Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
ဝက်လက်မှာ လေယာဉ်ဗုံးကြဲခံရလို့ ၄ လသားကလေးအပါ ၄ ဦးသေဆုံး
စစ်ကိုင်းတိုင်း၊ ဝက်လက်မြို့နယ်၊ စဉ့်ကိုင်(မြောက်)ရွာကို လေယာဉ်နဲ့ဗုံးကြဲခဲ့တာကြောင့် ၄ လသားကလေး ၁ ဦး အပါအဝင် ၄ ဦးသေဆုံးခဲ့တယ်လို့ ဒေသကာကွယ်ရေးတပ်ဖွဲ့ဝင်တွေထံက သိရပါတယ်။
မတ် ၁၆ ရက် မနေ့ည ၁၀ နာရီကျော်မှာ စစ်ကောင်စီလေတပ် တိုက်လေယာဉ် ၁ စီးက စဉ့်ကိုင်(မြောက်)ရွာအတွင်း ဗုံး ၂ လုံးကြဲချသွားခဲ့ပြီး ဗုံးသီးတွေဟာ ကျေးရွာအတွင်း အရပ်သားနေအိမ်တွေအပေါ် ကျရောက်ပေါက်ကွဲခဲ့တယ်လို့ ဆိုပါတယ်။
" တိုက်ပွဲမဖြစ်ဘူးဗျ။ ဒီအတိုင်းကြဲချသွားတာ။ ဗုံးသီး ၂ လုံးကြဲချခဲ့တာ။ နေအိမ်တွေလည်း တော်တော်ပျက်စီးသွားတယ်လို့ သိရတယ်။"လို့ ဝက်လက်မြို့ နယ်တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။
လေယာဉ်ဗုံးပေါက်ကွဲမှုကြောင့် စဉ့်ကိုင်(မြောက်)ရွာက အသက် ၄ လအရွယ် ယောက်ျားလေးနဲ့ ၎င်းရဲ့အဖိုး၊အဘွားဖြစ်သူ အသက် ၇၇ နှစ် ဦးမြသောင်း၊ အသက် ၇၅ နှစ် ဒေါ်ကြည်ကြည်၊ အသက် ၃၀ ကျော် အမျိုးသမီး စုစုပေါင်း ၄ ဦး သေဆုံးခဲ့ပြီး ဒဏ်ရာရရှိသူ ၆ ဦးရှိခဲ့တယ်လို့ သိရပါတယ်။
ဇန်နဝါရီ ၁ ရက်ကနေ မတ် ၁၄ ရက်အထိ စစ်ကောင်စီသတ်ဖြတ်မှုကြောင့် နိုင်ငံတဝှမ်း လူ ၂၇၄ ဦးသေဆုံးခဲ့ပြီး အဲ့ဒီထဲမှာ ၁၈၄ ဦးဟာ လေကြောင်းက တိုက်ခိုက်ခံရတာကြောင့်ဖြစ်ပြီး သေဆုံးမှုအများဆုံးဖြစ်တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း - AAPP ရဲ့ မတ် ၁၄ ရက်ထုတ်ပြန်ချက်အရ သိရပါတယ်။
စာတည်း - ဟိန်းစံ
#မြေလတ်အသံ
#စစ်ကိုင်း #ဝက်လက် #လေကြောင်းတိုက်ခိုက်မှု #သေဆုံး
Share Share Share