ရန်ကုန် - မန္တလေးလမ်းဟောင်းပေါ်က စစ်တပ်ဂိတ်စခန်း ၇ ခု တိုက်ခိုက်ခံရပြီး စစ်ကောင်စီတပ်ဖွဲ့ဝင် ၈ ဦးသေဆုံး

ပဲခူးတိုင်း၊ ကျောက်တံခါးနဲ့ ဖြူးမြို့နယ်အတွင်း ရန်ကုန် - မန္တလေးလမ်းဟောင်းပေါ်ရှိ စစ်ကောင်စီတပ်ဖွဲ့တွေ အခြေချတပ်စွဲထားတဲ့ဂိတ်စခန်း ၇ ခုကို တိုက်ခိုက်ခဲ့တယ်လို့ အမျိုးသားညီညွတ်ရေးအစိုးရ - ကာကွယ်ရေးဝန်ကြီးဌာနက ဒီကနေ့ ဖေဖော်ဝါရီ ၂၇ ရက်မှာ သတင်းထုတ်ပြန်ပါတယ်။

အဆိုပါစစ်ကောင်စီစခန်း ၇ ခုကို ဖေဖော်ဝါရီ ၂၅ နဲ့ ၂၆ ရက်တွေမှာ တိုက်ခိုက်ခဲ့တာဖြစ်ပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၈ ဦး သေဆုံးတယ်လို့ဖော်ပြထားပြီး သေဆုံးစစ်ကောင်စီတပ်သားတွေက ဘယ်တပ်စခန်းတွေကဆိုတာတော့ အသေးစိတ် မဖော်ပြထားပါဘူး။

တော်လှန်ရေးပူးပေါင်းတပ်တွေဘက်ကလည်း PDF တပ်ဖွဲ့ဝင် ၁ ဦး တိုက်ပွဲတွင်းသေဆုံးခဲ့တယ်လို့ ထုတ်ပြန်ချက်က ဆိုပါတယ်။

အဆိုပါတိုက်ခိုက်မှုတွေကို တောင်ပိုင်းစစ်‌‌ဒေသ၊ အမှတ် ၂ စစ်ဒေသခွဲလက်အောက်ခံတပ်တွေဖြစ်တဲ့ အမှတ် ၃၇၀၂ တပ်ရင်း၊ အမှတ် ၃၅၀၂ တပ်ရင်း၊ Spring Warrior Column တပ်ရင်း၊ အာဠာဝကစစ်‌ကြောင်း ၇၈၀၃၊ ဧရာဝတီစစ်ကြောင်း ၆၀၀၂၊ စစ်တောင်းစစ်ကြောင်း၊ ရန်ကုန်ပကဖ၊ ဖြူးပကဖနဲ့ KNLA တပ်ရင်း ၉ တို့ ပူးပေါင်းတိုက်ခိုက်ခဲ့ကြတာလို့ ဖော်ပြထားပါတယ်။

ပြည်သူ့ကာကွယ်ရေးတပ်မတော် - PDF အနေနဲ့ ဒေသတွင်း စစ်ရေးလှုပ်ရှားမှုတွေကို တိုးမြှင့်ဆောင်ရွက်သွားမှာဖြစ်တာကြောင့် ပြည်သူတွေအနေနဲ့ စစ်ကောင်စီတပ်ဖွဲ့ဝင်တွေ၊ ဂိတ်စခန်းတွေနဲ့ အနီးဝန်းကျင်တွေကို မလိုအပ်ဘဲမသွားရောက်ကြဖို့လည်း ဝန်ကြီးဌာနက သတိပေးထားပါတယ်။

ပုံစာ - တောင်ပိုင်းတိုင်းစစ်ဒေသလက်အောက် ရန်ကုန် PDF တပ်ဖွဲ့ဝင်များ၏ သင်တန်းဆင်းပွဲတခုအားတွေ့ရစဉ်။ (ဓာတ်ပုံ - PDF တောင်ပိုင်းတိုင်းစစ်ဒသ)

#မြေလတ်အသံ

#ပဲခူး #တိုက်ပွဲ #သတင်း