မြိုင်က ရဲနဲ့ ပျူစောထီး ကင်းစခန်း ဒရုန်းနဲ့ ဗုံးကြဲခံရလို့ ရဲ ၂ ဦးသေဆုံး (ရုပ်/သံ)

မကွေးတိုင်း၊ မြိုင်မြို့က ပျူစောထီးနဲ့ ရဲတွေရှိတဲ့ကင်းစခန်းကို ဒရုန်းနဲ့ ဗုံးကြဲချတိုက်ခိုက်ရာ ရဲတပ်သား ၂ ဦးသေဆုံးခဲ့တယ်လို့ Joker ပြောက်ကျားတပ်ဖွဲ့ ခေါင်းဆောင် ဗိုလ်ဘလိတ်က ပြောပါတယ်။

ဒီဇင်ဘာလ ၂၆ ရက် မနက် ၉ နာရီမှာ မြိုင်မြို့အနောက်တောင်ဘက်ခြမ်း၊ အမှတ် ၃ ရပ်ကွက်နေ ပျူစောထီးခေါင်းဆောင်တဦးရဲ့နေအိမ်မှာရှိတဲ့ အဆိုပါကင်းစခန်းကို ဒရုန်းဗုံးသီး ၇ လုံးကြဲချ တိုက်ခိုက်ခဲ့ရာ မြိုင်မြို့ပေါ် ရဲစခန်းကလို့ယူဆရတဲ့ ရဲတပ်သား မျိုးဝင်းစိန် နဲ့ ရဲတပ်သား အောင်နိုင်ဝင်း တို့ သေဆုံးခဲ့တယ်လို့ ဆိုပါတယ်။ 

အဆိုပါကင်းစခန်းမှာ စစ်အာဏာသိမ်းစအချိန်ကတည်းက မြိုင်မြို့ပေါ် ရဲစခန်းမှ ရဲတွေနဲ့ပျူစောထီး ၂၀ ၀န်းကျင် စခန်းချနေထိုင်နေကြတာလို့ သိရပါတယ်။ 

လက်ရှိမှာ အမှတ် ၃ ရပ်ကွက်အပြင် အမှတ် ၁ နဲ့ အမှတ် ၂ ရပ်ကွက်က ဒေသခံအများစု နေရပ်တိမ်းရှောင်နေကြတယ်လို့ ဆိုပါတယ်။ 

ပြီးခဲ့တဲ့ နိုဝင်ဘာ ၇ ရက်ကလည်း မြိုင်မြို့ပေါ် အထက ၁ ကျောင်းကနေ ထွက်လာပြီး မီးသတ်ရုံဘက်ကိုလာတဲ့ ဒုရဲမှူးနဲ့ ရဲ ၁ ဦးကို Joker ပြောက်ကျားတပ်ဖွဲ့က စောင့်ကြိုတိုက်ခိုက်ခဲ့ရာ ၂ ဦးလုံး သေဆုံးခဲ့ပါသေးတယ်။

တည်းဖြတ် - ငြိမ်းဇော်

#မြေလတ်အသံ

#မြိုင် #ရဲနဲ့ပျူစောထီး #ကင်းစခန်း #ဒရုန်းဗုံးကြဲခံရ #PDF