PDF အယောင်ဆောင်ပြီး မန္တလေးကလုပ်ငန်းရှင်တွေကို ခြိမ်းခြောက်ငွေတောင်းမှုတွေရှိနေ

မန္တလေးက လုပ်ငန်းရှင်တွေဆီကို PDF တပ်ရင်း၊ တပ်ဖွဲ့တွေရဲ့နာမည်ကိုသုံးပြီး အွန်လိုင်းပေါ်ကနေ စာပို့ခြိမ်းခြောက်ကာ ဆက်ကြေးတောင်းတာတွေရှိနေတယ်လို့ မန္တလေးမြို့ရှိလုပ်ငန်းရှင်တဦးက ပြောပါတယ်။ 

လုပ်ငန်းရှင်တွေဆီကို အလှူခံခေါင်းစဥ်မျိုးမဟုတ်ဘဲ ဆက်ကြေးအသေးစားအနေနဲ့ ငွေကျပ် ၁၀ သိန်းကို မဖြစ်မနေပေးရမှာဖြစ်ပြီး မပေးပါကလုပ်ငန်းနဲ့စည်းစိမ်ကို ထိပါးမယ်ဆိုတဲ့စာကို Viber ကနေတဆင့်ပို့ပြီး ခြိမ်းခြောက်တောင်းခံတာလို့ စာပို့ခံရတဲ့လုပ်ငန်းရှင်တဦးက ပြောပါတယ်။ 

ခုလို ခြိမ်းခြောက်ငွေတောင်းတာတွေနဲ့ပတ်သက်ပြီး ဒီလိုငွေကြေးတောင်းခံတာမျိုးကို မန္တလေးခရိုင်အတွင်းရှိ တော်လှန်ရေးတပ်ဖွဲ့တွေဘက်က မပြုလုပ်ဘူးလို့ မန္တလေးခရိုင်ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။ 

"ဒါက စကစဘက်ကနေ တော်လှန်ရေးကို ပုံဖျက်တဲ့ပုံစံမျိုးပါ။ ကျနော်တို့ မန္တလေးခရိုင်ကနေ စာထုတ်တောင်းခံတာမျိုးမရှိပါဘူး "လို့ မန္တလေးခရိုင် PDF တပ်ဖွဲ့တာဝန်ရှိသူက ပြောပါတယ်။

ဒီလိုစာပို့ခြိမ်းခြောက်တာမျိုးကို စက်တင်ဘာ ၁၀ ရက်လောက်က စတင်တွေ့ရှိနေတာဖြစ်ပြီး စက်တင်ဘာ ၁၅ ရက် ဒီနေ့အထိစာပို့ခံနေရတဲ့လုပ်ငန်းရှင်တွေရှိတယ်လို့ မန္တလေးမြို့ရှိ လုပ်ငန်းရှင်တဦးက ပြောပါတယ်။ 

နောက်ထပ် မန္တလေးမြို့ရှိ မြို့နယ်ပြည်သူ့ကာကွယ်ရေးတပ်ဖွဲ့ ခေါင်းဆောင်တဦးကလည်း တော်လှန်ရေးတပ်ဖွဲ့တွေအနေနဲ့ ခုလိုခြိမ်းခြောက်ငွေတောင်းတာမျိုးကိုမလုပ်ဘဲ ပြည်သူတွေလှူတဲ့အရာတွေကိုသာ လက်ခံတယ်လို့ ပြောပါတယ်။

အမျိုးသားညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာနကလည်း PDF တပ်ရင်း တပ်ဖွဲ့၊ ပကဖ၊ စစ်ကြောင်းတွေရဲ့နာမည်တွေ၊ အမှတ်တံဆိပ်တွေသုံးကာ ပြည်သူတွေထံ အသံဖိုင်၊ စာတွေနဲ့ မသမာသူတွေက ငွေညှစ်တာတွေရှိနေတယ်လို့ စက်တင်ဘာ ၁၃ ရက်က ထုတ်ပြန်ထားခဲ့ပါတယ်။ 

အခုလို ခြိမ်းခြောက်ငွေတောင်းယူနေတာဟာ PDF တပ်ရင်းတပ်ဖွဲ့၊ ပကဖ (သို့) အဖွဲ့ဝင်တဦးဦးရဲ့ လုပ်ဆောင်ချက်ဖြစ်တယ်လို့ စိစစ်တွေ့ရှိရပါကလည်း PDF တပ်မတော်ရဲ့စစ်စည်းကမ်းဥပဒေနဲ့အညီ ပြင်းထန်စွာအရေးယူသွားမယ်လို့လည်း ထုတ်ပြန်ချက်မှာ ဖော်ပြထားပါတယ်။  

သတင်း - အမရာ၊ စာတည်း - လင်း 

#မြေလတ်အသံ

#မန္တလေး #ငွေတောင်း #ခြိမ်းခြောက် #တပ်ဖွဲ့အမည်ခံ