မြသိန်းတန်စေတီပေါ်က စစ်အုပ်စု တိုက်ခိုက်ခံရပြီး ၅ ဦးသေဆုံးကာ PDF ရဲဘော် ၂ ဦး ဒဏ်ရာရ (ရုပ်/သံ)

စစ်ကိုင်းတိုင်း၊ စစ်ကိုင်းမြို့နယ်အတွင်းက မြသိန်းတန်စေတီပေါ်မှာရှိတဲ့ စစ်သား၊ ရဲနဲ့ ပျူစောထီး အင်အား ၁၀၀ ဦးဝန်းကျင်ကို ကာကွယ်ရေးပူးပေါင်းအဖွဲ့တွေက ဝင်ရောက်တိုက်ခိုက်ခဲ့တယ်လို့ ရွှေဘိုခရိုင်အမှတ် ၁၈ တပ်ရင်း၊ တပ်ခွဲ ၄၊ Bo Tiger-ဗိုလ်ကျားကြီး အဖွဲ့ဆီက သိရပါတယ်။

မြသိန်းတန်စေတီပေါ်မှာ အင်အားဖြည့်ထားတဲ့ စစ်အုပ်စုကို ဩဂုတ် ၂၂ ရက် မနက် ၉ နာရီခွဲလောက်မှာတကြိမ် ညနေ ၄ နာရီမှာတကြိမ် သွားရောက်တိုက်ခိုက်ခဲ့တယ်လို့ ဆိုပါတယ်။

အဲဒီတိုက်ခိုက်မှုမှာ စစ်ကောင်စီဘက်က စနိုက်ပါသမား ၁ ဦးအပါ ၅ ဦးသေဆုံးပြီး ကာကွယ်ရေးအဖွဲ့က ရဲဘော် ၁ ဦး ဗိုက်ကျည်ဖောက်မှန်ကာ နောက် ၁ ဦးက ကျည်ရှပ်ထိဒဏ်ရာရတယ်လို့ ရွှေဘိုခရိုင်အမှတ် ၁၈ တပ်ရင်း၊ တပ်ခွဲ ၄၊ Bo Tiger-ဗိုလ်ကျားကြီး ခေါင်းဆောင် ဗိုလ်ကျားကြီးက ပြောပါတယ်။ 

"စစ်အုပ်စုကို မနက် ၉ နာရီခွဲလောက်ကစပြီး မဟာမိတ် ၇ ဖွဲ့လောက်နဲ့ ဝိုင်းပစ်တာ။ သူတို့ထိခိုက်မှုက စနိုက်ပါသမားလည်း သေတယ်။ စစ်ကောင်စီဘက်က သုံးလေးယောက်လောက် သေသွားတဲ့အချိန် ညနေပိုင်းလောက် ကာကွယ်ရေးအဖွဲ့တွေက ကျနော်တို့ဆီကို ဖုန်းဆက်အကူအညီတောင်းတာ" လို့  ဗိုလ်ကျားကြီးက ပြောပါတယ်။ 

အဲဒီနေ့ ညနေ ၄ နာရီလောက်မှာ ရွှေဘိုခရိုင်အမှတ် ၁၈ တပ်ရင်း၊ တပ်ခွဲ ၄ Bo Tiger-ဗိုလ်ကျားကြီးအဖွဲ့နဲ့  စစ်အုပ်စု ထိပ်တိုက်တွေ့ကာ အပြန်အလှန်ပစ်ခတ်ကြရာမှာ ကာကွယ်ရေးအဖွဲ့က ရဲဘော် ၂ ဦးထိခိုက်ဒဏ်ရာရခဲ့တာလို့ ဆိုပါတယ်။

အဆိုပါ မြသိန်းတန်စေတီပေါ်မှာ တပ်မ ၃၃ စစ်သား၊ မင်းကွန်းရဲစခန်းက ရဲတွေနဲ့ ပျူစောထီးတွေက အင်အား ၁၀၀ ကျော်နဲ့ တပ်စွဲနေတယ်လို့ သိရပါတယ်။

ဒီတိုက်ခိုက်မှုကို ရွှေဘိုခရိုင်အမှတ် ၁၈ တပ်ရင်း၊ တပ်ခွဲ ၄ BO-TIGER ဗိုလ်ကျားကြီးတပ်ဖွဲ့ ၊ တောဒေါင်းနီ -ပြည်သူ့ကာကွယ်ရေးတပ်ဖွဲ့ ၊ နဂါးနီ ၊ ယူနီကွန်း ပြောက်ကျားတပ်ဖွဲ့ ၊ ထုံးဘို -ပြည်သူ့ကာကွယ်ရေးတပ်ဖွဲ့ နဲ့ တော်လှန်ရေးအင်အားစုတို့က ပူးပေါင်းလုပ်ဆောင်ခဲ့တာ ဖြစ်ပါတယ်။

တည်းဖြတ် - HP

#မြေလတ်အသံ

#စစ်ကိုင်း #မြသိန်းတန်စေတီ #စစ်အုပ်စု #တိုက်ပွဲ