မုံရွာ နမခကိုသွားတဲ့စစ်ယာဉ်တန်း ချုံခိုတိုက်ခိုက်ခံရလို့ ၁ ဦးသေဆုံး၊ ၃ ဦးဒဏ်ရာရ (ရုပ်/သံ)

စစ်ကိုင်းတိုင်း၊ တပ်မ ၃၃ ကနေ စစ်ကောင်စီယာဉ်တန်း ၁၂ စီးဟာ မုံရွာမြို့ နမခထဲကို သွားမယ်လို့ သတင်းရတာကြောင့် ဒီဇင်ဘာ ၁၁ ရက် ညနေ ၆ နာရီလောက်မှာ မြင်းမူမြို့နယ်၊ ကန်ဖျားဇရပ်အနီး အသင့်စောင့်ပြီး ချုံခိုတိုက်ခိုက်ခဲ့တယ်လို့ Moe Nyo Revolution Force M.N.R.F တပ်မှူး မိုးညိုက ပြောပါတယ်။ 

အဆိုပါ စစ်ယာဉ်တန်းဟာ တပ်အပြောင်းအရွှေ့လုပ်တာ ဖြစ်နိုင်တယ်လို့ ယူဆရကာ ကားတွေပေါ်မှာလည်း အမျိုးသမီးတွေနဲ့ ကလေးငယ်တွေလိုက်ပါလာပြီး စစ်ကား ၁၂ စီးအနက် စစ်သားတွေပါတဲ့ ၅ စီးမြောက်ကားကို လက်နက်ကြီး၊ လက်နက်ငယ်တွေနဲ့ပါ ပစ်ခတ်ခဲ့တာလို့ တပ်မှူးက ဆိုပါတယ်။

နှစ်ဘက် အပြန်အလှန် ပစ်ခတ်ချိန် ၁၅ မိနစ်လောက်ကြာခဲ့ပြီး စစ်ကောင်စီဘက်က မျက်မြင်အရ ၁ ဦး ပွဲချင်းပြီး သေဆုံးကာ ၃ ဦးက ဒဏ်ရာပြင်းထန်လို့ ဆေးရုံကားတွေနဲ့ မုံရွာမြို့ဘက်ကို မောင်းသွားတယ်လို့ ဆက်ပြောပါတယ်။

ပစ်ခတ်တိုက်ခိုက်ခံရပြီးနောက် အဆိုပါ စစ်ယာဉ်တန်း ၁၂ စီးဟာ မုံရွာ နမခထဲကို ဝင်သွားပြီးနောက် ဒီဇင်ဘာ ၁၂ ရက်ညပိုင်းမှာ မြင်းမူမြို့နယ်ထဲက စစ်ကောင်စီ အထိုင်စခန်းတခုဖြစ်တဲ့ ထီးဆောင်းစခန်းကနေ အခင်းဖြစ်တဲ့ ကံပြားဇရပ်အနီးဝန်းကျင်ကို လက်နက်ကြီးတွေနဲ့ ရမ်းသမ်းပစ်ခတ်တာတွေ လုပ်တယ်လို့ သိရပါတယ်။

တည်းဖြတ် - ငြိမ်းဇော်

#မြေလတ်အသံ

#မုံရွာ #တပ်မ၃၃ #နမခ #စစ်ယာဉ်တန်း #တိုက်ခိုက်