အမ်းမြို့ နပခတိုက်ပွဲကပြေးလာတဲ့ စစ်ကောင်စီစစ်ကြောင်း ပိတ်ဆို့ခံရပြီး ၁၇ ဦးဖမ်းမိကာ လက်နက် ၃၀ ကျော်ရ

မကွေးတိုင်း၊ ငဖဲမြို့နယ်၊ ပျဥ်းဝရွာစစ်ဆေးရေးဂိတ်နားမှာ အမ်းမြို့ နပခ တိုက်ပွဲကနေ စစ်ကြောင်းပျက်ပြီး ထွက်ပြေးလာတဲ့ စစ်ကောင်စီတပ်ဖွဲ့ဝင်တွေကို ပိတ်ဆို့တားဆီးချိန် လက်နက် ၃၀ ကျော်နဲ့ စစ်ကောင်စီတပ်သားတချို့ ဖမ်းဆီးရမိခဲ့တယ်လို့ ချင်းကာကွယ်ရေးတပ် အရှို CDF-Asho တပ်ဖွဲ့တာဝန်ရှိသူဆီက သိရပါတယ်။

ဒီဇင်ဘာ ၂၅ ရက်က စစ်ကောင်စီအင်အား ၉၀ ခန့်ပါတဲ့ စစ်ကြောင်း ၂ ခုကို အမ်း-ပဒါန်းလမ်းမ၊ ပျဥ်းဝရွာ စစ်ဆေးရေးဂိတ်နဲ့ မီတာ ၁၅၀၀ အကျော်မှာ ပိတ်ဆို့တားဆီးခဲ့တာဖြစ်ပြီး လက်နက်အပ် အလင်းဝင်တဲ့ စစ်ကောင်စီတပ်သားတွေရှိသလို ထွက်ပြေးသွားတဲ့ စစ်ကောင်စီတပ်သားတွေလည်း ရှိတယ်လို့ ဆိုပါတယ်။

ထွက်ပြေးသွားတဲ့ စစ်ကောင်စီတပ်သားတွေကို လိုက်လံဖမ်းဆီးချိန် ဒီဇင်ဘာ ၂၅ ရက်ကနေ ၂၇ ရက်အထိ ၃ ရက်တာအတွင်း ၁၇ ဦး ထပ်မံဖမ်းဆီးရမိခဲ့ကာ အသေးစိတ်အခြေနေကတော့ နယ်မြေလုံခြုံရေးနဲ့ စစ်ရေးအခြေနေအရ ပြောပြလို့မရသေးဘူးလို့ CDF-Asho တာဝန်ခံ ဆလိုင်းရှိုးချင်းက ပြောပါတယ်။

လက်ရှိ စစ်ကောင်စီတပ်သားတွေဆီက MA အမျိုးအစား လက်နက်ငယ် ၂၇ လက်၊  MA 2 ၄ လက်၊ MA 4 ၁ လက်၊ ၄၀ မမ ၁ လက်၊ ၆၀ မမ ပြောင်းတို ၁ လက်၊ ခဲယမ်းအများအပြားနဲ့ စစ်အသုံးအဆောင်ပစ္စည်းတွေ သိမ်းဆည်းနိုင်ခဲ့တယ်လို့ သိရပါတယ်။

ရခိုင်ပြည်နယ်၊ အမ်းမြို့မှာ အခြေစိုက်တဲ့ အနောက်ပိုင်းတိုင်းစစ်ဌာနချုပ်(နပခ)ကို အာရက္ခတပ်တော်က ဒီဇင်ဘာ ၂၀ ရက်မှာ သိမ်းပိုက်ခဲ့ပြီး စစ်ဗိုလ်ချုပ်တွေနဲ့ သုံ့ပန်းအများအပြားကို ဖမ်းဆီးနိုင်ခဲ့တာလည်း ဖြစ်ပါတယ်။ 

#မြေလတ်အသံ

#မကွေး #ငဖဲ #စစ်ကောင်စီ #ဖမ်းမိ #အမ်း