အမြန်လမ်းမှာ ယာဥ်တိုက်မှုထပ်ဖြစ်၊ ၂ ဦးသေဆုံးပြီး ၁ ဦးဒဏ်ရာရ
မန္တလေးတိုင်း၊ မိတ္တိလာမြို့နယ်၊ ရန်ကုန်-မန္တလေးအမြန်လမ်းမှာ ကားတစီးတိမ်းမှောက်ခဲ့တာကြောင့် ၂ ဦးသေပြီး၊ ၁ ဦးဒဏ်ရာရသွားတယ်လို့ သိရပါတယ်။
ဧပြီလ ၁၂ ရက်ဒီမနက် ၇ နာရီခန့်မှာ နေပြည်တော်ကနေ မန္တလေးဘက်ကို မောင်းနှင်လာတဲ့ Honda Airwave ကားဟာ မိုင်တိုင်အမှတ် ၃၀၅/၁ အနီးအရောက် အရှိန်မထိန်းနိုင်ဘဲ လမ်းလယ်ကျွန်းကိုဝင်တိုက်ပြီး တိမ်းမှောက်သွားတာလို့ ဒေသခံတဦးက ပြောပါတယ်။
"ကားက ရန်ကုန်က။ နေပြည်တော်ကနေ မန္တလေးသွားတာ။ ကားပေါ်မှာ မိသားစုဝင် ၃ ဦးပါလာတာ။အသက်ကြီးပိုင်းအမျိုးသမီး ၁ ဦးပါတယ်။ ယာဥ်မောင်းအိပ်ငိုက်တာ မဟုတ်ဘူး။ အရှိန်လွန်ပြီးတိုက်တာ။ ယာဥ်မောင်းကတော့ နေရာမှာဘဲသေသွားတာ။ ဆေးရုံရောက်မှ နောက်အမျိုးသမီး ၁ ယောက်ထပ်ဆုံးတယ်"လို့ ပြောပါတယ်။
![](https://myaelattathan.org/storage/editor_images/April2023/5bfc37fa67.jpeg)
ဒီတိမ်းမှောက်မှုကြောင့် ယာဥ်မောင်း ကိုဝင်းထိုက် ၄၃ နှစ်ဟာ နေရာမှာသေဆုံးခဲ့ပြီး၊ မဟောက်လွန်းကျိန် ၃၅ နှစ်က ဆေးရုံရောက်မှ သေဆုံးခဲ့ကာ၊ ဒေါ်ကျိန်ခန် ၆၉ နှစ်ကတော့ ဒဏ်ရာရသွားတယ်လို့ ဆိုပါတယ်။
သေဆုံးဒဏ်ရာရသူတွေကို ပြင်စည်အမြန်လမ်း မီးသတ်တပ်ဖွဲ့နဲ့ လူမှုကူညီရေးအသင်းတွေကကူညီပြီး မိတ္တီလာဆေးရုံကို ပို့ဆောင် ပေးထားရတယ်လို့ သိရပါတယ်။
![](https://myaelattathan.org/storage/editor_images/April2023/43cfde4c58.jpeg)
အလားတူ ဧပြီလ ၁၁ ရက်မနေ့ကမနက် ၁၁ နာရီ ၁၅ မိနစ်ခန့်မှာ ရန်ကုန်ဘက်ကနေ နေပြည်တော်ဘက်ကို မောင်းနှင်လာတဲ့ wish အိမ်စီးကားတစီးလည်း အမြန်လမ်းမိုင်တိုင်အမှတ် ၈၉/၀ နဲ့ ၈၉/၁ ကြားအရောက်မှာ အရှိန်မထိန်းနိုင်ဘဲ လမ်းလယ်ကျွန်းကို ဝင်တိုက်ခဲ့ရာက ကားပေါ်ပါ လင်မယားနှစ်ဦးမှ အမျိုးသမီးဖြစ်သူ သေဆုံးခဲ့ပါတယ်။
ဒါ့အပြင် ဧပြီလ ၁၀ ရက်မနက် ၁၁ နာရီ ၃၀ မိနစ်ခန့်မှာလည်း မန္တလေးဘက်ကနေ နေပြည်တော်ဘက်ကို မောင်းနှင်လာတဲ့ Honda Civic အမျိုးအစားယာဥ်ဟာ မြင်းခြံမြို့နယ်၊ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် ၃၂၅/၆ နဲ့ ၃၂၅/၇ ကြားမှာ လမ်းလယ်ကျွန်းကို ဝင်တိုက်မိလို့ ကားမီးလောင်ပြီး ကားပေါ်ပါ အမျိုးသား ၃ ဦး သေဆုံးခဲ့ပါသေးတယ်။
စာတည်း - လင်း
#မြေလတ်အသံ
Share
Share
Share