အဓမ္မဖမ်းဆီးခံရပြီး စစ်သင်တန်းတက်ခဲ့ရတဲ့စစ်သား ၂ ဦး ရှေ့တန်းကနေအလင်းဝင်

စစ်ကိုင်းတိုင်း၊ ရွှေဘိုမြို့နယ်၊ ရွှေဘိုလေ့ကျင့်ရေး ၈ ကနေ မန္တလေးတိုင်း၊ မတ္တရာမြို့နယ်အတွင်းမှာ ဝာာဝန်ကျနေတဲ့ စစ်ကောင်စီတပ်သား ၂ ဦး ထွက်ပြေးအလင်းဝင်လာတယ်လို့ တောင်သူဦးကြီးများအဖွဲ့ - LDF ဆီက သိရပါတယ်။ 

အသက် ၂၀ နှစ်အရွယ် တပ်သား မောင်ကိုကြီးနဲ့ ၂၂ နှစ်အရွယ် တပ်သား ချစ်ကိုဦး တို့ဟာ ဒီဇင်ဘာ ၂၄ ရက်မှာ တောင်သူဦးကြီးများအဖွဲ့ကိုချိတ်ဆက်ပြီး အလင်းဝင်လာခဲ့ကြတာလို့ ဆိုပါတယ်။ 

“အဲ့ဒီလူ(မောင်ကိုကြီး)က နဂိုကတည်းက အတင်းအဓမ္မစစ်သင်တန်းပေးခံရတာဖြစ်တဲ့အတွက် ပြည်သူ့စစ်အထဲမှာ မလုပ်ချင်တဲ့အတွက် မတ္တရာစစ်မျက်နှာပြင်မှာရောက်တဲ့အချိန် ‌မြို့လှရွာသားမောင်ကိုကြီးနဲ့ ကော့မှူးမြို့နယ်က ချစ်ကိုဦးတို့ အလင်းဝင်ရောက်လာတယ်။ သူတို့ လက်နက်ခဲယမ်းတော့ ဘာမှပါမလာပါဘူး” လို့ တောင်သူဦးကြီးများအဖွဲ့ - LDF သတင်းနဲ့ပြန်ကြားရေးတာဝန်ခံ မလှဝင်းက ပြောပါတယ်။

ရွှေဘိုမြို့နယ်၊ မြို့လှရွာသား မောင်ကိုကြီးနဲ့ ရန်ကုန်တိုင်း၊ ကော့မှူးမြို့နယ်က ချစ်ကိုဦး တို့ကို ပြီးခဲ့တဲ့နှစ်ဖေဖော်ဝါရီလမှာ စစ်ကောင်စီတပ်သားတွေက စစ်ကြောင်းထိုးဖမ်းဆီးပြီး ရွှေဘိုလေ့ကျင့်ရေး ၈ ထဲကိုခေါ်ကာ ပြည်သူ့စစ်သင်တန်း ၃ လတက်ခိုင်းပြီးနောက်မှာ စစ်တပ်ထဲရောက်ရှိလာသူတွေဖြစ်တယ်လို့ ဆိုပါတယ်။

စစ်သင်တန်းဆင်းပြီးနောက် ဇွန်လကုန်ပိုင်းမှာ မတ္တရာမြို့နယ်အတွင်းကို တာဝန်ချပို့ဆောင်ခံခဲ့ရတာလို့ တောင်သူဦးကြီးများအဖွဲ့ - LDF သတင်းနဲ့ ပြန်ကြားရေးတာဝန်ခံ မလှဝင်းက ပြောပါတယ်။

“မြို့လှရွာက မောင်ကိုကြီးကို ရွှေဘိုလေ့ကျင့်ရေး ၈ ထဲကိုခေါ်သွားပြီး ပြည်သူစစ်သင်တန်း ၃ လပေးတာ၊ သူတို့ကို ရှေ့တန်းစစ်မျက်နှာပြင်တွေကို လွှတ်ခဲ့တယ်၊ လွှတ်တဲ့အချိန်မှာ စိတ်ကြွမူးယစ်ဆေးဝါးတွေကိုထိုးသွင်းပြီး တိုက်ပွဲတွေမှာ အသေခံပြီးတိုက်ခိုက်ခိုင်းတယ်။” လို့ အလင်းဝင်လာသူရဲ့ ပြောပြချက်ကို ကိုးကားပြီး မလှဝင်းက ပြန်ပြောပြပါတယ်။ 

လက်ရှိမှာ ၂ ဦးစလုံးကို လုံခြုံတဲ့နေရာမှာထားပြီး စားရေးနေရေးအဆင်ပြေအောင် ကူညီထောက်ပံ့ထားကာ သူတို့ဘက်ကလည်း တော်လှန်ရေးတပ်ဖွဲ့တွေနဲ့ပူးပေါင်းပြီး စစ်ကောင်စီကို ပြန်လည်တိုက်ခိုက်သွားဖို့ရှိနေတယ်လို့ ဆိုပါတယ်။ 

အခုနှစ် သြဂုတ် ၂၇ ရက်ကလည်း မန္တလေးတိုင်း၊ ပြင်ဦးလွင်မြို့မှာ စစ်သင်တန်းဆင်းပြီး ရှမ်းပြည်ဘက်ကို တာဝန်ချခံထားရတဲ့ အသက် ၂၉ နှစ်အရွယ် တပ်သား မောင်ဖြူဟာ တောင်သူဦးကြီးများအဖွဲ့ - LDF ဆီအလင်းဝင်လာခဲ့ပါသေးတယ်။ 

‌စစ်ကိုင်းတိုင်း၊ ရွှေဘိုမြို့အ‌နောက်ခြမ်းမှာ အခြေစိုက်တဲ့ တောင်သူဦးကြီးများအဖွဲ့ - LDF ဆီကို အလင်းဝင်လာသူ စုစုပေါင်း ၃ ဦးရှိပြီလို့သိရပါတယ်။  

စာတည်း - လင်း 

#မြေလတ်အသံ

#စစ်ကိုင်း #ရွှေဘို #စစ်မှုထမ်း #ဖမ်းဆီးခံရ #ထွက်ပြေး