မုန်းမှာ စစ်ကောင်စီစစ်ကြောင်း တရက်တည်း ၃ ကြိမ်တိုက်ခိုက်ခံရပြီး ၁၂ ဦး သေဆုံးဟုဆို

ပဲခူးတိုင်းအရှေ့ခြမ်း၊ မုန်းမြို့နယ်၊ မုန်း-ဇရပ်ကြီး ကားလမ်းပေါ် က ကျေးရွာတွေဆီ စစ်ကြောင်းထိုးဖို့ ပြင်နေတဲ့ အင်အား ၅၀ ပါ စစ်ကောင်စီတပ်ဖွဲ့ကို နယ်မြေခံ ပူးပေါင်းကာကွယ်ရေးအဖွဲ့တွေက တနေ့တည်း ၃ ကြိမ်တိုက်ခိုက်ခဲ့ရာ စစ်ကောင်စီဘက်က ၁၂ ဦး သေဆုံးခဲ့တယ်လို့ မြေပြင်တိုက်ခိုက်ရေး ရဲဘော်တွေဆီက သိရပါတယ်။ 

ဇူလိုင်လ ၃ ရက် မနက် ၉ နာရီဝန်းကျင်က စနိုက်ဘာနဲ့ပစ်ခတ်ချိန် စစ်သား ၁ ဦး သေဆုံးခဲ့ပြီး၊ ညနေ ၅ နာရီ ဒရုန်းနဲ့တိုက်ခိုက်ချိန်မှာတော့ ၃ ဦးသေဆုံးကာ၊ ည ၈ နာရီခွဲအချိန် ထိတွေ့မှုမှာတော့ အပြန်လှန်ပစ်ခတ်မှု ၁၀ မိနစ်လောက်ဖြစ်ပွားခဲ့ပြီး စစ်ကောင်စီဘက်က ၈ ဦးသေဆုံးခဲ့တယ်လို့ ဆိုပါတယ်။

“ရိက္ခာတွေ၊ လက်နက်ခဲယမ်းတွေပို့တဲ့ သူတို့(စစ်ကောင်စီ) လမ်းကြောင်းလုံခြုံရေးအတွက် ဒီဘက်ခြမ်းကို လာဆင်းကာတဲ့ စစ်ကြောင်းနဲ့ဖြစ်တာ၊ ညပိုင်းထိတွေ့မှုမှာတော့ တော်တော်များများ သေဆုံးတယ်၊ အဲ့ညတွင်းချင်းပဲ ဖြူးဘက်ကို လူနာတွေရော အလောင်းတွေရော သယ်သွားတယ်၊ ဆူညံနေရောပဲ” လို့ မြေပြင်တိုက်ခိုက်ရေး ရဲဘော်တဦးက ပြောပါတယ်။

မုန်း - ဇရပ်ကြီးလမ်းပိုင်းရှိ ကရင်ကျရွာနဲ့ သမန်းကျင်းရွာ အနီးတဝိုက်မှာပဲ တိုက်ခိုက်ခဲ့ကြတာ ဖြစ်ပြီး၊ တိုက်ပွဲအတွင်း စစ်ကောင်စီတပ်သား ၁၂ ဦး သေဆုံးကာ၊ ၉ ဦး ဒဏ်ရာရရှိခဲ့ပြီး စစ်ကောင်စီတပ်တွေဟာ အမြဲအရွေ့အပြောင်းလုပ်နေတဲ့အတွက် သေဆုံးစစ်သားတွေဟာ ဘယ်တပ်ကဆိုတာတော့ အတိကျ မသိရသေးပါဘူး။ 

သို့သော် မုန်းမြို့မှာ စစ်ကောင်စီရဲ့ ခမရ ၅၉၀နဲ့ ခမရ ၅၉၉ တပ်ရင်း ၂ ခုရှိတဲ့အတွက် အဲ့ဒီတပ်ရင်းက စစ်သားတွေ ဖြစ်နိုင်တယ်လို့ ကာကွယ်ရေးရဲဘော်တွေက ခန့်မှန်းကြပါတယ်။ 

စစ်ကောင်စီဘက်က ထိခိုက်သေဆုံးမှုတွေနဲ့ ပတ်သက်ပြီး မြေလတ်အသံက သီးခြားအတည်ပြုနိုင်ခြင်း မရှိသေးပါဘူး။ 

ပြီးခဲ့တဲ့ ဇူလိုင်လ ၂ ရက်ကလည်း ကျောက်တံခါးမြို့နယ်၊ သမင်အင်းကုန်းရွာ နဲ့ ကျောက်ကြီးမြို့နယ်‌ ရေတွင်းကုန်းရွာမှာ ထိတွေ့တိုက်ပွဲတွေဖြစ်ပွားခဲ့ပြီး စစ်ကောင်စီဘက်က ၁၀ ဦးကျော် သေဆုံးကာ ကာကွယ်ရေး ပူးပေါင်းတပ်တွေဘက်က ရဲဘော်တဦး ကျဆုံးခဲ့ပါသေးတယ်။

စာတည်း - လင်း

#မြေလတ်အသံ 

#ပဲခူးအရှေ့ခြမ်း #မုန်း #စစ်ကောင်စီ #PDF #တိုက်ခိုက်မှု