မုံရွာထောင်မှ ရွှေ့ပြောင်းခံရတဲ့ နိုင်ကျဥ်း ၁၀၀ ကျော် အိုးဘိုထောင်အရောက်မှာ ရိုက်နှက်နှိပ်စက်ခံရ

စစ်ကိုင်းတိုင်း၊ မုံရွာမြို့အကျဥ်းထောင်ကနေ ရွှေ့ပြောင်းခံလိုက်ရတဲ့ နိုင်ငံရေးအကျဥ်းသားတွေ မန္တလေးအိုးဘိုထောင်အရောက်မှာ ထောင်အာဏာပိုင်တွေရဲ့ ဝိုင်းဝန်ရိုက်နှက်တာကို ခံခဲ့ရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်ထံက သိရပါတယ်။

ပြီးခဲ့တဲ့သြဂုတ် ၁၅ ရက်က မုံရွာထောင်ကနေ ရွှေ့ပြောင်းခံရတဲ့ နိုင်ငံရေးအကျဥ်းသား ၉၀ ဦးနဲ့ အကျဥ်းသူ ၁၁ ဦး စုစုပေါင်း ၁၀၁ ဦးမှာ အိုးဘိုထောင်ကို သြဂုတ် ၁၆ရက် မနက် ၅ နာရီအချိန်အရောက်မှာ ရိုက်နှက်ခံခဲ့ရတာ ဖြစ်တယ်လို့ ဆိုပါတယ်။

"သူတို့ ပြောင်းရွှေ့လာတဲ့ကားတွေ လမ်းမှာ မိုင်းဆွဲခံရတဲ့ကိစ္စတွေရယ်၊ စကစဘက်ကတချို့ ကျသွားတာရယ် အဲ့ဒါတွေကို ဒေါသထွက်ပြီးတော့ ထောင်အာဏာပိုင်တွေက မင်းတို့ကြောင်းမို့ ဒီလိုဖြစ်တယ်လို့ပြောဆိုပြီး ဝင်လာသမျှ ကျား၊ မ မရွေးဘဲ ထောင်ဘူးဝထဲမှာပဲ ဝိုင်းပြီးရိုက်နှက်ကြတာ" လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်မှ ကိုသိုက်ထွန်းဦးက ပြောပါတယ်။

ထောင်အာဏာပိုင်တွေက အခုလိုဝိုင်းဝန်း ရိုက်နှက်ခဲ့တာကြောင့် နိုင်/ကျဥ်းဦးရေ ၅၀ ခန့်မှာ ပေါက်ပြဲဒဏ်ရာ၊ ပွန်းပဲ့ဒဏ်ရာတွေ ရရှိခဲ့ပြီး အဲ့ဒီထဲကမှ ၅ ဦးဟာ ဒဏ်ရာပြင်းထန်းစွာရရှိခဲ့ကြတယ်လို့ ကိုသိုက်ထွန်းဦး ကပြောပါတယ်။

"ဖိနပ်နဲ့ ကန်ကျောက်တာ၊ နံပါတ်တုတ်နဲ့ ရိုက်တာ၊ ကျဥ်စက်နဲ့ထိုးပြီး နှိပ်စက်တာတွေကြောင့် ကျန်းမာရေးအရ မစိုးရိမ်ရပေမယ့် ဂုဏ်သိက္ခာပိုင်းအရတော့ နိုင်ကျဥ်းတွေကို တော်တော်လည်းဖိနှိပ်နေတယ် ဆိုတာကိုတော့ မြင်သာတာပေါ့" လို့ သူက ဆိုပါတယ်။

မုံရွာထောင်က နိုင်/ကျဥ်းတွေ အခုလိုရိုက်နှက်ခံရတာတွေကို သြဂုတ် ၁၆ ရက်နေ့မှာ အိုးဘိုထောင်ကပြန်လွတ်လာသူတွေရဲ့ ပြောပြချက်တွေ၊ ထောင်တွင်းတိကျတဲ့ သတင်းရင်းမြစ်တွေရဲ့ပြောပြချက်အရ အတည်ပြုနိုင်ခဲ့တာလို့ ကိုသိုက်ထွန်းဦးက ပြောပါတယ်။

မုံရွာက နိုင်/ကျဥ်းတွေကို စစ်ကောင်စီတပ်သားတွေက ပြီးခဲ့တဲ့ သြဂုတ် ၁၅ ရက်ညနေ ၅ နာရီကျော်မှာ အချုပ်ကားနဲ့မပြောင်းဘဲ မိုးကာတွေအုပ်မိုးထားတဲ့ ၁၂ ဘီးကုန်တင်ကားနဲ့ စစ်ကား ၅ စီးကိုအသုံးပြုကာ ပြောင်းရွှေ့ခဲ့ရာ ချောင်းဦးမြို့နယ်ထဲက မုံရွာ-မန္တလေးကားလမ်းမ တနေရာအရောက်မှာ မိုင်း ၂ ကြိမ်ဆွဲခံလိုက်ရတာကြောင့် နိုင်ငံရေးအကျဥ်းသား CDM ဆရာဝန် ဒေါက်တာ ဇော်ထွယ်အောင် သေဆုံးပြီး ၂၀ ဦးကျော် ဒဏ်ရာရရှိ ခဲ့ပါတယ်။

၂၀၂၃ ခုနှစ် မေလ နောက်ပိုင်းကစလို့ မန္တလေးအိုးဘိုအကျဉ်းထောင်ကို ပြောင်းရွှေ့ရောက်ရှိလာကြတဲ့ နိုင်ငံရေးအကျဉ်းသား၊ အကျဉ်းသူအကုန်လုံးနီးပါးကို ထောင်အာဏာပိုင်တွေက ဥပဒေမဲ့ ညှင်းပန်းနှိပ်စက်မှု ပြုလုပ်လျှက် ရှိနေတယ်လို့ သိရပါတယ်။

စာတည်း - နွေဦးငြိမ်းချမ်း

#မြေလတ်အသံ 

#သတင်း #အကျဉ်းထောင် #နိုင်ငံရေးအကျဉ်းသား #အကျဉ်းသားအခွင့်အရေး #စစ်ကောင်စီ #ထောင်အာဏာပိုင် #နှိပ်စက် #မန္တလေးအိုးဘိုထောင် #စစ်ကိုင်းတိုင်း