အရက်သောက်ပြီး ကျုံးထဲရေဆင်းကူးတဲ့ ရဲတပ်ကြပ် ရေနစ်သေဆုံး

ပဲခူးတိုင်း၊ တောင်ငူမြို့အဝင်၊ ထီးလှိုင်ကျုံးထဲကို ရေဆင်းကူးတဲ့ရဲတပ်ကြပ် ရေနစ်သေဆုံးသွားတယ်လို့ ဒေသခံတွေဆီက သိရပါတယ်။

သေဆုံးသူဟာ တောင်ငူအမှတ် ၁ ရဲစခန်းက အသက် ၃၉ နှစ်အရွယ် ရဲတပ်ကြပ် ၁ ဦးဖြစ်ပြီး မတ် ၂ ရက် နေ့လယ် ၁၂ နာရီလောက်မှာ အဖော်ဖြစ်သူနဲ့အရက်သောက်နေရင်း ကျုံးထဲရေဆင်းကူးရာက ရေနစ်ပျောက်ဆုံးခဲ့တာလို့ ဆိုပါတယ်။  

ရေနစ်ပျောက်ဆုံးနေတဲ့ရဲတပ်ကြပ်ကို ဒေသခံ လူမှုကူညီရေးအဖွဲ့တွေကရှာဖွေခဲ့ရာ မတ် ၃ ရက် နေ့လယ် ၂ နာရီကျော်မှ ရေကူးတဲ့နေရာနဲ့ ၁၅ ပေခန့်အကွာ ရေအောက်မှာတွေ့ပြီး ဆယ်ယူခဲ့ကြတာလို့ သိရပါတယ်။

"အရက်မူးပြီး သူဟာရေဆင်းကူးရာမှာ ကြွက်တက်ပြီးတော့ရေနစ်သွားတဲ့သဘောရှိတယ်။ ရေဆင်းကူးတာတော့တယောက်တည်း။ သူအဖော်ကတော့ ကုန်းပေါ်ကျန်တယ်။"လို့ ဒေသခံတဦးက ပြောပါတယ်။

ရေနစ်သေဆုံးသွားတဲ့ ရဲတပ်ကြပ်အလောင်းကိုတော့ ဒေသခံလူမှုကူညီရေးအသင်းတွေက တောင်ငူပြည်သူ့ဆေးရုံကိုပို့ဆောင်ပေးခဲ့ရတယ်လို့ သိရပါတယ်။

ပြီးခဲ့တဲ့နှစ် ဇူလိုင် ၂၅ ရက်ကလည်း တောင်ငူမြို့၊ ထီးလှိုင်ရပ်ကွက် ကျုံးထဲကို စိတ်ကျန်းမာရေးမကောင်းသူ အမျိုးသား ၁ ဦး ခုန်ချခဲ့ရာ ၂ ရက်အကြာမှ အလောင်းကို ပြန်လည်ဆယ်ယူရခဲ့တယ်လို့ သိရပါတယ်။

စာတည်း - လင်း

#မြေလတ်အသံ

#ပဲခူး #တောင်ငူ #ရဲတပ်ကြပ် #ရေနစ်သေဆုံး