မုံရွာမြို့ပေါ်မှာ လူငယ် ၃ ဦးစီးလာတဲ့ဆိုင်ကယ် ပစ်ခံရလို့ ၁ ဦးသေ၊ ၁ ဦးဖမ်းခံရ

စစ်ကိုင်းတိုင်းဒေသကြီး၊ မုံရွာမြို့၊ ကန်သာဦးရပ်ကွက် အနောက်ဘက်၊ မြို့သစ်ပိုင်း၊ ပြည်ထောင်စုလမ်းပေါ်မှာ လူငယ် ၃ ဦးစီးလာတဲ့ ဆိုင်ကယ်ပစ်ခံရလို့ ၁ ဦးသေ၊ ၁ ဦးဖမ်းခံရတယ်လို့ ဒေသခံတွေထံက သိရပါတယ်။

ဇွန်လ ၂၇ ရက် မနက် ၇ နာရီကျော်ခန့်မှာ စစ်ကောင်စီလှည့်ကင်းနဲ့ လူငယ် ၃ ဦးစီးလာတဲ့ ဆိုင်ကယ်တိုးပြီး စစ်ကောင်စီဘက်က ပစ်ခတ်ခဲ့တာလို့ ဆိုပါတယ်။

"စကစဘက်က သတင်းရလို့ စောင့်ပစ်တာနဲတူတယ်။ ဆိုင်ကယ်ကတော့ နေရာမှာပဲ လဲသွားတာ။ ဖြစ်တဲ့နေရာမှာ ကောင်လေးတယောက်က သေသွားတာ။ တယောက်ကိုလည်း စကစ က ဖမ်းခေါ်သွားတယ်။ တယောက်ကတော့ လွတ်သွားတယ်" လို့ ဒေသခံတဦး က ပြောပါတယ်။

စစ်ကောင်စီဘက်က ပစ်ခတ်ဖမ်းဆီးခံရသူတွေဟာ ဘယ်သူဘယ်ဝါဆိုတာ မသိရသေးဘဲ ဖမ်းမိတဲ့ တယောက်ကိုတော့ စစ်ကောင်စီတပ်သားတွေက ရိုက်နှက်ခေါ်ဆောင်သွားကြတယ်လို့ ပြောပါတယ်။

သေဆုံးသူနဲ့ဖမ်းဆီးခံရသူ လူငယ် ၂ ဦးဟာ အသက် ၁၈ နှစ်မှ ၂၀ ကျော် လူငယ်တွေဖြစ်တယ်လို့ သိရပါတယ်။

ဒီဇင်ဘာလ ၉ ရက်က မုံရွာမြို့၊  ရုံးကြီးရပ်ကွက်၊ မြို့တော်ခန်းမအနီးမှာ ဆိုင်ကယ်စီးလာတဲ့ အမျိုးသား ၁ ဦးကို စစ်ကောင်စီတပ်သားတွေက ပစ်သတ်လို့ သေဆုံးခဲ့သေးတယ်လို့ သိရပါတယ်။

ပုံစာ - လူငယ် ၃ ဦး စီးလာသည့်ဆိုင်ကယ်အား ပစ်ခတ်ခံရပြီးနောက် တွေ့ရပုံ။

စာတည်း - နွေဦးငြိမ်းချမ်း

#မြေလတ်အသံ

#စစ်ကိုင်း #မုံရွာ #စစ်ကောင်စီ #ပစ်ခတ်ဖမ်းဆီး #လူငယ် #သေဆုံး