မတ္တရာမြို့နယ်၊ အောင်ကန်သာကျေးရွာက လက်ဖက်ရည်ဆိုင်ကို စစ်တပ်ဝင်ပစ်လို့ ပြည်သူ ၁၃ ဦးသေဆုံး

မန္တလေးတိုင်း၊ မတ္တရာမြို့နယ်က အောင်ကန်သာကျေးရွာကို ဒီနေ့မနက်ပိုင်းမှာ စစ်ကားရောက်လာပြီး ရုတ်တရက် လက်ဖက်ရည်ဆိုင်အတွင်း ဝင်ရောက်ပစ်ခတ်ခဲ့တာကြောင့် လက်ဖက်ရည်ဆိုင်ပိုင်ရှင် အပါအဝင် ပြည်သူ ၁၃ ဦး သေဆုံးခဲ့တယ်လို့ မတ္တရာမြို့နယ်၊ ပြည်သူ့ကာကွယ်ရေးတပ်ဖွဲ့ (ပကဖ) ဆီက သိရပါတယ်။ 

နိုဝင်ဘာလ ၁၆ ရက် ဒီနေ့မနက် ၆ နာရီလောက်က မတ္တရာမြို့နယ်၊ ပတ်လည်အင်းကျေးရွာမှာ တပ်ဆွဲထားတဲ့စစ်ကောင်စီတပ်ကို တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ခဲ့ရာ မတ္တရာ၊ လေကြောင်းကာကွယ်ရေးတပ် (အင်ကြင်းမြိုင်တပ်)ဘက်ကနေပြီး စစ်အင်အား ၈၀ လောက်က စစ်ကူလာတဲ့အချိန် လမ်းမှာရှိတဲ့ အောင်ကန်သာကျေးရွာက လက်ဖက်ရည်ဆိုင်ကို ဝင်ရောက်ပစ်ခတ်ခဲ့တာလို့ သိရပါတယ်။

အောင်ကန်သာကျေးရွာနဲ့ တိုက်ပွဲဖြစ်ပွားတဲ့ ပတ်လည်အင်းကျေးရွာဟာ ၁ မိုင်ခွဲခန့်ဝေးတယ်လို့ သိရပါတယ်။

သေဆုံးသူတွေဟာ ဆိုင်ရှင် ၂ ဦး၊ လက်ဖက်ရည်ထိုင်နေသူ ပြည်သူ ၉ ဦး၊ ဆိုင်ကယ်နဲ့ အသွားအလာ လုပ်နေတဲ့ ပြည်သူတဦးနဲ့ ပတ်လည်အင်းရွာအရောက်မှာ စနိုက်ဘာနဲ့ပစ်ခံရလို့ ၁ ဦး စုစုပေါင်း ၁၃ ဦး သေဆုံးခဲ့တာလို့ မတ္တရာမြို့နယ် ပကဖ သတင်းပြန်ကြားရေးတာဝန်ခံက ပြောပါတယ်။ 

"အဲဒီလက်ဖက်ရည်ဆိုင်ဘေးမှာ စကစတွေရှိနေသေးလို့ သင်္ဂြိုဟ်ဖို့ကို အလောင်းမကောက်ရသေးဘူး" လို့ သူက ဆက်ပြောပါတယ်။

ပတ်လည်အင်းကျေးရွာတိုက်ပွဲက မနက် ၆ နာရီကနေ ၆ နာရီ ၄၅ မိနစ်လောက်အထိ ဖြစ်ပွားခဲ့ရာ စစ်ကောင်စီတပ်သား ၂၀ ဦးခန့်သေဆုံးပြီး သေနတ် ၃ လက် ရရှိခဲ့တယ်လို့ သိရပါတယ်။  

တိုက်ပွဲဖြစ်ပွားပြီးတဲ့နောက်မှာ စစ်ကောင်စီတပ်က စစ်ကူအင်အားထပ်တိုးကာ ကျေးရွာထဲက လူနေအိမ် ၁၀ လုံး ထပ်မနည်းကို မီးရှို့ဖျက်ဆီးခဲ့တယ်လို့လည်း သိရပါတယ်။

စာတည်း - လင်းဇေ

#မြေလတ်အသံ

#မန္တလေးတိုင်း #မတ္တရာမြို့နယ် #အောင်ကန်သာကျေးရွာ #လက်ဖက်ရည်ဆိုင် #မတ္တရာပကဖ #သတင်း #မြေလတ်သတင်း