၂ ရက်တာ တိုက်ပွဲ ၇ ခုမှာ စစ်သား ၆ ဦး သေဆုံးတယ်လို့ မြိုင် PDF ပြော (ရုပ်/သံ)

ဧပြီလ ၂၄ ရက်မှာ အဲဒီစစ်အုပ်စုဟာ ပဒိုင်းတောကျေးရွာက ထွက်လာပြီး ညောင်တုန်းရွာက နေအိမ် ၃၂ လုံးကိုမီးရှို့နေချိန်မှာ မိုင်းဆွဲခံရတာအပြင် ဒရုန်းနဲ့ပါ ဗုံးသီးကြဲခံရတယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ် ပကဖ ဗိုလ်လက်ယာက ပြောပါတယ်။

ဧပြီလ ၂၃ ရက်မှာ တိုက်ပွဲ ၃ ကြိမ်နဲ့ ၂၄ ရက်မှာ ၄ကြိမ် စုစုပေါင်း တိုက်ပွဲ ၇ကြိမ်မှာ Well 2 ရေနံမြေ ကနေ ဖလံကိုင်စခန်းအထွက်တိုက်ခိုက်ခံရတာ၊ ယောချောင်းထဲမှာ ငါးရှော့တိုက်နေတဲ့ စစ်သားတွေကိုပစ်ခတ်တာ၊ ပေါက်မြို့နယ် ဇီးပြားရဲစခန်းကို တိုက်ခိုက်တာတွေ ပါဝင်ပါတယ်။

မြိုင်နဲ့ ပေါက်မြို့နယ်အတွင်းကို ၂ ရက်တာ တိုက်ခိုက်မှုမှာ ကာကွယ်ရေးအဖွဲ့တွေက ဒရုန်းနဲ့ အီနာဂါဗုံးသီး အလုံး ၆၀ ကျော်ကြဲခဲ့သလို မိုင်း ၁၀ လုံး၊ လက်နက်ငယ်တွေနဲ့ပါ ပစ်ခတ်ခဲ့တယ်လို့ ဗိုလ်လက်ယာက ဆိုပါတယ်။

၂ နှစ်ရက်တာ တိုက်ပွဲအတွင်း စစ်ကောင်စီဘက်က လေကြောင်းပစ်ကူပေးတာတွေ ရှိပြီး တိုက်ပွဲပေါင်း ၇ ကြိမ်မှာ စစ်သား ၆ ဦး သေဆုံးကာ ၃၄ ဦး ဒဏ်ရာရခဲ့တယ်လို့ ဆိုပေမယ့် ထိခိုက်သေဆုံးမှုကိုတော့ မြေလတ်အသံက အတည်ပြုနိုင်ခြင်း မရှိသေးပါဘူး။

ကာကွယ်ရေးအဖွဲ့မှာလည်း ရဲဘော်၂ ဦး မစိုးရိမ်ရ ထိခိုက်ခဲ့တာတွေ ရှိတယ်လို့ ပြောပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ် ပကဖ ရင်း ( ၁ ) ခွဲ ( ၃ ) စု ( ၂ )၊ Pakokku Thurain အဖွဲ့၊ ဂဠုန်ပြည်သူ့ကာကွယ်ရေးတပ်မတော်၊ Earthquake People Defence Force၊ Royal Defence Force၊ Young Force ၊ ပေါက် ဗိုလ်တစ္ဆေအဖွဲ့၊ ခရိုင်ရင်း ( ၁၈ ) ခွဲ ( ၃ ) နဂါးမျိုးအဖွဲ့၊ ပေါက်ကျေးရွာကာကွယ်ရေး အဖွဲ့များ၊ ပေါက်မြို့နယ် ဗိုလ်စကားအဖွဲ့နဲ့ တောင်ညိုနဂါးအဖွဲ့ တို့က ပူးပေါင်းလုပ်ဆောင်ခဲ့တယ်လို့ သိရပါတယ်။

တည်းဖြတ်- ငြိမ်းဇော်
#မြေလတ်အသံ