မုန်းမှာ အမျိုးသမီး ၁ ဦး နေအိမ်ခြံဝန်းအနီး မိုင်းထိလို့ ခြေထောက်ပြတ်

ပဲခူးတိုင်း၊ ကျောက်ကြီးမြို့နယ်၊ မုန်းမြို့၊ အမှတ် ၆ ရပ်ကွက်မှာ မိုင်းထိပြီး အမျိုးသမီး ၁ ဦး ခြေထောက်ပြတ်သွားတယ်လို့ ဒေသခံတွေဆီက သိရပါတယ်။ 

မိုင်းထိသူဟာ အသက် ၃၉ နှစ်အရွယ် မနီနီဝင်းဆိုသူဖြစ်ပြီး ဒီဇင်ဘာ ၂၈ ရက် နေ့လယ် ၁၂ နာရီကျော်မှာ သူရဲ့နေအိမ်ခြံနောက်ကိုသွားရင်း မိုင်းထိခဲ့တာလို့ ဆိုပါတယ်။

"မြေမြှုပ်မိုင်းထိတာ။ သူ့ခြံနောက်ကကောက်ရိုးပုံနားမှာ ဆီပုံးကိုထားထားတာကို ရှိသေးလားဆိုပြီး သွားကြည့်ရင်းကနေ ထိတာလို့တော့သိရတယ်။"လို့ ဒေသခံအမျိုးသားတဦးပြောပါတယ်။

မိုင်းထိချိန် မနီနီဝင်းဟာ နေရာတင်ဘယ်ဘက်ခြေထောက်ပြတ်ဒဏ်ရာရပြီး မိသားစုဝင်တွေက တောင်ငူဆေးရုံကိုပို့ခဲ့ကာ လိုအပ်တဲ့ခွဲစိတ်မှုတွေပြုလုပ်ထားပြီးဖြစ်လို့ အသက်အန္တရာယ်တော့ စိုးရိမ်စရာမရှိတော့ဘူးလို့ သိရပါတယ်။

မုန်းမြို့မှာ မြေမြှုပ်မိုင်းကြောင့် ထိခိုက်သေဆုံးမှုမကြာခဏဖြစ်နေပြီး လူနေအိမ်ခြံဝန်းထဲတွေအထိပါ မြေမြှုပ်မိုင်းတွေရှိနေတာကြောင့် ဒေသခံတွေလည်းစိုးရိမ်နေရတယ်လို့ အထက်ပါဒေသခံက ဆက်ပြောပါတယ်။ 

ပြီးခဲ့တဲ့ နိုဝင်ဘာ ၂၂ ရက်ကလည်း မုန်းမြို့၊ အမှတ် ၄ ရပ်ကွက်အစွန်နေ အမျိုးသား ၁ ဦးဟာ နေအိမ်အနီး ရေကန်မှာ ငါးသွားမျှားစဥ် မိုင်းထိပြီး ခြေထောက်ပြတ်ခဲ့သေးတယ်လို့ သိရပါတယ်။

စာတည်း - လင်း 

#မြေလတ်အသံ

#ပဲခူး #ကျောက်ကြီး #မိုင်းထိ #ခြေထောက်ပြတ် #မြေမြှုပ်မိုင်း