PDF တွေရှိတယ်အထင်နဲ့ ရေနံချက်စက်ရုံတံခါးကို ခြေထောက်နဲ့ကန်ဖွင့်ပြီး စီးနင်းတဲ့ ပျူခေါင်းဆောင် မိုင်းထိလို့ ဆေးရုံတင်ထားရ

မကွေးတိုင်း၊ မင်းဘူးခရိုင်၊ ပွင့်ဖြူမြို့နယ်၊ ဆင်လူးကျေးရွာ အုပ်ချုပ်ရေးမှူးလည်းဖြစ်သလို ဒေသတွင်းပျူစောထီးခေါင်းဆောင်လည်းဖြစ်သူဟာ PDF ထောင်ခဲ့တဲ့မိုင်းထိလို့ ဆေးရုံတင်ထားရတယ်လို့ ဒေသခံတွေထံက သိရပါတယ်။

မိုင်းထိသူမှာ ပျူစောထီးခေါင်းဆောင် ဦးဖိုအောင် ဆိုသူဖြစ်ပြီး နိုဝင်ဘာ ၁၂ ရက် မနေ့နေ့လယ် ၁၂ နာရီခွဲလောက်မှာ ကံပြားရဲစခန်းကလာတဲ့ စစ်ကောင်စီတပ်ဖွဲ့ဝင်တွေနဲ့ ၎င်းဦးဆောင်တဲ့ ပျူစောထီးပူးပေါင်းအင်အား ၁၀၀ ကျော်ဟာ စစ်ကား ၇ စီးနဲ့ ခလမ်းရွာအနီး ပုဂ္ဂလိကရေနံချက်စက်ရုံတခုကို ဝင်ရောက်စီးနင်းစဉ် မိုင်းထိခဲ့တာလို့ဆိုပါတယ်။

“ ပျူစောထီးခေါင်းဆောင် ဦးဖိုးအောင်က (ပိတ်ထားတဲ့ရေနံချက်စက်ရုံ တံခါးပေါက်ကို) ခြေထောက်နဲ့ ကန်ပြီးဖွင့်တဲ့အချိန်မှာ မိုင်းကွဲပြီး ဒဏ်ရာပြင်းထန်ရသွားတယ်။” လို့ ပွင့်ဖြူနယ်ဒေသခံတဦးက မြေလတ်အသံကို ပြောပါတယ်။

အဆိုပါစက်ရုံဟာ ပုဂ္ဂလိကပိုင်ရေနံချက်စက်ရုံဖြစ်ပြီး စက်တင်ဘာလပိုင်းကစတင်ကာ စက်ရုံပိုင်ရှင်၊ အလုပ်သမားတွေက စွန့်ခွာသွားကာ စက်ရုံလုပ်ငန်းတွေ လည်ပတ်မှုရပ်ဆိုင်းထားခဲ့တာကြောင့် PDF တွေ ခေတ္တအခြေပြုဝင်ရောက်နေထိုင်ခဲ့တဲ့ နေရာဖြစ်တယ်လို့ သိရပါတယ်။

“ အဲ့ဒီထဲမှာ PDF တွေရှိတယ်ဆိုပြီး သတင်းရလို့ သွားတာ” လို့ အထက်ပါ ဒေသခံက ပြောပါတယ်။

အဆိုပါ မိုင်းကို မင်းဘူးခရိုင်အမှတ် ၄ တပ်ရင်းက ထောင်ထားတာဖြစ်ပြီး ၎င်းမိုင်းပေါက်ကွဲတာကြောင့် ဆင်လူးရွာအုပ်ချုပ်ရေးမှူး ပျူစောထီးခေါင်းဆောင်အပါ ၃ ဦး ဒဏ်ရာရရှိတယ်လို့ သတင်းရရှိထားကြောင်း တပ်ရင်း ၄ တာဝန်ရှိသူက ပြောပါတယ်။

မိုင်းပေါက်ကွဲမှုကြောင့် ပျူစောထီးခေါင်းဆောင် ဦးဖိုးအောင် မှာ ခြေထောက်မိုင်းစထိမှန် ပြင်းထန်ဒဏ်ရာရရှိခဲ့ပြီး စစ်ကောင်စီတပ်ကားတွေနဲ့ နောက်ကြောင်းပြန်ဆုတ်ကာ ဦးဖိုးအောင်ကို စလင်းဆေးရုံကတဆင့် မကွေးမြို့၊ အမှတ် ၁၆ ကုတင်် ၁၀၀ စစ်ဆေးရုံကို ပို့ဆောင်လိုက်တယ်လို့ ဆိုပါတယ်။

ဆင်လူးကျေးရွာအုပ်စုမှာ ဆင်လူးတောင်ရွာနဲ့မြောက်ရွာ ၂ ရွာပါဝင်ပြီး  စစ်အာဏာသိမ်းပြီးနောက် အရပ်သားအစိုးရလက်ထက်က အုပ်ချုပ်ရေးမှူး ဦးစိန်အောင်မိုး ကို ဖြုတ်ချကာ ဦးဖိုးအောင် က အုပ်ချုပ်ရေးမှူး ဖြစ်လာတာလို့ သိရပါတယ်။

မိုင်းပေါက်ကွဲပြီးနောက် ညနေ ၅ နာရီလောက်မှာ စစ်ကောင်စီတပ်ဖွဲ့တွေဟာ အဆိုပါရေနံချက်စက်ရုံကို မီးရှို့ခဲ့ပြီး စက်ရုံအတွင်း သံပိုက်လုံးတွေကို ကား ၂ စီးနဲ့ ဆင်လူးကျေးရွာကို သယ်ဆောင်လာတယ်လို့ သိရပါတယ်။

ပုံစာ - မိုင်းထိဒဏ်ရာရရှိသူ ပျူစောထီးခေါင်းဆောင် ဦးဖိုးအောင်။

စာတည်း - ဟိန်းစံ

#မြေလတ်အသံ

#ပွင့်ဖြူ #ဆင်လူးရွာ #ပျူစောထီး #မိုင်းထိ