အင်းတကော်မှာ မြေအက်ကွဲနိမ့်ဆင်းသွားလို့ နေအိမ်အဆောက်အဦ ၉ လုံးပျက်စီး

ပဲခူးတိုင်း၊ ပဲခူးမြို့နယ်၊ အင်းတကော်မြို့၊ သာယာအေးကျေးရွာအုပ်စု၊ ကွမ်ပေါင်ကျေးရွာမှာ မြေသားအက်ကွဲ နိမ့်ဆင်းခဲ့တာကြောင့် လူနေအိမ်နဲ့ ဆေးခန်းအဆောက်အဦ ၉ လုံး ပျက်စီးသွားတယ်လို့ ဒေသခံတွေဆီက သိရပါတယ်။

ဒီဇင်ဘာ ၁၇ ရက် မနေ့မနက် ၄ နာရီခန့်မှာ ပဲခူးမြစ်ကမ်းနဲ့ ပေ ၃၀ ခန့်အကွာ ကျေးရွာအလယ်ပိုင်းမှာ မြေသားအက်ကွဲပြီး မြေ ၂ ပေခန့် ရုတ်တရက်နိမ့်ဆင်းခဲ့တာလို့ ဆိုပါတယ်။

"ပက်ကြားအက်ပြီး မြေက နိမ့်ကျသွားတာ။ ၄ အိမ် ၅ အိမ်လောက်က မီးဖိုချောင်လေးတွေ ပါသွားတယ်။ အိမ်မ နည်းနည်းထိသွားတာ။ ကျန်အိမ်တွေက ပက်ကြားအက်သွားတယ်။ ဘာဖြစ်တာလဲတော့ မသိဘူး။ ကမ်းပါးဘက်ကို လန်ကျသွားတာ၊ ထွက်ကျသွားတာလည်းမရှိဘူး။ နိမ့်ဆင်းသွားတာ။"လို့ ရွာခံတဦးက ပြောပါတယ်။

စုစုပေါင်းမြေဧရိယာ ပေ ၅၀၀ ကျော်လောက် အက်ကွဲနိမ်းဆင်းသွားတာလို့ ခန့်မှန်းရပြီး ကျေးလက်ဆေးပေးခန်း ၁ လုံး၊ အုတ်တိုက် ၃ လုံး၊ သွပ်မိုးပျဉ်ခင်း ဝါးဓနိမိုး နေအိမ် ၅ လုံး စုစုပေါင်း ၉ လုံးပျက်စီးခဲ့တယ်လို့ ဆိုပါတယ်။ 

အိမ်ခြေ ၂၀၀ ကျော်ရှိတဲ့ ကွမ်ပေါင်ရွာဟာ ပဲခူးမြစ်ကမ်းဘေးမှာတည်ရှိပြီး ယခုလိုမြေသားနိမ့်ကျပြီး အက်ကွဲတာ၊ ကမ်းပါးပြိုတာမျိုးတကြိမ်မှမဖြစ်ဖူးဘူးလို့ ရွာခံတဦးက ပြောပါတယ်။ 

လက်ရှိမှာ ဒေသခံတွေက ပြောင်းရွှေ့နေထိုင်တာမရှိဘဲ အခြေအနေကိုသာ ဆက်လက်စောင့်ကြည့်နေကြတယ်လို့ ဆိုပါတယ်။ 

စာတည်း - လင်း 

#မြေလတ်အသံ

#ပဲခူး #အင်းတကော် #မြေအက်ကွဲ #အိမ်ပျက်စီး #သဘာဝဘေးအန္တရာယ်