လျှပ်စစ်မိန်းခုံရှော့ဖြစ်ရာက မီးလောင်ပြီး နေအိမ် ၄ လုံး ပျက်စီး

စစ်ကိုင်းတိုင်း၊ မုံရွာမြို့၊ ဒေါနခြံရပ်ကွက်၊ သရဖီလမ်းမှာ မီးလောင်ပြီး နေအိမ် ၄ လုံး ပျက်စီးဆုံးရှုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၃ ရက်ည ၁၀ နာရီကျော်ခန့်မှာ သရဖီလမ်းနေ ဦးစန်းယုနေအိမ်ကနေ မီးစတင်လောင်ကျွမ်းပြီးဘေးအိမ်တွေကိုပါ မီးကူးစက်လောင်ကျွမ်းခဲ့တာလို့ ဆိုပါတယ်။

"လျှပ်စစ်မိန်းခုံ ရှော့ဖြစ်မီးလောင်ပြီး အောက်မှာရှိတဲ့အိပ်ယာခင်းပေါ်မီးပွားကျတာ၊ မီးစာတွေ ကျတာပေါ့။ အဲ့ကနေတဆင့် နေအိမ်ထရံတွေကိုမီးကူးပြီး နေအိမ်မီးလောင်တာပါ။"လို့ ဒေသခံတဦးက ပြောပါတယ်။

မီးလောင်မှုဖြစ်ပြီး ဦးစန်းယုနေအိမ်အပါအဝင် သစ်သားအိမ် ၂ လုံးနဲ့ အုတ်တိုက်နေအိမ် ၂ လုံးစုစုပေါင်း နေအိမ် ၄ လုံးမီးလောင်ပျက်စီးပြီး လူထိခိုက်တာမျိုးတော့မရှိဘူးလို့ ဆိုပါတယ်။ 

နေအိမ်တွေမီးလောင်ပျက်စီးမှုကြောင့် ကျပ်သိန်း ၃၀၀ ကျော် ပျက်စီးဆုံးရှုံးမှုရှိခဲ့တယ်လို့ သူက ဆက်ပြောပါတယ်။ 

မီးလောင်မှုဖြစ်တဲ့နေရာကို မုံရွာမြို့နယ်မီးသတ်၊ မုံရွာခရိုင်မီးသတ်၊ အရန်မီးသတ်၊ လူမှုကူညီရေးအသင်းတွေနဲ့ ဒေသခံပြည်သူတွေ ဝိုင်းဝန်းမီးငြှိမ်းသတ်ခဲ့ကာ မီးလောင်ပြီး တနာရီကျော်အကြာမှာ မီးငြှိမ်းသတ်နိုင်ခဲ့တယ်လို့ ဆိုပါတယ်။ 

ဒီဇင်ဘာ ၂ ရက်ကလည်း မုံရွာမြို့၊ စက်မှုဇုံရပ်ကွက်၊ စွယ်တော်လမ်းမှာ ရွှေခြူးဂွမ်းဖက်စက်ရုံ မီးလောင်လို့ ကျပ်သိန်းရာချီ ပျက်စီးဆုံးရှုံးခဲ့တယ်လို့ သိရပါတယ်။

ပုံ - စစ်ကိုင်းတိုင်းဒေသကြီး မီးသတ်ဦးစီးမှူးရုံး။

စာတည်း - လင်း 

#မြေလတ်အသံ

#စစ်ကိုင်း #မုံရွာ #နေအိမ် #မီးလောင်