အိမ်ငှားနေထိုင်တဲ့ လူငယ် ၃ ဦးကို ဧည့်စာရင်းမတိုင်လို့ဆိုကာဖမ်းဆီးပြီး စစ်မှုထမ်းဖို့ထည့် ■ ပြည်မှာ စစ်မှုထမ်းဖို့ဖမ်းဆီးမှုတွေ ဆက်တိုက်ပြုလုပ်နေပြီး နေအိမ်ပေါ်အထိ တက်ရောက်ဖမ်းဆီး

ပဲခူးတိုင်းအနောက်ခြမ်း၊ ပြည်မြို့၊ မူယာပင်ရပ်ကွက်၊ ဦးစောနန်းခြံဝန်းအတွင်း အိမ်ငှားနေထိုင်တဲ့ အမျိုးသား ၃ ဦးကို ဧည့်စာရင်းမတိုင်လို့ဆိုကာ စစ်ကောင်စီတပ်က ဝင်ရောက်ဖမ်းဆီးပြီးနောက် စစ်မှုထမ်းပို့ဆောင်ဖို့ လုပ်ဆောင်နေတယ်လို့ ဒေသခံတွေထံက သိရပါတယ်။

ဦးစောနန်းခြံဝန်းအပိုင် ရာအိမ်မှူး သူရလင်းနဲ့ ပြည်မြို့အခြေစိုက် အမှတ် ၉၅၉ စစ်လက်နက်ပစ္စည်းတပ်က စစ်ကောင်စီတပ်ဖွဲ့ဝင်တွေဟာ ဒီဇင်ဘာ ၁၈ ရက် ည ၁၀ နာရီဝန်းကျင်မှာ အဆိုပါခြံဝန်းအတွင်းက အိမ်ငှားနေထိုင်သူတွေကို ဧည့်စာရင်းစစ်ဆေးပြီး ဖမ်းဆီးသွားခဲ့တာလို့ ဆိုပါတယ်။

“ လူငယ်လေးတွေဆိုတော့ ခေါ်ချင်တာပေါ့၊ အိမ်ငှားတွေ အဓိကထား စစ်တာ။ ဧည့်စာရင်းမတိုင်ထားလို့လေ။ စစ်တပ်နဲ့ ရပ်ကွက်ရုံး‌ပေါင်းပြီး လာစစ်တာ။” လို့ ဒေသခံအမျိုးသမီးတဦးက မြေလတ်အသံကို ပြောပါတယ်။

ဖမ်းဆီးခံရသူတွေဟာ အသက် ၂၃ နှစ်အရွယ်ဝန်းကျင် လူငယ်တွေဖြစ်ပြီး ၂ ဦးမှာ ကုမ္ပဏီဝန်ထမ်းအလုပ် လုပ်ကိုင်သူတွေဖြစ်တယ်လို့ သိရပါတယ်။

ဖမ်းဆီးခံရသူ ၃ ဦးအနက် ၁ ဦးမှာ ကျန်းမာရေးမကောင်းတာကြောင့် စစ်ကောင်စီတပ်ကို ကျပ် ၅ သိန်းပေးကာ ပြန်လည်ရွေးယူခဲ့ရပြီး ၁ ဦးမှာ စစ်ုထမ်းဖို့ ဆေးစစ်မှုခံယူနေရကာ စစ်သင်တန်းကျောင်းကို ပို့ဆောင်ခံရမယ့် အခြေအနေမှာရှိနေပြီး နောက်ထပ် ၁ ဦးရဲ့ အခြေအနေတွေကိုတော့ မသိရသေးပါဘူး။

“ ၁ ယောက်ကတော့ ဆေးစစ်ချက်ယူနေရတာ ဘာပြစ်ချက်မှမရှိရင်(ကျန်းမာရေးကောင်းရင်) စစ်မှုထမ်းလိုက်ရပြီး မလိုက်ချင်ရင် ၃၅ သိန်းနဲ့ ‌ရွေးရမယ်လို့ သိရတယ်။ သူ့မိသားစုက ပိုက်ဆံမတတ်နိုင်လို့ စစ်မှုထမ်းလိုက်ရဖို့ များတယ်။” လို့ အထက်ပါဒေသခံက ပြောပါတယ်။

ဒါ့အပြင် ဒီဇင်ဘာ ၁၈ ရက် နေ့လယ်ပိုင်းက ရွှေတံခါးမြို့သစ်မှာ အမျိုးသား ၃ ဦးကို နေအိမ်တွေပေါ်အထိတက်ရောက်ဖမ်းဆီးသွားပြီး အဲ့ဒီနေ့ ညပိုင်းမှာပဲ ပြည်မြို့၊ စက်မှုဇုံအတွင်း အလိုတော်ပြည့်ဘုရားအနီးမှာ အမျိုးသား ၁၀ ဦး ကျော်ဖမ်းဆီးခံခဲ့ရတယ်လို့ သိရပါတယ်။

“နေ့ခင်းပိုင်းကြီး အိမ်ပေါ်ထိဝင်ဆွဲတာ၊ အမျိုးသားတွေပဲဆွဲတာ။ ပျူ** တွေက လူရှာပေးရင် ၁ ယောက် ၃ သိန်းရတယ်။“ လို့ ဒေသခံတဦးက ပြောပါတယ်။

စစ်ကောင်စီတပ်ရဲ့ဖမ်းဆီးမှုတွေကြောင့် လက်ရှိ ပြည်မြို့လမ်းတွေပေါ်မှာ ည ၆ နာရီနောက်ပိုင်း လူသွားလူလာနည်းပါးနေပြီး  နေအိမ်အတွင်းမှာပဲနေထိုင်ကြတယ်လို့ သိရပါတယ်။

ပုံစာ - ပြည်သူ့စစ်မှုထမ်းဥပဒေဖြင့် စုဆောင်းခံရသူများကို သင်တန်းကျောင်းသို့ ပို့ဆောင်နေစဉ်။ (ဓါတ်ပုံ - စစ်ကောင်စီတယ်လီဂရမ်)

စာတည်း - ဟိန်းစံ

#မြေလတ်အသံ

#ပြည် #စစ်မှုထမ်း #လူငယ် #ဖမ်းဆီး