မင်းဘူးမြို့နယ်ထဲမှာ လေပြင်းထိလို့ နေအိမ် ၁၂၂ လုံးပျက်စီး

"ဖြစ်ချိန်ခါက လေတွေပဲ အရင်တိုက်လာတာ။ ပြီးမှ မိုးပါ ပါလာတာ။ မြို့ပေါ်ရပ်ကွက်တွေမှာလည်း တော်တော်လေး ပျက်စီးတာတွေရှိတယ်။ ကျနော်တို့ ရုံးလည်း လေပြင်းတိုက်တဲ့အထဲ ပါသွားလို့ ပြိုကျသွားတယ်။ ရွာတွေဘက်မှာလည်း တော်တော်လေး ပျက်စီးသွားတယ်လို့လည်း သိရတယ်" လို့ ပြောပါတယ်။

လေပြင်းထိလို့ မင်းဘူးမြို့ ၁၊ ၃၊ ၄ ရပ်ကွက်တွေက အိမ်ခြေ ၂၀ လုံး အမိုးလန်ပျက်စီးခဲ့ပြီး၊ ချောင်းဖြူ၊ ကျောက်တန်း၊ ဇရပ်ကြီး၊ ထုံးမကြီး၊ ရွှေရောင်တော်၊ ပေါက်ပင်ကွင်း၊ မန်းကောက်၊ သီးကုန်း၊ ဖလံရုံ၊ ပုဂံစစ်၊ ကျွန်းပြား၊ စကု ၂၊ ဓါတ်ကုန်းကျေးရွာတွေက နေအိမ် ၁၀၂ လုံး၊ ဘုန်းတောင်ကြီးကျောင်း ၄ ကျောင်း၊ စာသင်ကျောင်း ၁ ကျောင်း၊ ဘုရားစေတီတဆူ ထိခိုက်ပျက်စီးခဲ့တာပါ။

လေပြင်းတိုက်ခတ်မှုကြောင့် လူထိခိုက်သေဆုံးဒဏ်ရာရတာတွေမရှိဘဲ လေဘေးသင့်ပြည်သူ ၄၇၀ ကျော်ဟာ မိမိတို့ရဲ့နေအိမ်တွေမှာပဲ ပြန်လည်ပြင်ဆင်ပြီး ဆက်လက်နေထိုင်နေရတယ်လို့ ဆိုပါတယ်။

၂၀၂၂ ခုနှစ်၊ ဧပြီလ ၂၀ ရက် ညနေပိုင်းကလည်း မင်းဘူးမြို့နယ်မှာ လေပြင်းတိုက်ခိုက်လို့ နေအိမ် ၅၀ ကျော် ပျက်စီးခဲ့ပါသေးတယ်။

စာတည်း - လင်း
#မြေလတ်အသံ