင်နယ်မှာ တမြန်နေ့ကတည်းကရောက်တဲ့စစ်ကြောင်းကို ကျနော်တို့ မနေ့ကသွားကပ်တဲ့အချိန်မှာ သူတို့ ၄ ဦးက ဈေးဝယ်ဆိုပြီးပြောထွက်လာကြတာ၊ ကျနော်တို့ ရှေ့ကင်းပုန်းကနေ အနီးကပ်ဖမ်းဆီးခဲ့တာ၊ ၂၅၉ စစ်ကြောင်းကနေ ပါလာတာပါ၊ အပြန်အလှန်ပစ်ခတ်မှု ကျနော်တို့ မဖြစ်ခဲ့ပါဘူး၊” လို့ ပခုက္ကူခရိုင် အမှတ် ၁၅ တပ်ရင်း ကျားသစ်နက်တပ်မတော် ဒုတပ်ရင်းမှူး က ပြောပါတယ်။

အဆိုပါစစ်ကောင်စီတပ်သား ၄ ဦးဟာ မြိုင်မြို့ပေါ်ရှိဆေးရုံကနေ စျေးဝယ်ဖို့ထွက်လာချိန်ဖမ်းဆီးခံလိုက်ရတာဖြစ်ပြီး ဖမ်းမိချိန်မှာ လက်နက်ခဲယမ်းတွေလည်းမပါလာဘူးလို့ ဆိုပါတယ်။ 

ဖမ်းမိသူ ၄ ဦးဟာ ပေါ်တာဆွဲခံရပြီးစစ်သင်တန်းတက်ရောက်ခဲ့ရသူတွေဖြစ်ကာ သင်တန်းဆင်းပြီးနောက် ပခုက္ကူမြို့အခြေစိုက် ခလရ ၂၅၉ ကိုပို့ဆောင်ခံခဲ့ရတာဖြစ်ပြီး အဲ့ဒီကနေမှ မြိုင်မြို့နယ်ကို စစ်ကြောင်းနဲ့အတူပါလာသူတွေဖြစ်ကြောင်း ဒုတပ်ရင်းမှူးက ဆက်ပြောပါတယ်။

“သူတို့ ၄ ဦးရဲ့ ဖြေဆိုချက်တွေအရ သူတို့က ပေါ်တာအဆွဲခံရတဲ့အထဲမှာပါတာ၊ သူတို့ သင်တန်းဆင်းခဲ့တာ ၃ လရှိပြီလို့ ပြောတယ်၊ သူတို့က ဒေသအသီးသီးကပါ၊ ၁ ဦးက နေပြည်တော်က၊ ၁ ဦးက ဧရာဝတီတိုင်း၊ ၄ ဦး ၄ နေရာကနေ ပေါ်တာအဆွဲခံရတာ” လို့ သူကပြောပါတယ်။ 

ပခုက္ကူခရိုင် အမှတ် ၁၅ တပ်ရင်း ကျားသစ်နက်တပ်မတော်နဲ့အတူ လင်းမြွေအဖွဲ့၊ ဆင်ရိုင်းအဖွဲ့၊ နဂါးနီအဖွဲ့တို့က ပူးပေါင်းဖမ်းဆီးခဲ့တာဖြစ်ပြီး လက်ရှိမှာတော့ ၄ ဦးစလုံးကို လုံခြုံတဲ့နေရာကို ပို့ဆောင်ကာ စားဝတ်နေရေးကအစ စောင့်ရှောက်ပေးထားတယ်လို့ သိရပါတယ်။ 

စာတည်း - လင်း 

#မြေလတ်အသံ

#မကွေး #မြိုင် #စစ်ကောင်စီတပ်သား #ဖမ်းမိ