ဖြူးတိုက်ပွဲ စစ်ကောင်စီဘက်က ၁၇ ဦးကျော်သေ၊ ၂၀ ကျော် ဒဏ်ရာရ

ပဲခူးတိုင်းဒေသကြီး၊ ဖြူးမြို့နယ်၊ ကျော်လှကြီးရွာနဲ့ ဆိတ်ထူးခင်ကျေးရွာအနီးတွေမှာ စစ်ကြောင်းထိုးလာတဲ့ စစ်ကောင်စီတပ်နဲ့ KNLA ပူးပေါင်းတပ်တွေအကြား တိုက်ပွဲဖြစ်ပွားကာ စစ်ကောင်စီဘက်က ၁၇ ဦးထက်မနည်း သေဆုံးပြီး ၂၀ ကျော်ဒဏ်ရာရခဲ့တယ်လို့ တောင်ပိုင်းတိုင်း အမှတ် ၂ စစ်ဒေသခွဲပြန်ကြားရေးထံက သိရပါတယ်။

နိုဝင်ဘာ ၃၀ ရက် မနက် အစောပိုင်းကစပြီး အင်အား ၁၂၀ ကျော်နဲ့  စစ်ကြောင်းထိုးလာတဲ့  စစ်ကောင်စီတပ်ဖွဲ့ နဲ့ KNLA ပူးပေါင်းတပ်တွေဟာ မနက်ပိုင်းမှာ ကျော်လှရွာ၊ ညနေကနေ ညပိုင်းထိ ဆိတ်ဖူးခင်ရွာတွေမှာ တနေကုန် နီးပါးတိုက်ပွဲဖြစ်ခဲ့တယ်လို့ ဆိုပါတယ်။

" G 1 အဆင့်ဦးစီးပြီးလာတဲ့ စစ်ကြောင်းနဲ့ တနေကုန်နီးပါး တိုက်ပွဲဖြစ်တာ။ စကစဘက်ကတော့ လေကြောင်းပစ်ကူ အသားကုန်သုံးသွားတာ။ ဒါကြောင့် အလောင်းလက်နက် ကောက်မရလိုက်ဘူး" လို့ တောင်ပိုင်းတိုင်း အမှတ် ၂ စစ်ဒေသခွဲ ပြန်ကြားရေးတာဝန်ခံ ကိုစောဒိုရှင်းက ပြောပါတယ်။

တိုက်ပွဲအတွင်းမှာ စစ်ကောင်စီဘက်က ၁၇ ဦးထက်မနည်းသေဆုံးသွားသလို ၂၀ ကျော်ဒဏ်ရာရသွားတယ်လို့ ဒေသခံတွေပေးပို့တဲ့ သတင်းနဲ့ မြေပြင်တိုက်ခိုက်ရေးရဲဘော်တွေရဲ့ အတည်ပြုချက်အရ သိရတယ်လို့ ဆိုပါတယ်။

တိုက်ပွဲအတွင်းမှာ စစ်ကောင်စီဘက်က Mi-35 နဲ့ ၅ ကြိမ်၊ ဂျက်တိုက်လေယာဥ်နဲ့ ၁၅ ကြိမ် ဗုံးကြဲတာ၊ စက်သေနတ်တွေနဲ့ ပစ်ခတ်တာတွေလုပ်ခဲ့တယ်လို့ သိရပါတယ်။

စစ်ကောင်စီဘက်က  လေကြောင်းနဲ့ ဘန်းလောင်၊ မန်ကျည်းကုန်း၊ ကျော်လှ၊ ရေတွင်းကုန်းကြီး၊ ရေတွင်းကုန်း၊ ဇဟာကြီး၊ ဇဟားလေး၊ ကမလင်းကုန်း(တောင်/မြောက်)၊ လှသင်းမောင်၊ လယ်ပြင်လေးကုန်းနဲ့ သပြေခင်ကျေးရွာတွေကို လှည့်ပတ်ပစ်သွားလို့ ဒေသခံထောင်ချီ ထွက်ပြေးနေရပါတယ်။

တိုက်ပွဲဖြစ်ပွားနေစဥ်အတွင်း ခမရ ၄၃၉၊ ခမရ ၅၉၉၊ ခမရ ၃၀၇ တပ်တွေက လက်နက်ကြီးတွေနဲ့ ပစ်ခတ်ခဲ့တာကြောင့် ငှက်ပျောတောရွာက စောလာပွယ် ၄၈ နှစ်၊ လက်ပံတန်းကျေးရွာက ဘမလက်ဝေ ၂၈ နှစ်၊ ဘန်လောင်ရွာက ကိုဇင်လင်းဦး ၂၈  နှစ်၊ နတ်လောင်ကျေးရွာက မအလင်္ကာ ၃ နှစ်၊ ဒေါထူး ၅ နှစ်၊ ဦးကံထူး ၅၈ နှစ်တို့ ဒဏ်ရာရခဲ့ပါတယ်။

စစ်ကောင်စီတပ်ကို ကရင်အမျိုးသားလွတ်မြောက်ရေးတပ်မတော် (KNLA)၊ ရိုးမစစ်ကြောင်း ၁၊ ရိုးမ စစ်ကြောင်း ၅ နှင့် Royal Peacock Column ပူးပေါင်းတပ်ဖွဲ့တွေက တိုက်ခိုက်ခဲ့တာပါ။

နိုဝင်ဘာ ၂၄ ရက်က ဖြူးမြို့နယ်၊ ဇဟားလေး၊ ရေတွင်းကုန်း၊ ငှက်ပျောတော၊ ကိုင်းတဲစုကျေးရွာတွေမှာ လေယာဥ်နဲ့ပစ်ခံရလို့ ပြည်သူ ၂ ဦးသေပြီး ၅ ဦး ဒဏ်ရာရတယ်လို့ သိရပါတယ်။

စာတည်း - လင်းဇေ

#မြေလတ်အသံ

#ပဲခူးတိုင်း #ဖြူးမြို့နယ် #ကျော်လှကြီးရွာ #ဆိတ်ထူးခင်ကျေးရွာ #စစ်ကြောင်း #စစ်ကောင်စီတပ် #KNLA #သတင်း #မြေလတ်သတင်း