ရေတာရှည်မှာ ဂျက်ဖိုက်တာနဲ့ဗုံးကြဲလို့ သံဃာ ၁ ပါးဒဏ်ရာရ နေအိမ်နဲ့ဘုန်းကြီးကျောင်းတွေ ပျက်စီး

ရေတာရှည်မှာ ဂျက်ဖိုက်တာနဲ့ဗုံးကြဲလို့ သံဃာ ၁ ပါးဒဏ်ရာရ နေအိမ်နဲ့ဘုန်းကြီးကျောင်းတွေ ပျက်စီး

ပဲခူးတိုင်း၊ ရေတာရှည်မြို့နယ်၊ ပိတောက်ကုန်းကျေးရွာနဲ့ ဂူကြီးကျေးရွာကို စစ်ကောင်စီတပ်ဖွဲ့ဝင်တွေက လေကြောင်းနဲ့ ဗုံးကြဲတိုက်ခိုက်ခဲ့တာကြောင့် သံဃာ ၁ ပါးဒဏ်ရာရပြီး နေအိမ် ၆ လုံးနဲ့ ဘုန်းကြီးကျောင်းဆောင်တွေ ပျက်စီးခဲ့တယ်လို့ တောင်ငူခရိုင် စည်းရုံးရေးတာဝန်ခံဆီက သိရပါတယ်။

ဖေဖော်ဝါရီ၂၈ ရက် မနေ့မနက် ၁၁ နာရီကျော်မှာ  ပိတောက်ကုန်းကျေးရွာထဲကို ဂျက်ဖိုက်တာ ၁ စီး၊ Y 12 လေယာဉ် ၁ စီးနဲ့ ဗုံးကြဲကာ ပွိုင့်ဖိုက်တွေနဲ့ပစ်ခတ်ခဲ့ပြီး ညနေ ၅ နာရီကျော်မှာတော့ ပိတောက်ကုန်းရွာနဲ့ ၂ မိုင်ခန့်ဝေးတဲ့ ဂူကြီးကျေးရွာကို ဂျက်ဖိုက်တာ ၁ စီးနဲ့ ဗုံးကြဲပစ်ခတ်ခဲ့တယ်လို့ ဆိုပါတယ်။

"ပိတောက်ကုန်းကို အရင်ကြဲတာမှာ လူမထိဘူး၊ နေအိမ်တွေပဲ မီးလောင်သွားတာ။ လေယာဉ်က ၂ စီးနဲ့ တိုက်ပွဲဖြစ်တာမရှိဘဲ ကြဲတာ။ ညနေခင်းကျတော့ ဂူကြီးနဲ့ ပတ်ဝန်းကျင်ကို ကြဲတာ။ ဘုန်းကြီး ၁ ပါး ထိသွားတယ်။ ဂူကြီးကိုက ၁ စီးတည်းနဲ့ ၄ လုံး ၂ ကြိမ်ကြဲတာ။”လို့ တောင်ငူခရိုင် စည်းရုံးရေးတာဝန်ခံက ပြောပါတယ်။

ဗုံးကြဲတိုက်ခိုက်ခံရလို့ ပိတောက်ကုန်းကျေးရွာက နေအိမ် ၅ လုံး မီးလောင်ပျက်စီးခဲ့ပြီး ဂူကြီးကျေးရွာမှာတော့ သက်တော် ၄၅ နှစ်ဝန်းကျင် သံဃာ ၁ ပါး ပေါင်နဲ့တင်ပါး ဗုံးသီးစထိမှန်ဒဏ်ရာရခဲ့ပြီး နေအိမ် ၁ လုံးနဲ့ ဘုန်းကြီးကျောင်းဆောင် ၂ ဆောင် ပျက်စီးခဲ့တယ်လို့ သိရပါတယ်။

လေကြောင်းတိုက်ခိုက်မှု ပြုလုပ်ခံခဲ့ရတဲ့ ကျေးရွာ ၂ ရွာဟာ KNU တပ်မဟာ ၂ ထိန်းချုပ်နယ်မြေအတွင်းက ကျေးရွာတွေဖြစ်ပြီး လက်ရှိမှာတော့ ပြည်သူတွေ ပြန်လည်နေထိုင်နေကြပြီလို့ ဆိုပါတယ်။

ရေတာရှည်မြို့နယ်မှာ ထိတွေ့တိုက်ပွဲတွေ တောက်လျှောက်ဖြစ်ပွားနေပြီး ပြီးခဲ့တဲ့ ဇန်နဝါရီ ၁ ရက်ကလည်း ရေတာရှည်မြို့နယ်၊ ရေလွှဲကျေးရွာနဲ့ ပိန္နဲပင်ဆိပ်ကျေးရွာမှာ တိုက်ပွဲဖြစ်ပွားခဲ့ပြီး စစ်ကောင်စီဘက်က ၇ ဦး သေဆုံးကာ ဒေသကာကွယ်ရေးအဖွဲ့ဝင် ၆ ဦးနဲ့ အရပ်သား ၇ ဦး သေဆုံးခဲ့ပါတယ်။

စစ်ကောင်စီတပ်ဖွဲ့ဝင်တွေဘက်က ရေတာရှည်မြို့နယ်ထဲကို လေကြောင်းကနေ ဗုံးကြဲတာ၊ ဒရုန်းနဲ့ ဗုံးသီးကြဲချတာတွေ မကြာခဏလုပ်လေ့ရှိပြီး ပြီးခဲ့တဲ့ ၂၀၂၄ နိုဝင်ဘာ ၁ ရက်ကလည်း ရေတာရှည်မြို့နယ်၊ ကျွန်းကုန်းရွာကို ဒရုန်းနဲ့ ဗုံးကြဲခဲ့တာကြောင့် အမျိုးသမီး ၁ ဦးသေဆုံးခဲ့သေးတယ်လို့ သိရပါတယ်။

စာတည်း - ချယ်ရီ

#မြေလတ်အသံ

#ပဲခူး #ရေတာရှည် #စစ်ကောင်စီ #လေကြောင်းဗုံးကြဲ #သံဃာ #ထိခိုက် 

နောက်ဆုံးရ သတင်းများ

01
02
03
04
05
06
07
08
09
10