လိုင်းကားမောင်းရင်းပေါ်တာဆွဲခံရပြီး စစ်မှုထမ်းရသူတဦး လက်နက်နဲ့ဘက်ပြောင်းခိုလှုံလာ

မကွေးတိုင်း၊ ပခုက္ကူမြို့နယ်၊ မြောက်လုကန်ကျေးရွာစစ်ကောင်စီစခန်းက တပ်ဖွဲ့ဝင် ၁ ဦး လက်နက်၊ ခဲယမ်းတွေနဲ့အတူ တော်လှန်ရေးတပ်ဖွဲ့တွေဘက်ကို ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

ဘက်ပြောင်းခိုလှုံလာသူမှာ ခြေမြန်တပ်မဌာနချုပ် ၁၀၁ က အသက် ၂၆ နှစ်အရွယ် တပ်သား မျိုးမင်းအောင် ဖြစ်ပြီး မတ် ၁ ရက်မှာ ၎င်းအထိုင်စခန်းကနေ တော်လှန်ရေးပူးပေါင်းတပ်ဖွဲ့တွေဆီ ထွက်ပြေးခိုလှုံလာတာလို့ ဆိုပါတယ်။

“ ကျနော်တို့က တခြားတပ်နဲ့ဆက်သွယ်ပြီးတော့ သူ့ကိုခေါ်ထုတ်ရတာ။ သူတို့အထိုင်ချထားတဲ့ အနီးနားအထိ သွားပြီး ခေါ်ထုတ်ခဲ့ရတာ။” လို့ မြိုင်မြို့နယ်ပကဖတာဝန်ရှိသူတဦးက ပြောပါတယ်။

၎င်းဟာ စစ်ကောင်စီတပ်ရဲ့ပေါ်တာဆွဲဖမ်းဆီးမှုမခံရမီက စစ်ကိုင်းမြို့တွင်းပြေးဆွဲတဲ့ ခရီးသည်တင်လိုင်းကားမောင်းနှင်သူဖြစ်ပြီး ၂၀၂၄ ဒီဇင်ဘာ ၁၂ ရက်က လိုင်းကားမောင်းနှင်နေစဉ် စစ်ကိုင်းတံတားပေါ်မှာ စစ်ကောင်စီတပ်မ ၃၃ ရဲ့ ပေါ်တာဆွဲဖမ်းခံခဲ့ရပြီး ရှမ်းပြည်နယ်(တောင်ပိုင်း)၊ ဟိုပုံးမြို့ရှိ တကန သင်တန်းကျောင်းကို ပို့ဆောင်ခံခဲ့ရသူဖြစ်ပါတယ်။

စစ်သင်တန်း ၂ လခွဲကြာတက်ရောက်ပြီးနောက် ပခုက္ကူအခြေစိုက် တပ်မ ၁၀၁ ဌာနချုပ်ကတဆင့် မြောက်လုကန်ရွာစစ်ကောင်စီစခန်းကို ပို့ဆောင်ခံခဲ့ရကာ အဆိုပါစခန်းကိုရောက်ပြီး ၄ ရက်အကြာမှာ လက်နက်နဲ့အတူထွက်ပြေးလာနိုင်ခဲ့တာလို့ ဆိုပါတယ်။

ဘက်ပြောင်းခိုလှုံလာတဲ့ တပ်သား မျိုးမင်းအောင်ဟာ MA 1 သေနတ် ၁ လက်၊ MA ကျည် ၆၀ တောင့်၊ ကျည်ဘောက် ၃ ခု ကို ယူဆောင်လာနိုင်လို့ ၎င်းကို ဒေသတော်လှန်ရေးတပ်ဖွဲ့ဝင်တွေဘက်က ငွေကျပ် သိန်း ၃၀ ချီးမြှင့်ခဲ့တယ်လို့ သိရပါတယ်။

စာတည်း - ဟိန်းစံ

#မြေလတ်အသံ

#မကွေး #ပခုက္ကူ #စစ်မှုထမ်း #ဘက်ပြောင်းခိုလှုံ