မင်းဘူးခရိုင်မှာ နေအိမ် ၂၀၀ နီးပါးကို စစ်တပ်က စစ်ကြောင်းထိုးမီးရှို့ခဲ့လို့ စစ်ရှောင်နေရတဲ့ ၄,၀၀၀ ကျော် စောင်၊ အနွေးထည် အကူအညီတွေ လိုအပ်နေ

မကွေးတိုင်း၊ မင်းဘူးခရိုင်၊ စေတုတ္တရာနဲ့ ပွင့်ဖြူမြို့နယ်တွေက ကျေးရွာ ၅ ရွာကို နိုဝင်ဘာ ၂၈ ရက်မှာ စစ်ကောင်စီတပ်က စစ်ကြောင်းထိုးဝင်ရောက်မီးရှို့သွားတာကြောင့် နေအိမ် ၂၀၀ နီးပါး မီးလောင်ပျက်စီးခဲ့ပြီး စစ်ရှောင်ဒေသခံ ၄,၀၀၀ ကျော် အကူအညီလိုအပ်နေတယ်လို့ ဒေသခံတွေနဲ့ ကာကွယ်ရေးအဖွဲ့တွေထံက သိရပါတယ်။

စေတုတ္တရာမြို့နယ် ကျောက်ပုံရွာ၊ ခဲပစ်ရွာ ၊ ညောင်ကုန်းရွာနဲ့ ပွင့်ဖြူမြို့နယ် ကျွဲခြံရွာ၊ လယ်မရွာတွေကို စစ်ကြောင်းထိုးဝင်ရောက်ခဲ့ပြီးနောက် လယ်မရွာက နေအိမ် ၁၇၉ လုံး၊ ကျောက်ပုံရွာနဲ့ ခဲပစ်ရွာက ၁၅ လုံး၊ စုစုပေါင်း နေအိမ် ၁၉၄ လုံးကို မီးရှို့သွားခဲ့တာလို့ ဆိုပါတယ်။

“ သေနတ်တွေနဲ့ပစ်ပြီး **တွေ(ဆဲဆိုပြီး) သတ္တိရှိတဲ့လူထွက်ခဲ့ဆိုပြီး ဝင်လာတော့ ကျမတို့မှာ ချောက်ကြိုချောက်ကြားတွေကနေ ပြေးရတာ၊ ကျောက်ပုံရွာကနေ ပြေးရတာပါ။” လို့ ကျောက်ပုံရွာခံ စစ်ဘေးရှောင် အမျိုးသမီးတဦးက မြေလတ်အသံကို ပြောပါတယ်။

နိုဝင်ဘာ ၂၈ ရက်မှာ ကပစ ၂၀ ၊ ခလရ ၂၅၃ ၊ ခလရ ၂၅၄ ၊ ခလရ ၂၅၅ ၊ ဆင်လူးရွာကပျူစောထီးတပ်ဖွဲ့ ၊ တပ်မ ၈၈ ပူးပေါင်းစစ်ကောင်စီတပ်သား အင်အား ၅၀၀ ခန့်နဲ့ စစ်ကြောင်း ၂ ကြောင်းခွဲထိုးပြီး နေအိမ်တွေကို မီးရှို့ခဲ့တာ လို့ သိရပါတယ်။

စစ်ကြောင်းထိုးလာလို့ အဆိုပါကျေးရွာ ၅ ရွာက ဒေသခံ ၄,၀၀၀ ကျော် အရေးပေါ်စစ်ရှောင်နေရပြီး နေထိုင်စားသောက်ရေးအတွက် အကူအညီတွေလိုအပ်နေတယ်လို့ စစ်ဘေးရှောင်တွေကိုကူညီပေးနေတဲ့ မင်းဘူးခရိုင်အမှတ် ၄ တပ်ရင်းတာဝန်ခံက ပြောပါတယ်။

“ ဆောင်းတွင်းကာလဖြစ်တဲ့အတွက် တောထဲတောင်ထဲမှာ ဖြစ်သလိုနေရတာကြောင့် ဖျားနာတဲ့သူတွေများပါတယ်။ လယ်မရွာမှာ ပိတ်မိပြီးမပြေးနိုင်တဲ့ အဖိုးအို ၁ ဦးလည်း မီးလောင်ဒဏ်ရာရရှိထားပါတယ်။ အဲ့ဒီအဖိုးအိုကိုလည်း ဆေးဝါးကုသမှုပေးနေပါတယ်။” လို့ အထက်ပါတာဝန်ခံက ပြောပါတယ်။

လက်ရှိမှာ စစ်ဘေးရှောင်တွေအနေနဲ့ ကွင်းပြင်တွေမှာ မိုးကာတဲထိုးနေထိုင်နေကြရပြီး စားနပ်ရိက္ခာ ဆေးဝါး၊ စောင်နဲ့ အနွေးထည်တွေလိုအပ်နေတယ်လို့ ဆိုပါတယ်။

“ ဖျားကြနာကြပြီး ဗိုက်အောင့်တာတွေလည်း ရှိကြတယ်။ အသက်ကြီးရွယ်အိုတွေကျတော့ ပြေးရလွှားရတော့ မောတာတွေရှိတယ်။ အသက် ၇၀ အရွယ်တွေလည်း များတယ်၊ အသက် ၉၀ ကျော်တွေလည်းပါတယ်။” လို့ ကျောက်ပုံရွာစစ်ဘေးရှောင်အမျိုးသမီးက ပြောပါတယ်။

စာတည်း - ဟိန်းစံ

#မြေလတ်အသံ

#မင်းဘူး #စစ်တပ် #မီးရှို့ #စစ်ဘေးရှောင်