ရုံးစင်ကြီးရဲစခန်းက ရဲတပ်သားနဲ့ဇနီးကို တောင်သာပကဖ ဖမ်းဆီး

မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ ရုံးစင်ကြီးရဲစခန်းက ရဲတပ်သားနဲ့ ဇနီးဖြစ်သူကို ဇန်နဝါရီ ၆ ရက်ညနေပိုင်းမှာ ဖမ်းဆီးခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။ 

ရဲတပ်သား ကျော်သောင်းနဲ့ ဇနီးဖြစ်သူတို့ကို စခန်းအနီးကွမ်းယာဆိုင်ကိုသွားချိန် စောင့်ကြို ဖမ်းဆီးခဲ့တာဖြစ်ပြီး သူတို့ဆီကနေ G3 သေနတ် ၁ လက်၊ G3 ကျည် ၁၅ ထောင့် သိမ်းဆည်းရခဲ့တယ်လို့ ဆိုပါတယ်။ 

လက်ရှိမှာ ၂ ဦးစလုံးကိုထိန်းသိမ်းစောင့်ရှောက်ထားပြီး စစ်သုံ့ပန်းဥပဒေနဲ့အညီ အရေးယူသွားဖို့ရှိတယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့တာဝန်ရှိသူက ပြောပါတယ်။

“အရှင်ဖမ်းဆီးရမိတဲ့အခါကျတော့ သူတို့ကိုကောင်းကောင်းမွန်မွန်ပဲ ထိန်းသိမ်းစောင့်ရှောက်ထားပြီးတော့ စစ်သုံ့ပန်းဥပဒေနဲ့အညီပေါ့လေ MOD ရဲ့ လမ်းညွှန်ချက်အတိုင်း စစ်သုံ့ပန်းဥပဒေနဲ့အညီ အရေးယူဆောင်ရွက်သွားမှာပါ” လို့ သူကပြောပါတယ်။ 

တောင်သာမြို့နယ်ပြည်သူ့ကာကွယ်ရေးအဖွဲ့အနေနဲ့ အခုလိုစစ်ကောင်စီလက်အောက်ခံတပ်ဖွဲ့ဝင်တွေကို ဖမ်းဆီးမိတာ ပထမအကြိမ်ဖြစ်တယ်လို့ ဆိုပါတယ်။ 

ပြီးခဲ့တဲ့ ဇန်နဝါရီ ၁ ရက်ကတော့ မန္တလေးတိုင်း၊ တောင်သာမြို့နယ်မှာတာဝန်ကျနေတဲ့ ရဲတပ်သား ၂ ဦး လက်နက်ခဲယမ်းတွေနဲ့အတူ တောင်သာမြို့နယ်ပြည်သူ့ကာကွယ်ရေးအဖွဲ့ဆီ ဘက်ပြောင်းခိုလှုံလာခဲ့ပါသေးတယ်။ 

စာတည်း - လင်း 

#မြေလတ်အသံ

#မြင်းခြံ #တောင်သာ #ရုံးစင်ကြီး #ရဲတပ်သား #ဖမ်းမိ