ရဟတ်ယာဉ်နဲ့လာပို့ပြီး ချောင်းဦးနယ်ထဲ စစ်ကြောင်းထိုးနေတဲ့စစ်အုပ်စု မိုင်းဆွဲခံရလို့ ထိခိုက်မှုရှိ

စစ်ကိုင်းတိုင်း ချောင်းဦးမြို့နယ်အတွင်းက စစ်ကောင်စီစစ်ကြောင်း စက်တင်ဘာ၂၈ရက် မနက် ၇ နာရီကျော်မှာ မိုင်း ၂ ကြိမ်ဆွဲတိုက်ခိုက်ခံရတာကြောင့် သေဆုံးမှုရှိနိုင်တယ်လို့ မုံရွာခရိုင်အမှတ်-၁၂ တပ်ရင်း တပ်ခွဲ-၃ ဆီက သိရပါတယ်။

အင်အား ၇၀ ကျော်ပါ စစ်ကောင်စီစစ်ကြောင်းဟာ ချောင်းဦး၊ မကျီးခွရွာကနေ  ဆင်ဖြူရှင်တံတားဘက်ကို ထွက်လာစဉ် ပေါက်အင်းကျေးရွာအနီးအရောက်မှာ မိုင်း ၈ လုံးနဲ့ ၂ ကြိမ် တိုက်ခိုက်ခဲ့တာလို့ ဆိုပါတယ်။

"မိုင်းဆွဲခံရတဲ့ စစ်ကြောင်းထဲက အနည်းဆုံး ၅ ယောက်နဲ့ ၁၀ယောက်ကြားသေဆုံးနိုင်တယ်။ အတိကျတော့မသိရဘူး။ မိုင်းဆွဲခံရပြီး နာရီဝက်အကြာမှာ အလောင်းတွေကို တံတားဘက်ကနေ ဖောကားတစီးနဲ့လာသယ်သွားတာကိုမြင်လိုက်ရတယ်။" လို့ လျှပ်စီးတပ်ခွဲ(မုံရွာခရိုင်အမှတ်-၁၂၊တပ်ခွဲ-၃) တပ်ခွဲမှူး မိုးကြိုးက ပြောပါတယ်။

မိုင်း ၂ ကြိမ်ဆွဲခံရချိန်အတွင်း စစ်ကောင်စီတပ်သားတွေက ၄၀ မမ၊ လက်နက်ငယ်တွေနဲ့ ၁၅မိနစ်ကြာ ပြန်လည်ပစ်ခတ်ခဲ့ပြီး အဲဒီနောက် ဒဏ်ရာရ၊ သေဆုံးစစ်သားတွေကို ဆင်ဖြူရှင်တံတားမှာ တပ်စွဲထားတဲ့စခန်းက လာခေါ်သွားတာလို့ တပ်ခွဲမှူး မိုးကြိုးက ဆိုပါတယ်။

အဲ့ဒီစစ်ကြောင်းဟာ စက်တင်ဘာ ၂၆ ရက်နေ့က မကျီးခွ၊ မင်းခေါင်၊ မင်းတည်ရွာတွေကို စစ်ကြောင်းထိုးစီးနင်းဖို့ ရဟတ်ယာဥ် ၂ စီးနဲ့လာရောက်ပို့ ဆောင်သွားသူတွေဖြစ်ပြီး စီးနင်းမှုအတွင်း  PDF ၃ ဦးနဲ့  ဒေသခံ ၆ ဦးတို့ကို သတ်ဖြတ်ခဲ့တဲ့ စစ်ကြောင်းဖြစ်ကာ မကျီးခွရွာမှာ တပ်စွဲပြီးနောက် ထွက်ခွာလာစဉ် မိုင်းဆွဲခံရတာလည်း ဖြစ်ပါတယ်။

ဒီတိုက်ခိုက်မှုကိုတော့ လျှပ်စီးတပ်ခွဲ (မုံရွာခရိုင် အမှတ်-၁၂ တပ်ရင်း၊ တပ်ခွဲ-၃ ) နဲ့ ရန်ရှင်းဒေသခံ ပြည်သူ့ကာကွယ်ရေးတပ်ဖွဲ့တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ သြဂုတ်လ ၁၇ ရက်မှာလည်း ချောင်းဦးမြို့ လဝက ရုံးအနီးရှိ ကားလမ်းမပေါ်မှာ ခရီးသွားပြည်သူတွေဆီကနေ အဓမ္မငွေတောင်းခံနေကြတဲ့ စစ်ကောင်စီတပ်ဂိတ်ကို  ၆၀ မမ နဲ့သွားရောက်ပစ်ခတ်ခဲ့ရာ ၁ဦးသေဆုံးခဲ့တယ်လို့သိရပါတယ်။

ပုံစာ - စက်တင်ဘာ ၂၈ရက်က မိုင်းဆွဲခံရမှု နေရာအနီးတွေ့ရှိရသည့်  စစ်ကောင်စီတပ်ဖွဲ့ဝင်များ၏ အသုံးအဆောင်ပစ္စည်းများ။

စာတည်း -ရင်ငြိမ်း

#မြေလတ်အသံ

#ချောင်းဦး #စစ်ကောင်စီစစ်ကြောင်း #မိုင်းဆွဲတိုက်ခိုက် #PDF #စစ်ကောင်စီတပ် #ထိခိုက်မှု