CDM ရဲတပ်သားရဲ့အကူအညီနဲ့ တမူးပလဖထိန်းသိမ်းထားတဲ့ စစ်သုံ့ပန်း ၃၄ ဦးထွက်ပြေးလွတ်မြောက်

အန္ဒိယ-မြန်မာနယ်စပ်၊ စစ်ကိုင်းတိုင်း၊ တမူးမြို့နယ်၊ သနန်အကျဉ်းထောင်မှာ NUG လက်အောက်ခံ တမူးပြည်သူ့လုံခြုံရေးအဖွဲ့(တမူးပလဖ)က ထိန်းသိမ်းထားတဲ့ အကျဉ်းသား ၃၄ ဦး ဒီဇင်ဘာ  ၁၂ ရက် ည ၁၀ နာရီဝန်းကျင်က ထွက်ပြေးလွတ်မြောက်သွားတယ်လို့ ‌တော်လှန်ရေးအင်အားစုတွေဆီက သိရပါတယ်။

စစ်သုံ့ပန်းတွေဟာ ခမ်းပါတ်မြို့မရဲစခန်းကနေ CDM ပြုလုပ်လာတဲ့ ရဲတပ်သား ဇေယျာထိုက်ရဲ့အကူအညီနဲ့ အချုပ်ခန်းကို ဖောက်ပြေးသွားခဲ့တာလို့ ဆိုပါတယ်။

"ဒါ ပေါ့ဆမှုတခုပဲပေါ့။ ပေါ့ဆလို့ပေါ့။ ကျနော်တို့ ဒီအယုံထားလို့ပေါ့နော့။ ကိုယ့်လူဆိုပြီးမှလည်း တချို့ဟာတွေကျလည်း အယုံမထားသင့်ဘူးလေ။ ကျနော်တို့ ဒီမြို့သစ်က လက်နက်ချအညံ့ခံတဲ့ ရဲတွေပါမယ်။ သနန်က ပျူစောထီးတွေပါမယ်။"လို့  တမူးမြို့နယ်တော်လှန်ရေးအင်အားစု အဖွဲ့ဝင်တဦးက ပြောပါတယ်။

လက်ရှိမှာ စစ်သုံ့ပန်းတွေဟာ အန္ဒိယနယ်စပ်ကတဆင့် စစ်ကောင်စီလက်အောက်ခံ ရှမ်းနီတပ်ဖွဲ့နဲ့ ပျူစောထီးပူးပေါင်းအဖွဲ့တွေ အထိုင်ချထားတဲ့ မင်းသာရွာကို ရောက်ရှိသွားခဲ့ပြီလို့ သူကဆက်ပြောပါတယ်။

အဲ့ဒီသနန်အကျဉ်းစခန်းကို အတွင်းစည်းပိုင်းမှာ ပလဖကစောင့်ပြီး အပြင်စည်းပိုင်းမှာ ပကဖက ကင်းစောင့်တယ်လို့ ဆိုပါတယ်။

ထွက်ပြေးသွားတဲ့ စစ်သုံးပန်းတွေ‌ဟာ တမူးမြို့နယ် မြို့သစ်တိုက်ပွဲနဲ့ သနန်အကျဉ်းစခန်းသိမ်းတိုက်ပွဲတုန်းက ဖမ်းဆီးထိန်းသိမ်းထားတဲ့ စစ်သုံ့ပန်းတွေ ဖြစ်ပါတယ်။

အဲ့ဒီသနန်အကျဉ်းထောင်က စစ်သုံ့ပန်းတွေထွက်ပြေးလွတ်မြောက်မှုနဲ့ပတ်သက်ပြီး တော်လှန်ရေးအင်အားစုတွေကြား လူမှုကွန်ယက်မှာ‌ဝေဖန်မှုတွေရှိနေပေမဲ့ အမျိုးသားညီညွတ်ရေးအစိုးရ NUG ဘက်ကတော့ တစုံတရာပြောဆိုထုတ်ပြန်ထားတာမျိုး မတွေ့ရသေးပါဘူး။

အခု သနန်အကျဉ်းထောင်ကနေ စစ်သုံ့ပန်းအကျဉ်းသားတွေ ထွက်ပြေးလွတ်မြောက်တာဟာ ဒုတိယအကြိမ်ဖြစ်ပြီး အခုနှစ် နှစ်ဆန်းပိုင်းကလည်း အကျဉ်းသား  ၁၀ ဦး ထွက်ပြေးလွတ်မြောက်ခဲ့သေးတယ်လို့ သိရပါတယ်။

တမူးခရိုင်မှာ တမူးမြို့နဲ့ မြို့အနီးတဝိုက် ပျူ‌စောထီးအားကောင်းတဲ့ကျေးရွာများကိုသာ စစ်ကောင်စီကထိန်းချုပ်ထားနိုင်ပြီး ခမ်းပါတ်မြို့နဲ့ မြို့သစ်မြို့အပါအဝင် မြို့နယ်ကကျေးရွာတွေကို ‌နယ်‌မြေခံတော်လှန်ရေးတပ်ဖွဲ့တွေက ထိန်းချုပ်ထားတဲ့အခြေအနေဖြစ်ပါတယ်။

သတင်း - သက်ဝေ၊ စာတည်း - JCG

#မြေလတ်အသံ

#တမူး #သနန်အကျဉ်းထောင် #စစ်သုံ့ပန်း #ထွက်ပြေး