လဝကဦးစီးမှူး လိုက်ပါလာတဲ့ ကားကိုမိုင်းဆွဲချိန် လဝကဝန်ထမ်း ၁ ဦးထိမှန်သေဆုံး

မကွေးတိုင်း၊ ပခုက္ကူမြို့နယ် လဝကဦးစီးတဦး လိုက်ပါလာတဲ့ကားတစီးနဲ့ လုံခြုံရေးလိုက်လာတဲ့ စစ်ကောင်စီတပ်သားတွေရဲ့ ကားတစီးကို ဧပြီလ ၁ ရက် မနေ့ကမနက်ပိုင်းမှာ အဝေးထိန်းမိုင်းနဲ့ တိုက်ခိုက်ခဲ့တယ်လို့ မြိုင်မြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။ 

အဆိုပါ ကား၂ စီးဟာ မနေ့က မနက် ၈ နာရီ  ၂၀ မိနစ်ဝန်းကျင်က ပခုက္ကူမြို့နယ်လဝကရုံးကိုဝင် လာချိန် ရုံးအနီးမှာပဲ မိုင်း ၂ လုံးနဲ့တိုက်ခိုက်ခဲ့တာလို့ ဆိုပါတယ်။ 

“တော်လှန်ရေးတပ်ဖွဲ့ဝင်‌တွေ၊ ပြည်သူတွေရဲ့သတင်းတွေကို စာရင်းကောက်ပေးတဲ့ လဝက ဝန်ထမ်းနဲ့ စစ်သားတွေလာမယ့် အချိန် အဝေးထိန်းမိုင်းထားပစ်ခဲ့တာ”လို့ မြိုင်ပကဖတာဝန်ခံ ဗိုလ်လက်ယာက ပြောပါတယ်။ 

မိုင်းဆွဲတိုက်ခိုက်ချိန် လဝကရုံးကထွက်လာတဲ့ ဝန်ထမ်းတဦး မိုင်းစထိမှန်သေဆုံးခဲ့ပြီး စစ်သား ၁ ဦးနဲ့ အနီးမှာရှိနေတဲ့ပြည်သူ ၂ ဦးလည်း ဒဏ်ရာရရှိခဲ့တယ်လို့ ဆိုပါတယ်။ 

ဒီတိုက်ခိုက်မှုကို မြိုင်ပြည်သူ့ကာကွယ်ရေးအဖွဲ့၊ မြိုင်ပကဖ တပ်ရင်း ၃ တပ်ခွဲ ၄ နဲ့ The Red Revolters -Pakokku တို့က ပူးပေါင်းလုပ်ဆောင်ခဲ့တာပါ။ 

ပြီးခဲ့တဲ့ မတ်လ ၂၇ ရက်မနက် ၄ နာရီလောက်မှာလည်း မြိုင်ပကဖရဲဘော်တွေနဲ့ စစ်ကောင်စီအဖွဲ့တွေ ပစ်ခတ်မှုဖြစ်ပြီးနောက် ကာကွယ်ရေးရဲဘော်တွေရဲ့စခန်း စီးနင်းတိုက်ခိုက်ခံခဲ့ရပြီး ရဲဘော် ၁ ဦးကျဆုံးခဲ့ပါသေးတယ်။ 

စာတည်း - လင်း 

#မြေလတ်အသံ

#မကွေး #ပခုက္ကူ #လဝက #မိုင်းဆွဲတိုက်ခိုက် #သတင်း #မြေလတ်သတင်း