မုံရွာ MRTV တာဝါတိုင်ကုန်းစခန်းသိမ်းတိုက်ပွဲ စစ်ကောင်စီတပ်ဖွဲ့ဝင် ၁၁ ဦးသေဆုံးပြီး လက်နက်ခဲယမ်းအများအပြားရ

စစ်ကိုင်းတိုင်း၊ မုံရွာမြို့နယ်၊ ဗောဓိတထောင်ဘုရားနောက်ကျောရှိ  MRTV အသံလွှင့်ဌာနတာဝါတိုင်ကုန်းစခန်းကို တိုက်ခိုက်သိမ်းပိုက်နိုင်ခဲ့တယ်လို့ မုံရွာခရိုင် တပ်ရင်း ၄ Chindwin Attack Force အဖွဲ့ဆီက သိရပါတယ်။

ခတက္ကန်ရွာအရှေ့ဘက်မှာရှိတဲ့ စစ်ကောင်စီတပ်အင်အား ၁၇ ဦးခန့်ရှိ အဆိုပါစခန်းကို ဖေဖော်ဝါရီ ၂၆ ရက် မနက် ၈ နာရီကျော်မှာစတင်တိုက်ခိုက်ခဲ့ကာ နာရီဝက်နီးပါးအကြာ တိုက်ခိုက်ခဲ့ပြီးနောက် မနက် ၉ နာရီခန့်မှာ သိမ်းပိုက်နိုင်ခဲ့တာလို့ ဆိုပါတယ်။ 

“ စခန်းကို တိုက်ခိုက်သိမ်းပိုက်နေတဲ့အချိန် Paramotor လေထီးနဲ့လည်းစစ်ကူ‌ထောက်တဲ့အပြင် တံတားဦးလေတပ်ကလည်း Mi 35 ၁ စီးနဲ့ လေကြောင်း ပစ်ကူပေးတာတွေရှိသလို၊ အထိုင်စခန်းကနေလည်း လက်နက်ကြီးနဲ့ ၁၄ ကြိမ်ပစ်ခဲ့ပေမဲ့ စခန်းကိုသိမ်းပိုက်နိုင်ခဲ့တယ်” လို့ မုံရွာခရိုင် အမှတ် ၄ တပ်ရင်း သတင်းနဲ့ပြန်ကြားရေးတာဝန်ခံ ကိုပေတလူက ပြောပါတယ်။

စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၁၁ ဦးသေဆုံးခဲ့ပြီး ၆ ဦးလွတ်မြောက်သွားကာ တော်လှန်ရေးတပ်ဖွဲ့ဝင်တွေက စခန်းကို မီးရှို့ဖျက်ဆီးခဲ့ပြီး ပြန်လည်ဆုတ်ခွာခဲ့တယ်လို့ ဆိုပါတယ်။

အဆိုပါစစ်ကောင်စီစခန်းကနေ BA 63 ( G-3) ၅ လက်၊ အူဇီ ၃ လက်၊ M-79 ၂ လက်၊ ကျည်မျိုးစုံ ၅,၀၀၀ နီးပါး၊  ၄၀ မမ ဗုံးသီး ၁၀ လုံး၊ ရှေ့ထွက်မိုင်း ၂ လုံး၊ ကျည်အိမ် ၆ ခု၊ TV ၁ လုံးတို့ကို သိမ်းဆည်းရခဲ့တယ်လို့ သိရပါတယ်။

ဒီတိုက်ခိုက်မှုကို မုံရွာခရိုင်ကွပ်ကဲရေးမှူး ကွပ်ကဲမှုနဲ့ မုံရွာခရိုင်ကွပ်ကဲရေးရုံးအဖွဲ့၊ မုံရွာခရိုင် ဒရုန်းတပ်ဖွဲ့၊ မုံရွာခရိုင်လက်နက်ကြီးတပ်ဖွဲ့၊ မုံရွာခရိုင်တပ်ရင်း ၁၊ ၄၊ ၆၊ ၁၆၊ ၂၄၊ ၂၇၊ ဗျူဟာ ၆၄ (၅၊၈၊၉၊၁၀၊၁၁)၊ ဗျူဟာ ၆၁ (၁၂၊ ၁၇)၊ စစ်ကိုင်းခရိုင်တပ်ရင်း ၂ ဒရုန်းတပ်ဖွဲ့ (GTR)၊ မုံရွာခရိုင်ပကဖ တိုက်ခိုက်ရေးအဖွဲ့ (Danger Force LPDF)၊ မုံရွာခရိုင်ပကဖ ဒရုန်းအဖွဲ့၊ မုံရွာမြို့နယ်ပကဖ၊ အရာတော်မြို့နယ် တိုက်နယ် ၁၁ ဒရုန်းအဖွဲ့၊ BLDF ပူးပေါင်းအဖွဲ့ တို့က ပူးပေါင်းလုပ်ဆောင်ခဲ့တာပါ။

ဖေဖော်ဝါရီ ၂၇ ရက် ဒီကနေ့မှာတော့ တော်လှန်တပ်ဖွဲ့တွေ သိမ်းပိုက်မီးရှို့ခဲ့တဲ့ အဆိုပါ MRTV တာဝါတိုင်ကုန်းစခန်းကို  စစ်ကောင်စီတပ်ဘက်က အင် အား ၃၀၀ လောက်နဲ့ ပြန်လည်ဖြည့်တင်းဝင်ရောက်လာတယ်လို့ သိရပါတယ်။

စာတည်း - ဟိန်းစံ

#မြေလတ်အသံ

#စစ်ကိုင်း #မုံရွာ #MRTV တာဝါတိုင်ကုန်း #စခန်းသိမ်းတိုက်ပွဲ #စစ်ကောင်စီ #သေဆုံး