မှော်ဘီလေတပ်မှာ ရဟတ်ယာဉ် ၁ စီးပျက်ကျပြီး လေတပ်ဗိုလ်ချုပ် ၁ ဦးအပါ ၂ ဦး သေဆုံး

ရန်ကုန်တိုင်း၊ မှော်ဘီလေတပ်စခန်းဌာနချုပ်မှာ စစ်ကောင်စီရဲ့ရဟတ်ယာဉ် ၁ စီး ဒီကနေ့ ဩဂုတ် ၂ ရက် နေ့လယ်ပိုင်းမှာ ပျက်ကျတာကြောင့် လေတပ်စစ်ဗိုလ်ချုပ် ၁ ဦးအပါ ၂ ဦးသေဆုံးပြီး ဒဏ်ရာရရှိသူတွေလည်းရှိတယ်လို့ မှော်ဘီတပ်နယ် သတင်းရင်းမြစ်တွေထံက သိရပါတယ်။

ရဟတ်ယာဉ်ဟာ စတင်ပျံသန်းစဉ်မှာပင် ပျက်ကျခဲ့တာဖြစ်ပြီး သေဆုံးသူတွေဟာ တောင်ပိုင်းတိုင်း လေတပ်ကွပ်ကဲရေးမှူး  ဗိုလ်ချုပ် စိုးတင်လတ်နဲ့ ရဟတ်ယာဉ်မောင်းနှင်သူ လေတပ်အရာရှိ ၁ ဦးတို့ဖြစ်ကာ နောက်ထပ်လေယာဉ်မှူး ၁ ဦးနဲ့ ရဟတ်ယာဉ်ပေါ်ပါ စစ်ကောင်စီတပ်ဖွဲ့ဝင် ၁ ဦး ဒဏ်ရာရရှိတယ်လို့ ဆိုပါတယ်။

သေဆုံးသူ ဗိုလ်ချုပ် စိုးတင်လတ်ဟာ စစ်တက္ကသိုလ်အပတ်စဉ် ၃၂ ဆင်း စစ်ဗိုလ်ချုပ်ဖြစ်ပြီး အရာရှိငယ်ဘဝမှာ F 7 တိုက်လေယာဉ်မောင်းနှင်သူဖြစ်ကာ ယခုနှစ်အတွင်းမှာ မကွေးလေတပ်စခန်းဌာနချုပ်မှူးကနေ  တောင်ပိုင်းတိုင်းလေတပ်ကွပ်ကဲမှုဌာနချုပ်မှူးအဖြစ် ရာထူးတိုးရောက်ရှိလာသူဖြစ်တယ်လို့ လေတပ်သတင်းရင်းမြစ်တွေက ပြောပါတယ်။

ပျက်ကျတဲ့ ရဟတ်ယာဉ်ဟာ စစ်ကောင်စီရဲ့ ယူရိုကော်ပတာ(Eurocopter) အမျိုးအစားဖြစ်ပြီး ယခုနှစ်ဆန်းပိုင်းက ကော်ဘရာစစ်ကြောင်းရဲ့ပစ်ခတ်မှုကြောင့် မြဝတီ၊ သင်္ကန်းညီနောင်အခြေစိုက် ခမရ ၃၅၆ တပ်အတွင်း အဆိုပါရဟတ်ယာဉ်တစင်း ပျက်ကျခဲ့လို့  ယခုနှစ်အတွင်း ဒုတိယမြောက် ပျက်ကျတဲ့ ယူရိုကော်ပတာ အမျိုးအစားရဟတ်ယာဉ်လည်း ဖြစ်ပါတယ်။

ပုံစာ - သေဆုံးသူ တောင်ပိုင်းတိုင်းလေတပ်ကွပ်ကဲရေးမှူး ဗိုလ်ချုပ် စိုးတင်လတ်။

#မြေလတ်အသံ

#မှော်ဘီလေတပ် #ရဟတ်ယာဉ် #ပျက်ကျ #ဗိုလ်ချုပ် #လေတပ်