ဟုမ္မလင်း ၂ ရက်တာတိုက်ပွဲမှာ အထိနာသွားတဲ့ စစ်ကောင်စီက လေယာဉ်နဲ့ဗုံးကြဲပြီး ဆုတ်ခွါ

စစ်ကိုင်းတိုင်း၊ ဟုမ္မလင်းမြို့နယ်၊ နတ်နန်းအုပ်စု၊ တုံစီကျေးရွာမှာ စစ်ကောင်စီတပ်နဲ့ နယ်မြေခံကာကွယ်ရေးအဖွဲ့တွေ ၂ ရက်ဆက်တိုက် တိုက်ပွဲဖြစ်ပွားခဲ့ကာ စစ်တပ်ဘက်က အထိနာလို့ လေကြောင်းပစ်ကူခေါ်ပြီး ဆုတ်ခွာသွားရတယ်လို့ သိရပါတယ်။

မေလ ၁၇ ရက် နေ့လည် ၁၂ နာရီကနေ မေလ ၁၈ ရက်နေ့ထိ ခလရ ၂၇၂ တပ်က တပ်စိတ် ၂ စိတ်အပါအဝင် SNA ပူးပေါင်းအင်အား ၁၂၀ ပါတဲ့ စစ်ကြောင်းနဲ့ ကာကွယ်ရေးပူးပေါင်းတပ်ဖွဲ့တွေ တိုက်ပွဲဖြစ်ခဲ့တာလို့ ဆိုပါတယ်။

“သူတို့စစ်ကြောင်းကို ကျနော်တို့က ပဇောက်ပုံစံဝိုင်းပြီး ပစ်တဲ့အခါ လေယာဉ်ပစ်ကူနဲ့ ပြန်ကဲ့ထုတ်ရတဲ့အနေထားဗျ၊ ဗုံးသီး ၄ လုံးချတယ်၊ ၁ လုံးပဲကွဲတယ်၊ ခုပြည်သူတွေ တွေ့တဲ့အနေထားအရ ၁၂၀ ပါ စစ်ကြောင်းက ၆၀ လောက်ပဲ ပြန်ပါလာတယ်၊ အလောင်းတွေကို ထွန်စက်နဲ့တင်သွားတယ်။” လို့ HPDF အဖွဲ့ ရဲဘော်တဦးက ပြောပါတယ်။

စစ်ကောင်စီဘက်က အထိနာတဲ့အတွက် ၁၈ရက်နေ့ ၁နာရီလောက်မှာ ကင်းထောက်လေယာဥ်နဲ့တကြိမ်၊ Y8 နဲ့ တကြိမ်၊ MI 17နဲ့ တကြိမ် စုစုပေါင်း ၃ စီး နဲ့ ဗုံးသီး ၄လုံးချကာ လေကြောင်းပစ်ကူပေးခဲ့တယ်လို့ သိရပါတယ်။

တိုက်ပွဲအတွင်း ရဲဘော်တဦး ၆၀ ဗုံးသီးအစအနည်းငယ်ထိမှန်ကာ၊ စစ်ကောင်စီဘက်က ၂၀ ဝန်းကျင် ထိခိုက်သေဆုံးပြီး၊ အလောင်းတွေကို ထမ်းစင်တွေနဲ့အရင်ဆုံးသယ်ထုတ်ပြီးမှ ထွန်စက်ပေါ်တင်ပြီး လာရာလမ်းအတိုင်းပြန်ဆုတ်ကာ ခိုတောင်းရွာကို ဝင်သွားတယ်လို့ သိရပါတယ်။

အဲဒီတိုက်ပွဲကို ဟုမ္မလင်းပြည်သူ့ကာကွယ်ရေးတပ်ပေါင်းစု နဲ့ ဟုမ္မလင်း-ဖောင်းပြင် လှုပ်ရှားစစ်ကြောင်းတို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

စစ်ကောင်စီဘက်က အထိနာခဲ့တဲ့အတွက် ဒီကနေ့ မနက် ၁၀နာရီခွဲ ဝန်းကျင်မှာတော့ မြင်သာရွာကို မီးရှို့နေပြီး ပျက်စီးမှု အသေးစိပ်ကတော့ မသိရသေးဘူးလို့ ဆိုပါတယ်။

ပြီးခဲ့တဲ့ မေလ ၄ ရက်နေ့ကလည်း မြင်သာအုပ်စု၊ ငိုးပင်ကျေးရွာအနီးမှာ တိုက်ပွဲဖြစ်ပွားခဲ့ပြီး စစ်ကောင်စီဘက်က ဗုံးသီး ၄ လုံး ပစ်ချခဲ့လို့ ငိုးပင်ရွာက ရှမ်းနီ အမျိုးသား ၂ ဦး သေဆုံးပြီး ၂ ဦး ဒဏ်ရာ ရရှိခဲ့ပါသေးတယ်။

စာတည်း - 007

#မြေလတ်အသံ
#ဟုမ္မလင်း #လေကြောင်းပစ်ကူ #ဖောင်းပြင် #စစ်ကောင်စီ #စစ်ကိုင်း