ဝက်လက်ရဲစခန်းက ဒုရဲအုပ်လင်မယား ဆေးသောက်ပြီးသေကြောင်းကြံလို့ အမျိုးသမီးဖြစ်သူသေဆုံး

စစ်ကိုင်းတိုင်း၊ ဝက်လက်မြို့ရှိ ဝက်လက်မြို့မရဲစခန်းက ဒုရဲအုပ်လင်မယား ဆေးသောက်ပြီး သေကြောင်းကြံလို့ အမျိုးသမီးဖြစ်သူသေဆုံးသွားတယ်လို့ ရဲစခန်းနဲ့နီးစပ်သူတွေထံက သိရပါတယ်။

ဒီဇင်ဘာ ၁၉ ရက် မနက် ၄ နာရီခန့်မှာ အသက် ၂၅ နှစ်အရွယ် ဒုရဲအုပ် အောင်မင်းစိန်နဲ့ အသက် ၂၂ အရွယ် ဇနီးဖြစ်သူ မထက်ထက်တို့  ၂ ဦးဟာ နေအိမ်လိုင်းခန်းအတွင်းမှာ ပါးစပ်က အမြှုပ်တွေထွက်ပြီး သတိလစ်နေတာကို တခြားရဲတပ်ဖွဲ့ဝင်တွေက တွေ့ရှိခဲ့ရတယ်လို့ ဆိုပါတယ်။

"သူ့ကင်းအလှည်ကျလို့ သွားနှိုးရာမှာ လင်မယားနှစ်ယောက်စလုံးက ပါးစပ်ကနေ အမြှုပ်တွေထွက်နေလို့ ဆေးရုံတန်းပို့တာ သူ့မိန်းမကတော့ တခါတည်းဆုံးတာ။ သူကတော့ဆေးရုံမှာ။ ဘာဆေးသောက်လိုက်လဲ ဆိုတာတော့ မသိရသေးဘူး" လို့ ရဲစခန်းနဲ့ နီးစပ်သူ ၁ ဦးက ပြောပါတယ်။

လင်မယားနှစ်ဦးစလုံး လဲကျနေတဲ့နေရာအနီးမှာ ဆေးပုလင်းတလုံးတွေ့ရပြီး မည့်သည့်ဆေးအမျိုးအစားဖြစ်တယ်ဆိုတာ မသိရသေးဘူးလို့ ဆိုပါတယ်။

ဆေးသောက်ကာ သေကြောင်းကြံစည်တဲ့ ဒုရဲအုပ်လင်မယား နှစ်ဦးမှာ မိန်းမဖြစ်သူက သေဆုံးသွားပြီး ဒုရဲအုပ်ဖြစ်သူက ဆေးရုံမှာ ဆေးကုသနေရဆဲဖြစ်ကာ မိန်းမဖြစ်သူရဲ့ နာရေးကိုတော့ နေ့ချင်းပြီး သင်္ဂြိုဟ်လိုက် ကြတယ်လို့ သိရပါတယ်။

အဆိုပါ ဒုရဲအုပ်လင်မယားဟာ ၂၀၂၄ နှစ်ဆန်းပိုင်းလောက်ကမှ စစ်ကြောင်းနဲ့အတူ ဝက်လက်ရဲစခန်းကို ရောက်ရှိလာတာဖြစ်ပြီး ရဲစခန်းအတွင်းနေထိုင်စဉ် စိတ်ဖိစီးမှုဒဏ်တွေကြောင့် ထွက်ပြေးဖို့ ကြံစည်နေခဲ့ ကြတာလို့ အထက်ပါ ရဲစခန်းနဲ့နီးစပ်သူက ပြောပါတယ်။

ဝက်လက်ရဲစခန်းမှာ ရဲတပ်ဖွဲ့ဝင်အင်အား ၂၀ ဦးခန့်ရှိနေပြီး မိသားစုဝင်တွေနဲ့ဆိုပါက လူ ၇၀ ကျော်ခန့်ရှိတယ်လို့ သိရပါတယ်။

ဝက်လက်မြို့ပေါ်ကို စစ်ကောင်စီတပ်တွေက စိုးမိုးထားပြီး မြို့အနီးဝန်းကျင်ကိုတော့ တော်လှန်ရေးတပ်ဖွဲ့တွေက စိုးမိုးထားတာဖြစ်ပါတယ်။ 

စာတည်း - လင်းဇေ

#မြေလတ်အသံ

#စစ်ကိုင်းတိုင်း #ဝက်လက်မြို့  #မြို့မရဲစခန်း #ဒုရဲအုပ်လင်မယား #သေကြောင်းကြံ