ရဲဗလတံဆိပ်ရအုပ်ချုပ်ရေးမှူးနဲ့ မိသားစုဝင် ၂ ဦး ပစ်ခံရလို့သေဆုံး

မန္တလေးတိုင်း၊ ဝမ်းတွင်းမြို့နယ်၊ တမာကန်ကျေးရွာမှာ ရဲဗလတံဆိပ်ရအုပ်ကြီးနဲ့ မိသားစုဝင် ၂ ဦးပစ်သတ်ခံရလို့ သေဆုံးသွားတယ်လို့ Voice of Wundwin အဖွဲ့ထံက သိရပါတယ်။

ပစ်ခတ်ခံရလို့သေဆုံးသွားသူတွေက တမာကန်အုပ်ချုပ်ရေးမှူး အသက် ၄၀ ကျော်အရွယ် မောင်လွင်နဲ့ ဇနီးဖြစ်သူ ဒေါ်မြင့်ခိုင်၊ အသက် ၁၈ နှစ်အရွယ် သားဖြစ်သူ ဖိုးလပြည့်တို့ဖြစ်ပြီး ဒီဇင်ဘာ ၂၂ ရက် ည ၉ နာရီခန့်မှာ သူတို့နေအိမ်မှာ ပစ်သတ်ခံလိုက်ရတယ်လို့ဆိုပါတယ်။

"သူ့အိမ်ထဲ ဝင်ရှင်းခံရတာ။ ပျူတွေဖြစ်လို့ ဒီဘက်က(တော်လှန်ရေးအဖွဲ့ဝင်တွေ) အင်အားနဲ့ဝင်ရှင်းတာဆိုတော့ လှုပ်ချိန်တောင်မရလိုက်ဘူး။ အချက်ပေါင်းများစွာပစ်ခတ်ခံရပြီး ၃ ဦးလုံးသေသွားတယ်။"လို့ Voice of Wundwin အဖွဲ့က တာဝန်ရှိသူကပြောပါတယ်။

အုပ်ချုပ်ရေးမှူး ဦးမောင်လွင်ဟာ စစ်ကောင်စီဘက်က ခိုင်းစေတာကို တက်တက်ကြွကြွ လုပ်ကိုင်ပေးတတ်သူဖြစ်လို့ ၂၀၂၂ ဇန်နဝါရီလက စစ်ကောင်စီဘက်က ပေးအပ်တဲ့ ရဲဗလဘွဲ့ကိုရရှိထားသူဖြစ်ပါတယ်။

သူ့ကို ၂၀၂၁ အတွင်းက တော်လှန်ရေးအဖွဲ့တွေဘက်က ပထမအကြိမ်ပစ်ခတ်ရှင်းလင်းခဲ့သေးရာ အသက်မသေဘဲ လမ်းမလျှောက်နိုင်တဲ့အခြေနေထိဖြစ်သွားပေမယ့် ရာထူးကနေ နုတ်ထွက်တာမရှိဘဲ ဆက်လုပ်နေခဲ့တယ်လို့ Voice of Wundwin ထံက သိရပါတယ်။

ဒါ့အပြင် ဇနီးဖြစ်သူ ဒေါ်မြင့်ခိုင်နဲ့သားဖြစ်သူ ဖိုးလပြည့်တို့ဟာလည်း တမာကန်အုပ်စုကျေးရွာတွေဖြစ်တဲ့ တမာကန်၊ ကျောက်အိုး၊ မင်းကုန်၊ တောင်ဆည်ကျေးရွာတွေမှာ တအိမ်တသောင်း စစ်မှုထမ်းအကြောင်းပြကောက်ခံတာ၊ လူငယ်ရှိတဲ့အိမ်တွေကိုလည်း စစ်မှုထမ်းအကြောင်းပြ ငွေကျပ် ၅သိန်း၊ ၁၀သိန်း တောင်းခံတာ၊ ပြည်သူတွေကိုခြိမ်းခြောက် အကြပ်ကိုင်တာ၊ သားဖြစ်သူ ဖိုးလပြည့်ကလည်း သူ့အဖေအလိုအကျ စစ်ကောင်စီတပ်သားတွေကို အကြိုအပို့ လုပ်ပေးတာတွေရှိတယ်လို့ ဆိုပါတယ်။

ဒါကြောင့် သူတို့မိသားစု ၃ ဦးစလုံးကို Wundwin Township Revolution Force WTRF အဖွဲ့ဝင်တွေက ပစ်ခတ်ရှင်းလင်းခဲ့တာလို့ သိရပါတယ်။

အုပ်ချုပ်ရေးမှူး မောင်လွင်မိသားစုကို တော်လှန်ရေးအဖွဲ့တွေက ရှင်းလင်းပြီးနောက် သူတို့ထံကနေ ဓား ၁ ချောင်းနဲ့ ငွေကောက်ခံထားတဲ့ စာရင်းစာအုပ်တွေရရှိခဲ့တယ်လို့ သိရပါတယ်။

ပစ်ခတ်ခံရပြီးသေဆုံးသွားတဲ့ အုပ်ချုပ်ရေးမှူးမောင်လွင်တို့ရဲ့ အလောင်းတွေကိုတော့ ဒီဇင်ဘာ ၂၃ ရက် မနက် ၈ နာရီကျော်လောက်မှာမှ စစ်ကောင်စီအဖွဲ့တွေကလာရောက်စစ်ဆေးပြီး ဝမ်းတွင်းမြို့ဘက်သယ်ယူသွားတယ်လို့ ဆိုပါတယ်။

ပြီးခဲ့တဲ့ မတ် ၁၉ ရက်ကလည်း ဝမ်းတွင်းမြို့နယ်၊ သီးကုန်းကျေးရွာအုပ်ချူပ်ရေးမှူး ဦးမောင်ပု နေအိမ်မှာရှိနေချိန် သေနတ်သမားတွေက လာရောက်ပစ်ခတ်လို့ သေဆုံးသွားသေးတယ်လို့ သိရပါတယ်။

ပုံစာ - ၂၀၂၂ ဇန်နဝါရီလမှာ ရဲဗလဆုတံဆိပ်ရရှိသူ မြင်းခြံမြို့နယ်အတွင်းက စစ်ကောင်စီလက်အောက် ရပ်ကျေးအုပ်ချုပ်ရေးအဖွဲ့ဝင်တွေကို ဆုတံဆိပ်ပေးအပ်စဥ်။

စာတည်း - လင်းဇေ

#မြေလတ်အသံ

#မန္တလေးတိုင်း #ဝမ်းတွင်းမြို့ #တမာကန်ကျေးရွာ #ရဲဗလတံဆိပ်ရ #အုပ်ချုပ်ရေးမှူး