Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
အသားခြောက် ကျပ်ကင်ရာမှ မီးလောင်လို့ နေအိမ် ၉ လုံး ပျက်စီး
မန္တလေးတိုင်း၊ မဟာအောင်မြေမြို့နယ်၊ သံလျှက်မှော်အနောက်ရပ်ကွက်၊ လမ်း ၉၀ နဲ့ ၉၁ ကြား၊ ၄၁ နဲ့ ၄၂ လမ်းကြားမှာ မတ်လ ၁၀ ရက် ဒီမနက် ၂ နာရီခွဲဝန်းကျင်က မီးလောင်ကျွမ်းမှု ဖြစ်ပွားခဲ့တယ်လို့ သိရပါတယ်။
အသားခြောက်ကျပ်ကင်လုပ်ငန်း လုပ်ကိုင်သည့်နေအိမ်မှ မီးစတင်လောင်ကျွမ်းခဲ့ခြင်း ဖြစ်ပြီး အချိန် ၁ နာရီနီးပါး မီးငြိမ်းသတ်ခဲ့ရကာ နေအိမ် ၉ လုံး မီးလောင်ဆုံးရှုံးခဲ့တယ်လို့ ဒေသခံတဦးက မြေလတ်အသံကို ပြောပါတယ်။
"လက်ရှိ မီးစလောင်တဲ့ အိမ်က အိမ်ရှင်တွေမရှိဘူး။ အိမ်ငှားတွေပါ။ သူတို့က အသားခြောက် ကျပ်ကင်တဲ့လုပ်ငန်း လုပ်တယ်။ အမဲသားတို့ ဝက်သားတို့ကို မီးဖိုကြီးထဲမှာ ကင်တာ။ မနက်ဈေးကို ပို့ရမှာမလို့ ၂ နာရီကျော်လောက် ထလုပ်နေကြလို့ သိရတယ်။ အဲ့ကနေ အဆီတွေကျတော့ မီးဟပ်တာ ခေါင်းမိုးမီးကူးပြီး မီးလောင်တာ" လို့ ပြောပါတယ်။
မီးလောင်ကျွမ်းမှုကြောင့် လူထိခိုက်သေဆုံးမှု မရှိခဲ့ဘဲ နေအိမ် ၉ လုံး မီးလောင်ပျက်စီးကာ ကာလတန်ဖိုး ကျပ်သိန်း ၁၀၀၀ ကျော် ဆုံးရှုံးခဲ့တယ်လို့ မန္တလေးမီးသတ်ဌာနနဲ့ နီးစပ်သူတွေဆီက သိရပါတယ်။
မီးလောင်မှုနဲ့ပတ်သက်ပြီး မီးပေါ့ဆစွာ အသုံးပြုသူ အသားခြောက်လုပ်ငန်းပိုင်ရှင်နဲ့ အလုပ်သမားတွေကို အမှတ်(၇)နယ်မြေရဲစခန်းမှာ ပုဒ်မ(၂၈၅)နဲ့ အမှုဖွင့်ထားတယ်လို့ သိရပါတယ်။
မတ်လ ၅ ရက်နေ့ကလည်း မဟာအောင်မြေမြို့နယ်ထဲမှာ ခြင်ဆေးခွေထွန်းရာကနေ မီးလောင်ကျွမ်းမှု ဖြစ်ပွားခဲ့လို့ နေအိမ် ၂ လုံး မီးလောင်ပျက်စီးခဲ့ပါသေးတယ်။
စာတည်း - ရင်ငြိမ်း
#မြေလတ်အသံ